Ընթացիկ ուստարում «Եվրոմեդիա-24» հարթակում տեղի է ունեցել «Հարավային Կովկաս՝ նոր իրականություն և հեռանկարներ» խորագրով տեսակոնֆերանս:
Կոնֆերանսի կազմակերպիչներն էին Հաղորդակցությունների ազգային հետազոտական ինստիտուտը (Մոսկվա), ԵՊՀ ռուսաստանյան հետազոտությունների կենտրոնը, ԵՊՀ հայագիտական հետազոտությունների ինստիտուտը: Կոնֆերանսին մասնակցում էին Հաղորդակցությունների ազգային հետազոտական ինստիտուտի տնօրենի տեղակալ Վ. Կոմլևան, ԵՊՀ ռուսաստանյան հետազոտությունների կենտրոնի տնօրեն, դոցենտ Ա. Սաֆարյանը, ԵՊՀ հայագիտական հետազոտությունների ինստիտուտի հայ-ռուսական հարաբերությունների ուսումնասիրության բաժնի վարիչ, պրոֆեսոր Ա. Ենգոյանը, ԵՊՀ քաղաքագիտության ամբիոնի պրոֆեսոր Գ. Քեռյանը, «Արարատ» ռազմավարական հետազոտությունների կենտրոնի տնօրեն, ք.գ.դ. Ա. Այվազյանը։
Միջոցառման նպատակն էր վերլուծել և մասնագիտորեն գնահատել հանգուցային այն հիմնախնդիրները, որոնք կապված են Հարավային Կովկասում ծավալվող քաղաքական, տնտեսական և ինֆորմացիոն գործընթացների հետ։ Առանձնակի կարևորվեց այն գործոնների վերլուծությունը, որոնք ազդում են տարածաշրջանային ուժերի բալանսի, Հարավային Կովկասի կայունության, երկրների միջև համագործակցության վրա։
Քննարկման առարկա դարձան Հարավային Կովկասում ծավալվող քաղաքական փոխակերպումները, տարածաշրջանում արտաքին դերակատարների՝ համաշխարհային ուժային կենտրոնների և միջազգային կազմակերպությունների գործունեությունը, Հարավային Կովկասի երկրների միջև կայուն փոխհարաբերությունների մոդելները և այլն։
