Տեղի է ունեցել բարձր տեխնոլոգիաների ոլորտում համաշխարհային ներդրման համար Հայաստանի Հանրապետության պետական մրցանակի հանձնման 15-րդ արարողությունը, որին ներկա էին ՀՀ վարչապետ Նիկոլ Փաշինյանը և նախագահ Վահագն Խաչատուրյանը, օրենսդիր և գործադիր իշխանությունների ներկայացուցիչներ, ՏՏ կրթական և հետազոտական կենտրոնի գիտական ղեկավար Սամվել Շուքուրյանը:
ՀՀ պետական մրցանակ է հանձնվել ճապոնացի գիտնական, «AIPLAB» կոնսորցիումի հիմնադիր, Արհեստական բանականության գործընկեր համակարգի «LOCOMTEC AIPS» լաբորատորիայի նախագահ Յոշիակի Դեյմոն Հագիվարային բարձր տեխնոլոգիաների ոլորտում համաշխարհային ներդրման համար:
Վերջինս շնորհակալություն է հայտնել իր գործունեությունն ըստ արժանվույն գնահատելու և Հայաստանի պետական մրցանակով պարգևատրելու համար: Անվանի գիտնականը կարևորել է բարձր տեխնոլոգիական ոլորտի զարգացումն ու կրթության բնագավառում ծրագրերի հետևողական իրականացումը:
Յոշիակի Դեյմոն Հագիվարան ավարտել է ԱՄՆ-ի Փասադենայի Կալիֆոռնիայի տեխնոլոգիական ինստիտուտը (Caltech)՝ 1975 թվականին ստանալով էլեկտրատեխնիկայի ոլորտում ֆիզիկայի մասնագիտացմամբ դոկտորի (PhD) կոչում: 1975-2008 թվականներին՝ «Sony»-ում աշխատելու ընթացքում, նա ներգրավվել է պատկերի սենսորների և թվային տեսախցիկի չիպ-սեթի, ինչպես նաև «ADC», «DRAM», բարձր արագությամբ «Cache SRAM» բուֆերային հիշողության չիպերի, միկրոկոնտրոլերների չիպերի ու իրական ժամանակի բարձր արտադրողականության պրոցեսորների մշակումներում։ 1992 թվականին եղել է «JEDEC» հիշողության ստանդարտացման կոմիտեի անդամ, ինչպես նաև Միջազգային ստանդարտների կոմիտեի («IEC») «IEC TC47» տեխնիկական հանձնաժողովի նախագահ։
Յոշիակի Դեյմոն Հագիվարան եղել է նաև Միջազգային ծրագրային կոմիտեի նախագահ և Գործառնական կոմիտեի անդամ «IEEE Electron Device Society»-ի («EDS») կողմից հովանավորվող «ICMTS» կոնֆերանսներում և «IEEE Solid State Circuits Society»-ի («SSCS») կողմից հովանավորվող «ISSCC» կոնֆերանսներում, որտեղ նա նաև շարունակաբար եղել է «IEEE ISSCC» Ասիական կոմիտեի նախագահ և «ISSCC» Միջազգային տեխնիկական ծրագրերի («International Technical Program» («ITC»)) ղեկավար:
Նշանավոր գիտնականը եղել է Կալիֆոռնիայի տեխնոլոգիական ինստիտուտի էլեկտրատեխնիկայի և կիրառական ֆիզիկայի դեպարտամենտների հրավիրյալ պրոֆեսոր, Ճապոնիայի Կիրյու քաղաքի Գունմա համալսարանի էլեկտրատեխնիկայի դեպարտամենտի հրավիրյալ պրոֆեսոր, աշխատել է որպես Ճապոնիայի Կյուշու կղզու Կումամոտո քաղաքի Սոջո համալսարանի տեղեկատվական գիտության և տեխնոլոգիայի դեպարտամենտի լրիվ դրույքով պրոֆեսոր և ներկայումս հատուկ նշանակված պրոֆեսոր է Սոջո համալսարանի նախագահի գրասենյակում։
2008 թվականին հիմնադրել է «AIPLAB» կոնսորցիումը և աշխատել որպես Արհեստական բանականության գործընկեր համակարգի («AIPS») լաբորատորիայի նախագահ։ Մինչ օրս նախագահում է Ճապոնիայի Ածուգի քաղաքում գործող «LOCOMTEC AIPS» լաբորատորիան, որը զբաղվում է «AI Robot Clean Energy SDGs» (մաքուր էներգիայի և կայուն զարգացման նպատակներին ուղղված արհեստական բանականությամբ ռոբոտների) համակարգային լուծումների մշակմամբ։ Գիտնականը եղել է Կիսահաղորդչային արդյունաբերության մասնագետների միության («SSIS») կրթական հանձնաժողովի նախագահ և մինչ օրս շարունակում է իր գործունեությունը որպես անդամ։ Նա Կալիֆոռնիայի տեխնոլոգիական ինստիտուտի պատվավոր շրջանավարտ է, «AAIA» անդամ, «IEEE» («IEEE Life Fellow») մշտական անդամ, «IEEE EDS», «IEEE SSCS», «IEEE CS», «IEEE» գերհաղորդականության խորհրդի, «IEEE» նանոտեխնոլոգիայի խորհրդի, «IEEE» սենսորների խորհրդի և «IEEE» համակարգերի խորհրդի անդամ:
