ԵՊՀ շրջանավարտների և կարիերայի կենտրոնի ու «Magnus HR» ընկերության հերթական համագործակցության արդյունքում անցկացվեց «Ինչպե՞ս կառուցել հաջող կարիերա» թեմայով հանդիպում՝ նպատակ ունենալով խթանելու կարիերայի առաջընթացին վերաբերող ուսանողների գիտելիքներն ու զարգացնելու ժամանակակից աշխատաշուկայում ներկայանալու հմտությունները։
Մասնագիտական զարգացմանն ուղղված հանդիպման ընթացքում ընկերության ներկայացուցիչ, խոսնակ Էլիզ Մելքոնյանը ներկայացրեց գործնական նշանակություն ունեցող դասախոսություն՝ կենտրոնանալով LinkedIn հարթակի արդյունավետ կիրառման ու հարցազրույցներին նախապատրաստվելու ռազմավարությունների վրա։
Նա ընդգծեց, որ ժամանակակից աշխատաշուկայում մասնագիտական հաջողությունը մեծապես պայմանավորված է ինքնաներկայացման կարողությամբ։ Այդ համատեքստում LinkedIn-ը դիտարկվում է որպես թվային այցեքարտ, որը հնարավորություն է տալիս ոչ միայն ներկայացնելու մասնագիտական փորձառությունն ու հմտությունները, այլև հաստատելու կապեր, ընդլայնելու մասնագիտական գիտելիքների շրջանակը և հետաքրքրելու գործատուներին։ «Ժամանակակից աշխարհում LinkedIn-ը աշխատաշուկայում ձեր այցեքարտն է, իսկ հարցազրույցները՝ կարիերայի նոր հնարավորությունների դռները»,- ընդգծեց բանախոսը։
Միջոցառման ընթացքում մասնակիցները իմացան, թե ինչպես կարող են LinkedIn-ը ճիշտ օգտագործել մասնագիտական տեսանելիությունն ուժեղացնելու համար, ստացան հարցազրույցին նախապատրաստվելու գործնական խորհուրդներ՝ գործատուի ուշադրությունը գրավելու համար, զարգացրին ինքնաներկայացման հմտությունները՝ ուժեղ կողմերն արդյունավետ ներկայացնելու համար։
Հանդիպման վերջում մասնակիցները հնարավորություն ունեցան բանախոսին ուղղելու իրենց հարցերը և քննարկելու ոլորտում առկա խնդիրները։ Էլիզ Մելքոնյանը պատասխանեց ուսանողների հարցերին՝ պրակտիկ օրինակներով վերլուծելով կոնկրետ իրավիճակներ։ Հանդիպումը ոչ միայն տեղեկատվական էր, այլև ոգեշնչող ու փոխգործակցային։
