ԵՊՀ եվրոպական լեզուների և հաղորդակցության (ԵԼՀ) ֆակուլտետում հանդիսավորությամբ անցկացվեց առաջինկուրսեցիների դիմավորման և իրազեկման միջոցառումը, որի ընթացքում նրանց ներկայացվեցին ֆակուլտետի կառուցվածքին, ուսումնական գործընթացին, կրթական ծրագրերին և այլ անհրաժեշտ հարցերի վերաբերյալ տեղեկություններ:
Նոր ուսումնական տարվա և ԵՊՀ ընդունվելու առթիվ առաջինկուրսեցիներին շնորհավորեցին ԵԼՀ ֆակուլտետի դեկանը, պրոֆեսորադասախոսական կազմի ներկայացուցիչներ՝ անդրադառնալով ֆակուլտետի գործունեությանը, կրթական հնարավորություններին ու համալսարանական կյանքի առանձնահատկություններին:
Ուսանողները ծանոթացան ֆակուլտետի պատմությանը, ավանդույթներին, կրթական առաքելությանը և զարգացման հիմնական ուղղություններին։ Ներկայացվեց նաև ակադեմիական ու մասնագիտական այն ճանապարհը, որն առաջիկա տարիներին անցնելու են առաջինկուրսեցիները՝ ձեռք բերելով մասնագիտական գիտելիքներ, զարգացնելով լեզվական և հաղորդակցական կարողություններ ու ձևավորելով իրենց մասնագիտական անհատականությունը։
Ֆակուլտետի ներկայացուցիչները կարևորեցին ուսանողների ակտիվ ներգրավվածությունը համալսարանական կյանքում՝ ընդգծելով, որ ԵՊՀ-ում կրթությունը միայն լսարանում տրվող գիտելիքը չէ։ Ուսանողական տարիները, նոր գիտելիքների ու հմտությունների ձեռքբերմանը զուգահեռ, նաև ինքնաճանաչման, նոր ընկերություններ ստեղծելու, նախաձեռնություններում ներգրավվելու և ապագա մասնագիտական ուղին ձևավորելու կարևոր փուլ են։
ԵԼՀ ֆակուլտետի դեկանի ժամանակավոր պաշտոնակատար Մարինե Յաղուբյանը, շնորհավորելով առաջինկուրսեցիներին, կարևորեց նրանց ընտրած մասնագիտության դերը՝ նշելով, որ այն պահանջում է նվիրվածություն, աշխատասիրություն, հետաքրքրասիրություն և մշտապես սովորելու ու զարգանալու պատրաստակամություն։ Նա միաժամանակ հորդորեց ուսանողներին չվախենալ դժվարություններից, հավատալ սեփական ուժերին, լինել նախաձեռնող և միշտ երազել։
«Այսօր դուք կանգնած եք նոր ճանապարհի շեմին, որը լի է նոր գիտելիքներով, հետաքրքիր բացահայտումներով, ձեռքբերումներով և, անշուշտ, նաև նոր փորձություններով,- դիմելով ուսանողներին՝ ընդգծեց նա:- Ձեր առջև բացվում է մի կարևոր շրջան, որի ընթացքում դուք ոչ միայն ձեռք եք բերելու մասնագիտական գիտելիքներ, այլև բացահայտելու եք սեփական կարողությունները, զարգացնելու եք ձեր հմտություններն ու կառուցելու եք ձեր ապագան»։
Ֆակուլտետի պատասխանատուն նաև վստահեցրեց, որ ԵՊՀ-ում ուսանողները հնարավորություն ունեն ստանալու բարձրորակ կրթություն, զարգացնելու ստեղծագործական միտքը, հաղորդակցական հմտությունները, մասնագիտական ներուժը, ինչպես նաև դառնալու ֆակուլտետի հարուստ ավանդույթների շարունակողն ու նոր գաղափարների կրողը։
Նա առաջինկուրսեցիներին մաղթեց, որ ուսանողական տարիները լինեն հետաքրքիր, բովանդակալից և հիշարժան, իսկ ստացած նոր գիտելիքները, ձեռքբերումները և հաղթահարված դժվարությունները նպաստեն նրանց հասնելու նպատակներին ու երազանքների իրականացմանը:
