ԵՊՀ հայոց պատմության ամբիոնի դոցենտ, պ․գ․թ․ Միքայել Մալխասյանը ս․թ․ սեպտեմբերի 9-13-ը մասնակցել է Բոլոնիայի համալսարանում (Իտալիա) կազմակերպված Պատմական ժողովրդագրության եվրոպական ընկերության (ՊԺԵԸ) վեցերորդ համաժողովին և երկու տարին մեկ գումարվող միջազգային գիտաժողովին։
Սա առաջին դեպքն էր, երբ Երևանի պետական համալսարանը և առհասարակ Հայաստանի Հանրապետությունը ներկայացված էին այս հեղինակավոր գիտական հարթակում։
Համաժողովի նորարարական մեթոդներին նվիրված բաժանմունքի նիստում Մ․ Մալխասյանը հանդես է եկել բանավոր զեկուցմամբ։ Գիտաժողովը հնարավորություն տվեց միջազգային մասնագետների հետ փորձի փոխանակման ու նոր գիտական կապերի ստեղծման։
Նույն օրը տեղի ունեցած ՊԺԵԸ-ի համագումարի նիստը բացառիկ հնարավորություն էր մասնակիցների համար անմիջապես ծանոթանալու կառույցի ընթացիկ գործունեությանն և հեռանկարային ծրագրերին։
Մ․ Մալխասյանը կարևորեց պատմական ժողովրդագրության հիմնադիրներից մեկի՝ պրոֆեսոր Մասիմո Լիվի Բաչիի դասախոսությունը։ Վերջինիս հետ ունեցած անձնական զրույցի ընթացքում քննարկվել են հայոց պատմական ժողովրդագրության առանձնահատկությունները՝ համադրելով դրանք եվրոպական փորձի հետ։ ԵՊՀ դոցենտը ընդգծեց, որ Լիվի Բաչիի ուսումնասիրությունները դեռ ուսանողական տարիներից ուղենիշային են եղել իր գիտական ուղու ձևավորման գործում։
Մասնակցությունը համաժողովին կարևոր նախադրյալ է ԵՊՀ-ի և հայկական պատմական ժողովրդագրության հետագա ինտեգրմանը եվրոպական ակադեմիական միջավայրին։
Նշենք, որ Միքայել Մալխասյանի մասնակցությունը համաժողովին հնարավոր է դարձել «Հ. Հովնանյան» ընտանեկան հիմնադրամի աջակցությամբ։
