Երևանի պետական համալսարանի մանկավարժության և կրթության զարգացման կենտրոնում (ՄԿԶԿ) տեղի է ունեցել իրազեկման հանդիպում՝ նվիրված «Էրազմուս+» ծրագրի շրջանակում իրականացվող «T4GREEN» նախագծին, «կանաչ» կրթության արդի հիմնախնդիրներին և Հայաստանում առաջիկայում կայանալիք COP17 գլոբալ բնապահպանական գագաթնաժողովին։
Հանդիպումը վարել է մանկավարժական գիտությունների թեկնածու, դոցենտ Լ. Հայրապետյանը։ Միջոցառմանը մասնակցել են մանկավարժի հավաստագրման եռամսյա վերապատրաստման դասընթացների (մանկավարժահոգեբանական 30 կրեդիտին համարժեք մոդուլներով իրականացվող) ուսանողները, որոնք պատրաստվում են մասնագիտական գործունեություն ծավալելու հանրակրթության ոլորտում։
Հանդիպման ընթացքում Լ. Հայրապետյանն ընդգծել է, որ ժամանակակից աշխարհում մանկավարժ մասնագետների պատրաստման գործընթացում կարևոր նշանակություն ունեն բնապահպանական գիտակցության ձևավորումն ու կայուն զարգացման արժեքների սերմանումը։
«T4GREEN» նախագծի համատեքստում ներկայացվել են «կանաչ» կրթության հայեցակարգային մոտեցումները, ապագա ուսուցիչների «կանաչ» կարողունակությունների («green skills») զարգացման ուղիները, ինչպես նաև կրթական ծրագրերում դրանց ինտեգրման գործնական մեթոդները։
Առանձնահատուկ անդրադարձ է կատարվել Հայաստանում առաջիկայում կայանալիք COP17 համաժողովին, դրա նշանակությանն ու ընձեռած հնարավորություններին։ Կարևորվել է նաև կրթության դերը բնապահպանական մարտահրավերներին դիմակայելու և կայուն զարգացման սկզբունքների տարածման գործում։
Հանդիպումն անցել է ակտիվ քննարկումների մթնոլորտում։ Ապագա մանկավարժները բարձր են գնահատել ներկայացված տեղեկությունը, ուղղել իրենց հետաքրքրող հարցերը և կարևորել «կանաչ» մանկավարժության սկզբունքների կիրառումը հանրակրթական դպրոցներում։
Նմանօրինակ նախաձեռնությունները նպաստում են ապագա ուսուցիչների բնապահպանական գիտակցության և մասնագիտական կարողունակությունների զարգացմանը՝ խթանելով «կանաչ» կրթության սկզբունքների ներառումը կրթական գործընթացում։
