Ստեղծարարությունն ու համագործակցությունը՝ մեկ հարթակում․ «Եկե՛ք մրցենք»
Բուհերի միջև համագործակցային, ուսանողամետ և ստեղծարար կապերի ամրապնդումը խթանելու նպատակով ապրիլի 1-14-ը ԵՊՀ ուսանողական խորհրդի նախաձեռնությամբ անցկացվեց «Եկե՛ք մրցենք» միջբուհական առաջնությունը։ ԵՊՀ-ն համախմբեց մի շարք բարձրագույն ուսումնական հաստատությունների ուսանողների և տրամադրեց հարթակ, որտեղ նրանք ցուցադրեցին իրենց կարողություններն ու գիտելիքները, ձեռք բերեցին նոր փորձառություն և կապեր։
Երկշաբաթյա առաջնության շրջանակում անցկացվեցին մրցույթներ հետևյալ մրցաձևերում՝ գեղանկարչություն, ֆուտբոլ, թիմային շախմատ, «Ի՞նչ։ Որտե՞ղ։ Ե՞րբ» ինտելեկտուալ խաղ, ուսանողական սթենդափ, գիտելիքների մենամարտ և երաժշտապարային մյուզիքլ։ Առաջնությունը հնարավորություն տվեց ուսանողներին դրսևորելու ստեղծարար, մարզական, տրամաբանական և այլ կարողություններ, հմտություններ ու իմացություններ։
Միջոցառումը ամփոփվեց ապրիլի 14-ին՝ ԵՊՀ ուսանողական խորհրդի հիմնադրման 31-ամյակի օրը: Մասնակից բուհերի ներկայացուցիչները, ԵՊՀ աշխատակիցներն ու գործընկեր կազմակերպությունների ներկայացուցիչները ներկա գտնվեցին եզրափակիչ միջոցառմանը, որի ընթացքում հատուկ մրցանակներով պարգևատրվեցին 7 մրցաձևերում լավագույն արդյունքները գրանցած մասնակիցները:
Հաղթող բուհերն են Երևանի Մխիթար Հերացու անվան պետական բժշկական համալսարանը, Հայաստանի ազգային ագրարային համալսարանը և Հայաստանի ազգային պոլիտեխնիկական համալսարանը։
ԵՊՀ ՈԻԽ-ն շնորհակալություն է հայտնում բոլոր գործընկերներին և մասնակից բուհերին՝ նախաձեռնությանը միանալու, մրցակցային ոգին բարձր պահելու և ուսանողական համայնքը հզորացնելու համար։ «Եկե՛ք մրցենք»-ը դարձավ թե՛ մրցակցային հարթակ, թե՛ համագործակցության ամուր հիմք հայաստանյան բուհերի ուսանողների համար:
Տոնական համերգ
Մրցանակաբաշխությունից անմիջապես հետո կայացավ տոնական համերգ՝ նվիրված ԵՊՀ ուսանողական խորհրդի հիմնադրման 31-ամյակին։ Չնայած անձրևոտ եղանակին՝ տոնական տրամադրությունը բարձր էր, որն ապահովեցին ԵՊՀ ՈԻԽ լավագույն բարեկամները՝ երգչուհի Սրբուկը, ինչպես նաև «Hayk Apricota»-ն և «Arni Rock»-ը։
Այս իրադարձությունը ԵՊՀ ուսանողական խորհրդի համար դարձավ ևս մեկ վկայություն 31-ամյա կառույցի շարունակական առաքելության մասին՝ պաշտպանել ուսանողների իրավունքներն ու շահերը, խթանել համագործակցությունը և սատարել ազգային-հայրենասիրական արժեքների տարածմանը։
