Անցկացվեց ԵՊՀ ուսանողական գիտական ընկերության նախաձեռնությամբ կազմակերպված «ՈՒԳԸ ամառային դպրոց» աննախադեպ ծրագիրը, որին մասնակցում էին ՀՀ հանրակրթական ուսումնական հաստատությունների 11-12-րդ դասարանների ավելի քան 40 աշակերտներ և ուսանողներ։
Դպրոցի նպատակն էր ստեղծել ոչ ֆորմալ հարթակ ապագա համալսարանականների համար՝ դառնալով բուհական միջավայրին ծանոթանալու, պրոֆեսորադասախոսական կազմի հետ շփվելու, ինչպես նաև նախընտրելի մասնագիտություններին առնչվող հարցեր բարձրաձայնելու սկզբնակետ։
Ծրագրին մասնակցելու հայտադիմում էր ներկայացրել ավելի քան 130 աշակերտ և ուսանող, որոնցից ընտրվել են միայն 44-ը։
| 
| 
|
Ինտեգրացիոն մոդելով ստեղծված ծրագրում ներառված էին ինչպես բանախոսություններ և ոչ ֆորմալ քննարկումներ, այնպես էլ ինտերակտիվ խաղեր: Ծրագիրը մասնակիցների համար ստեղծված ինքնադրսևորման ու ինքնարտահայտման յուրատիպ հարթակ էր, որի ընթացքում ուսանողները հնարավորություն ունեցան լսելու ԵՊՀ զարգացման և նորարարությունների գծով պրոռեկտոր Միքայել Հովհաննիսյանի բանախոսությունը՝ ծանոթանալով բուհի պատմությանն ու ապագայի տեսլականին՝ տալու հետաքրքրող հարցեր, ծավալելու քննարկումներ։
Բացի բուհի ու համալսարանական ստորաբաժանումների վերաբերյալ տեղեկություններ ստանալուց՝ ծրագրի շրջանակում մասնակիցները լսել են նաև ԵՊՀ արևելագիտության ֆակուլտետի իրանագիտության ամբիոնի վարիչ, բ.գ.թ., պրոֆեսոր Վարդան Ոսկանյանի և նույն ֆակուլտետի Թյուրքագիտության ամբիոնի դասախոս, պ.գ.թ., դոցենտ Վարուժան Գեղամյանի դասախոսությունները՝ Իրանի և Թուրքիայի տարածաշրջանային քաղաքականության վերաբերյալ։
| 
| 
|
«PIDEH», «Kamancha», «Armat» ռեստորանների հիմնադիր-տնօրեն Արեգ Գևորգյանը դպրոցի մասնակիցներին ներկայացրել է մեմերի՝ մշակութային նշանակություն ունեցող ինֆորմացիոն միավորների ու ինֆլյուենսերների՝ լսարանի վարքի և որոշումների վրա ազդելու ունակ մարդկանց, բրենդների կամ անհատների խումբերի միջոցով իրականացվող մարքեթինգի առանձնահատկությունները՝ համապատասխան օրինակներով ներկայացնելով դրանց առավելություններն ու թերությունները։
Հատկանշական է, որ բուն մասնագիտական քննարկումներից զատ՝ դպրոցի մասնակիցները հնարավորություն են ունեցել մասնակցելու աշխատարանի (workshop)` լսելով ՈՒԽ նախկին նախագահ, ՈՒՀՏԱԿ փոխտնօրեն Խաչիկ Աբաջյանի՝ անհատական զարգացման պլանավորման մեթոդներին առնչվող բանախոսությունը։ Ծրագրի բոլոր օրերն ուղեկցվել են ԵՊՀ իրավագիտության, Աշխարհագրության և երկրաբանության, Փիլիսոփայության և հոգեբանության, Սոցիոլոգիայի, Միջազգային հարաբերությունների ֆակուլտետների ՈՒԳԸ-ների կազմակերպած դատախաղով, «Գեոքեշինգ-2025», «Հոգեբանական դոմինո», «Հասարակության խաղի կանոնները. սոցիալական դերեր և պիտակներ», «ՄԱԿ-մոդել» սիմուլյացիոն խաղերով:
ԵՊՀ ՈՒԳԸ նախագահ Սիրանուշ Բաղումյանի խոսքով՝ ՈՒԳԸ ամառային դպրոցի մասնակիցների արձագանքը «հուշում է», որ ծրագիրն այսուհետ կարևոր տեղ պետք է զբաղեցնի կառույցի ռազմավարական պլանում։
«Դպրոցի արդյունքները փաստում են, որ այն կարող է ընդլայնել իր աշխարհագրական սահմանները՝ հիմքեր ստեղծելով արտերկրի գործընկերների հետ համագործակցելու և օտարերկրյա ուսումնական հաստատությունների աշակերտների և ուսանողների հետ կապեր հաստատելու տեսանկյունից։ Վերջինս կնպաստի ոչ միայն ՈՒԳԸ-ի, այլև համալսարանի հեղինակության ու ճանաչվածության բարձրացմանը միջազգային հարթակներում»,- ընդգծեց Սիրանուշ Բաղումյանը։
«ՈՒԳԸ ամառային դպրոց» ոչ ֆորմալ կրթական ծրագիրն ամփոփվել է պատմաճանաչողական այցով դեպի Խոր Վիրապի վանք, Սբ. Հակոբ եկեղեցի և Վազգեն Սարգսյանի տուն-թանգարան, որտեղ դպրոցի աշակերտները ստացել են մասնակցության հավաստագրերը։
