ԵՊՀ տեղեկատվական տեխնոլոգիաների կրթական և հետազոտական կենտրոնի (ՏՏԿՀ) համակազմակերպմամբ նոյեմբերի 2–4-ը ԵՊՀ-ում անցկացվեց «IEEE Արևելք-Արևմուտք նախագծման և թեստավորման սիմպոզիումը» («EWDTS 2026»), որը գիտական մեկ հարթակում միավորեց միկրոէլեկտրոնիկայի, էլեկտրոնային համակարգերի նախագծման և փորձարկման, տեղեկատվական տեխնոլոգիաների և հարակից ոլորտների հետազոտողներին ու մասնագետներին՝ գիտական արդյունքների ներկայացման, փորձի փոխանակման և մասնագիտական համագործակցության զարգացման նպատակով։
Գիտաժողովի հիմնադիրներից է Վլադիմիր Հահանովը, որի ներդրումը կարևոր դեր է ունեցել գիտաժողովի կայացման և զարգացման գործում։ Գիտաժողովի գլխավոր նախագահն էր Երվանդ Զորյանը։ Ծրագրային հանձնաժողովի համանախագահներն էին ՏՏԿՀ կենտրոնի գիտական ղեկավար, պրոֆեսոր Սամվել Շուքուրյանը և Անդրե Իվանովը (Կանադա), իսկ կազմակերպչական հանձնաժողովը ղեկավարում էր Եվգենիա Լիտվինովան։
Գիտաժողովի գիտական և ծրագրային հանձնաժողովներում ընդգրկված էին մասնագետներ Հայաստանից, ԱՄՆ-ից, Կանադայից, Իտալիայից, Էստոնիայից, Ռումինիայից, Իրանից, Լեհաստանից, Գերմանիայից, Նորվեգիայից և տարածաշրջանի երկրներից՝ ընդգծելով միջոցառման միջազգային ընդգրկումն ու գիտական համագործակցության նշանակությունը։
«EWDTS 2026»-ի գիտական ծրագիրն ընդգրկում էր ժամանակակից տեխնոլոգիական և ինժեներական հետազոտությունների բազմաթիվ ուղղություններ՝ միկրոէլեկտրոնային համակարգերի նախագծում և փորձարկում, համակարգերի հուսալիություն, ներկառուցված համակարգեր, իրերի համացանց (IoT), արհեստական բանականություն, մեքենայական ուսուցում, կիբեռանվտանգություն, ավտոմոբիլային էլեկտրոնիկա, ռոբոտատեխնիկա և ազդանշանների մշակում։
Գիտաժողովի ընթացքում ներկայացվեցին հետազոտություններ, որոնք վերաբերում էին ինչպես ապարատային և ծրագրային համակարգերի նախագծման ու օպտիմալացման խնդիրներին, այնպես էլ արհեստական բանականության կիրառությանը տարբեր ոլորտներում։
Մասնավորապես` զեկուցումների թեմաներից էին մեքենայական ուսուցման ալգորիթմների կիրառումը երթուղիների օպտիմալացման համար, «NVIDIA Jetson Orin NX» հարթակի միջոցով իրական ժամանակում օբյեկտների հետևումը, «RISC-V» ճարտարապետությամբ պրոցեսորների օպտիմալացումը, ինչպես նաև բժշկական տվյալների մշակման և վերլուծության նոր մոտեցումները։
Նոյեմբերի 4-ին տեղի ունեցան հիմնական բանախոսների (Keynote Speakers) ելույթները։ Նրանց թվում էին «Synopsys Armenia»-ի նախագահ Երվանդ Զորյանը, «Testonica» ընկերության գործադիր տնօրեն Արթուր Յուտմանը (Էստոնիա), «Worcester Polytechnic Institute»-ի պրոֆեսոր Զեյն Նավաբին (ԱՄՆ) և «IMEC»-ի ներկայացուցիչ Քաթայուն Բաշարխահը (Բելգիա)։
Բանախոսների զեկուցումները վերաբերում էին մեքենայական ուսուցման կիրառությանը էներգիայի կառավարման համակարգերում, հաջորդ սերնդի ավտոմոբիլային հաշվողական հարթակների նախագծմանը և ժամանակակից էլեկտրոնային համակարգերի զարգացման այլ արդիական խնդիրներին։
Գիտաժողովն անցկացվեց համակցված ձևաչափով՝ ներառելով ինչպես առկա, այնպես էլ առցանց մասնակցություն։ Գիտական նիստերն անցկացվեցին Երևանի պետական համալսարանում, «Dvin Music Hall»-ում և «Synopsys Armenia»-ի կրթական ստորաբաժանումում։
ՏՏԿՀ կենտրոնի մասնակցությունը «EWDTS 2026»-ի կազմակերպմանը կարևորում է Երևանի պետական համալսարանի ներգրավվածությունը միջազգային գիտական համագործակցության գործընթացներում և տեղեկատվական տեխնոլոգիաների ոլորտում հետազոտությունների զարգացման գործում։
«Նման գիտաժողովները շատ կարևոր են թե՛ ՏՏ ոլորտի մասնագետների, թե՛ ուսանողների համար, քանի որ հնարավորություն են տալիս տեղեկացված լինելու տեղեկատվական տեխնոլոգիաների ոլորտում մեծ տեմպերով ընթացող զարգացումներին և նորություններին»,- ընդգծել է ՏՏԿՀ կենտրոնի գիտական ղեկավար Սամվել Շուքուրյանը՝ հավելելով, որ նմանօրինակ գիտական միջոցառումները նպաստում են մասնագիտական կապերի ամրապնդմանը, գիտելիքի փոխանակմանը և հետազոտական նոր համագործակցությունների ձևավորմանը՝ միաժամանակ ընդլայնելով Հայաստանի գիտական համայնքի միջազգային ներկայությունը։
Գիտաժողովի գիտական ծրագրին և մանրամասներին հնարավոր է ծանոթանալ «EWDTS 2026» պաշտոնական կայքէջում։
