ՁԻԱՀ–ԻՑ ՄԻՆՉԵՎ COVID. ԷԼ Ի՞ՆՉ Է ՊԵՏՔ ԻՄԱՆԱԼ ՀԱՄԱՃԱՐԱԿՆԵՐԻ ՏԱՐԱԾՈՒՄԸ ԿԱՆԽԵԼՈՒ ՀԱՄԱՐ. ԵՊՀ ՈՒՍԱՆՈՂՆԵՐԻ ԵՎ ԴԱՍԱԽՈՍՆԵՐԻ ՀԱՄԱՐ ԴԱՍԱԽՈՍՈՒԹՅՈՒՆ ԿԱՐԴԱՑ ՊՐՈՖԵՍՈՐ ՄԱՐԳՈԼԻՍԸ

Դասախոսության սկզբում կենսաբանության գիտահետազոտական ինստիտուտի տնօրեն Ալեքսանդր Եսայանը ողջունեց ներկաներին և պատմեց հյուրի մասին: Դոկտոր Լեոնիդ Մարգոլիսը սովորել է Լոմոնոսովի անվան համալսարանում: Իր գիտական կարիերայի առաջին մասն անցկացրել է ՄՊՀ-ում, որտեղ դարձել է գլխավոր գիտաշխատող, լաբորատորիայի վարիչ և բջջային կենսաբանության պրոֆեսոր: Կենսաֆիզիկայի գիտությունների դոկտորի գիտական հետաքրքրությունները կենտրոնացած են բջիջ-բջիջ տեղաշարժի և բջջային թաղանթների փոխազդեցությունների վրա։ 

Լեոնիդ Մարգոլիսը դասախոսության սկզբում ներկայացրեց համաճարակների պատմությունը 1800-ականներից մինչև մեր օրեր. «Թվում է, թե մենք արդեն հսկայական տեղեկատվություն ունենք համաճարակների, ավելի կոնկրետ COVID-ի մասին, բայց կան հարցեր, որոնց պատասխանները դեռ չունենք, օրինակ՝ ինչպե՞ս ստեղծել ճիշտ պատվաստանյութ, դեղորայք՝ COVID-ի բուժման դեմ: Հույս ունենք՝ շուտով կգտնենք նաև այս հարցերի պատասխանները»:

Երրորդ կուրսի ուսանող Րաֆֆի Շահմուրադյանը մի քանի օր է՝ սպասում էր հանդիպմանը. «Պրոֆեսորը մասնագիտացած է նաև մաթեմատիկայի և ֆիզիկայի ոլորտներում: Այս առումով թեմային յուրահատուկ տեսանկյունից մոտեցումը շատ հետաքրքիր էր: Արդեն իսկ ճանաչելով պրոֆեսոր Մարգոլիսին՝ գիտեի, որ իրենից կարող եմ ստանալ ոչ միայն տեսական գիտելիքներ, այլև երկար ժամանակ ինձ հետաքրքրող հարցերի պատասխանները»:

Կենսաքիմիայի, մանրէաբանության և կենսատեխնոլոգիայի ամբիոնի վարիչ Աննա Փոլադյանն ասաց, որ COVID-ի դեմ պայքարը մեզ մշտապես ուղեկցելու է, որովհետև վիրուսը մանրէ է, իսկ մանրէների հետ մենք մշտապես պայքարի մեջ ենք լինելու. «Գիտնականներս պետք է ոչ միայն ուսումնասիրենք ու ստեղծենք պատվաստանյութ, այլ նաև իմանանք վիրուսի մեխանիզմը, ներթափանցման ու ազդեցության հետագա քայլերը»:

Հանդիպումն ավարտվեց ակտիվ քննարկմամբ. պրոֆեսորը պատասխանեց դասախոսների և ուսանողների հարցերին: