Սեպտեմբերի 23-ին ԵՊՀ-ն մեկ օրով վերածվել էր կրթության, կարիերայի, նոր գաղափարների ու շփումների միասնական հարթակի։
«ԲանՈՒԳործ․ ԵՊՀ էքսպո-2026»-ը մեկ վայրում համախմբել էր ուսանողներին, շրջանավարտներին, գործատուներին և համալսարանի կրթական ու հետազոտական ստորաբաժանումներին։
Էքսպոյի աշխույժ միջավայրում այցելուները հնարավորություն ունեին ոչ միայն ծանոթանալու տարբեր կազմակերպությունների գործունեությանը, աշխատանքի և պրակտիկայի հնարավորություններին, այլև բացահայտելու համալսարանի ներսում իրենց համար հասանելի կրթական ու մասնագիտական նոր ուղիները։
Միջոցառմանը, որն անցկացվում էր արդեն չորրորդ անգամ, այս տարի ներկայացված էր 38 գործընկեր կազմակերպություն։ Նրանց ներկայացուցիչները հանդիպում էին ուսանողների և շրջանավարտների հետ, ներկայացնում թափուր աշխատատեղերն ու պրակտիկայի ծրագրերը, անցկացնում հարցազրույցներ և ձևավորում նոր մասնագիտական կապեր։
ՏՏԿՀ-ն՝ էքսպոյի աշխույժ տաղավարներից
ԵՊՀ ստորաբաժանում հանդիսացող ՏՏ կրթական և հետազոտական կենտրոնը (ՏՏԿՀ) ևս միացել էր էքսպոյին՝ իր տաղավարում ներկայացնելով կենտրոնի գործունեությունը, կրթական ուղղություններն ու հնարավորությունները։
ՏՏԿՀ տաղավարը առաջին իսկ հայացքից առանձնանում էր իր ինտերակտիվ ձևաչափով։ Այստեղ այցելուներին սպասում էին կենտրոնի մասին տեղեկատվական տեղեկաթերթիկներ (բուկլետներ), կպչուն պիտակներ (ստիկերներ) և կրծքանշաններ, իսկ տաղավարի շուրջ օրվա ընթացքում անընդհատ մարդաշատ էր։
Այցելուները հնարավորություն ունեցան անմիջականորեն շփվելու կենտրոնի ներկայացուցիչների հետ, հարցեր տալու, ծանոթանալու ՏՏԿՀ գործունեությանը և մասնակցելու ինտերակտիվ խաղերի։ Խաղերի հաղթողները պարգևատրվեցին մրցանակներով, իսկ մասնակիցների ակտիվությունն ու հետաքրքրությունը տաղավարում ստեղծեցին ուրախ և ջերմ մթնոլորտ։
Տաղավարի ամենասիրելի անկյուններից մեկը դարձավ նաև ՏՏԿՀ հատուկ ֆոտոշրջանակը։ Էքսպոյի այցելուները հնարավորություն ունեցան լուսանկարվելու շրջանակով և իրենց մասնակցությունը դարձնելու օրվա հիշարժան պահերից մեկը։
Տաղավարի շուրջ ձևավորված անմիջական շփումը հնարավորություն տվեց կենտրոնի մասին խոսելու ոչ միայն տեղեկատվական նյութերի միջոցով, այլև անմիջական հաղորդակցության, խաղի և մասնակցության ձևաչափով։
Երբ կրթությունը հանդիպում է իրական հնարավորություններին
«ԲանՈՒԳործ․ ԵՊՀ էքսպո-2026»-ը միայն աշխատանքային հնարավորությունների ցուցահանդես չէր։
Այն հարթակ էր, որտեղ ուսանողները կարող էին պատկերացնել իրենց հաջորդ քայլը՝ համալսարանական կրթությունից դեպի մասնագիտական գործունեություն։
Էքսպոյի ընթացքում ներկայացվեցին տարբեր ոլորտների կազմակերպություններ, կրթական ստորաբաժանումների ծրագրեր և համալսարանական հնարավորություններ։ Մասնակիցները կարողացան հանդիպել ոլորտի ներկայացուցիչների, նոր ծանոթություններ հաստատել, հարցեր տալ և տեղեկանալ մասնագիտական զարգացման հնարավորությունների մասին։
Միջոցառման ծրագրում իր տեղն ուներ նաև մշակութային բաղադրիչը։ Այցելուները ծանոթացան ԵՊՀ Շառլ Ազնավուրի անվան մշակույթի կենտրոնի գործունեությանը, իսկ «YSU Band»-ի երաժշտական կատարումները լրացրին էքսպոյի աշխույժ ու տոնական մթնոլորտը։
Օրվա ընթացքում համալսարանական տարբեր ստորաբաժանումների, ուսանողների, շրջանավարտների և գործատուների միջև ձևավորված բազմաթիվ շփումները նոր գաղափարների, մասնագիտական կապերի և հետագա համագործակցության հնարավորություններ ստեղծեցին։
ՏՏԿՀ մասնակցությունը «ԲանՈՒԳործ․ ԵՊՀ էքսպո-2026»-ին ևս մեկ հնարավորություն էր կենտրոնի գործունեությունը ներկայացնելու համալսարանական լայն համայնքին, անմիջական կապ հաստատելու այցելուների հետ և ցույց տալու, որ կրթությունը ոչ միայն գիտելիք է, այլև նոր հնարավորությունների, մասնագիտական զարգացման և ապագա համագործակցությունների մեկնարկ։
