«Փիլիսոփայությունը և արդի մարտահրավերները։ Մարդը գոյաբանական ծուղակում» միջազգային գիտաժողովի
(ԵՊՀ, Հայաստան, 20-22-ը նոյեմբերի, 2025 թ.) ուղերձը փիլիսոփայության ոլորտի գործընկերներին,
ակադեմիական հաստատություններին, գիտակրթական կենտրոններին, միջազգային կազմակերպություններին
21-րդ դարի մարդուն և քաղաքակրթական միջավայրի գոյությանը սպառնացող խնդիրների շարքը չի կրճատվում։ Փոխվում են դրանց բնույթն ու մասշտաբները։
Պատմական գործընթացների արագացման մեր ժամանակներում նորանոր մարտահրավերներ են հառնում մարդու և հասարակության առջև.
Քաղաքակրթական արժեքներին ու մարդկության գոյությանը սպառնացող համաշխարհային պատերազմի՝ հետզհետե ավելի իրատեսական դարձող վտանգ
Ֆինանսատնտեսական համակարգի համաշխարհային ճգնաժամեր, պարենային անբավարարություն
Համաճարակներ, սով, աղքատություն, սոցիալական անարդարություն
Մարդու առողջությանն ու գոյությանը սպառնացող էկոլոգիական խնդիրներ՝ հետզհետե ավելի ու ավելի սրվող
Մարդկության դեմ ուղղված հանցագործություններ, բռնի տեղահանություններ, ցեղասպան ծրագրեր ու գործողություններ
Բարոյական, արժեքային համակարգերի ձևախեղում
Արհեստական բանականության համակարգերի և տեղեկատվական տեխնոլոգիաների բուռն զարգացման հետ կապված բարոյագիտական, իրավական, արժեքաբանական համակարգերի վերանայման և զարգացման խնդիրներ
Այս խնդիրների հաղթահարման ու լուծման գլխավոր բանալին մարդու վերափոխման, նրա գիտակցության, հոգևոր-արժեքային, աշխարհայացքային համակարգերի զարգացման, կրթական համակարգերի ոչ այնքան ձևական-կառուցվածքային, որքան բովանդակային բարեփոխման մեջ է։ Քանզի մարդկության ապագան մեծապես պայմանվորված է կրթական համակարգերի ներկայիս գործունեությամբ։
Այդ առումով էական նշանակություն է ստանում վերոգրյալ խնդիրների փիլիսոփայական վերաիմաստավորումը, հանրային ու մասնագիտական քննարկումների դաշտում դրանց արդյունավետ լուծումների ուրվագծումը։
Էապես կարևոր է ազգային կրթական միջավայրերում համամարդկային բարոյական ու գաղափարական արժեքներ արմատավորող համադրելի կրթական համակարգերի ձևավորումը, խրախուսումն ու զարգացումը։
21-րդ դարի հանրությանը սպառնացող մարտահրավերների ու ծուղակների հաղթահարման առանցքային երաշխիքներից մեկն էլ պետք է լինի փիլիսոփայական գիտելիքի զարգացման, կրթական ծրագրերում փիլիսոփայական, բարոյագիտական գիտակարգերի՝ իբրև պարտադիր բաղադրիչների ավելացման, մատուցվող ծրագրերն ու գիտելիքը հումանիստական, մարդակենտրոն գաղափարների ու արժեքների շուրջ ձևավորելու քաղաքականությունը։
