Ս.թ. դեկտեմբերի 2-ին Պատմության ֆակուլտետում «Կոնրադ Ադենաուեր» հիմնադրամի (KAS) կրթաթոշակառուների մասնակցությամբ տեղի ունեցավ գիտակրթական հանդիպում։ Միջոցառման շրջանակում ԵՊՀ համաշխարհային պատմության ամբիոնի դասախոս Հրաչ Բայադյանը ներկայացրեց դասախոսություն՝ նվիրված ռուսական կայսերական ժառանգության դերին և Հայաստանի պատմական ու մշակութային միջավայրում դրա բազմաշերտ դրսևորումներին։
Բանախոսն անդրադարձավ ռուսական և խորհրդային գաղութային քաղաքականության առանձնահատկություններին՝ ընդգծելով, որ վերջին 200 տարիների ընթացքում այդ քաղաքականությունը տարբեր տարածաշրջաններում միատեսակ չի եղել։ Այն զգալիորեն տարբերվել է Արևելյան Եվրոպայից և Բալթյան երկրներից մինչև Անդրկովկաս և Միջին Ասիա, իսկ դինամիկան կախված է եղել ժամանակաշրջանի կուսակցական, գաղափարական և աշխարհաքաղաքական ուղղություններից։
Հ․ Բայադյանն ընդգծեց, որ վերջին տարիներին Ռուսաստանը, վկայակոչելով խորհրդային կայսերական անցյալը, փորձում է վերականգնել մեծ տերության դիրքերը և վերահաստատել ազդեցությունը նախկին խորհրդային հանրապետությունների նկատմամբ։ Միևնույն ժամանակ հատկապես Հայաստանի համատեքստում ձևավորվել է նոր իրավիճակ․ պահպանելով քաղաքական և տնտեսական լուրջ ազդեցությունը՝ Ռուսաստանը զգալիորեն կորցրել է իր մշակութային հեղինակությունն ու «քաղաքակրթական առաքելության» շուրջ ձևավորված ավանդական ընկալումները։ Բանախոսը նշեց, որ Ուկրաինայում շարունակվող պատերազմը և դրա արդյունքում Ռուսաստանի նկատմամբ կիրառված միջազգային պատժամիջոցները զգալիորեն սահմանափակել են նրա ազդեցությունը տարածաշրջանի մի շարք երկրների, այդ թվում՝ Հայաստանի վրա։
Դասախոսության կարևոր շեշտադրումներից մեկը վերաբերում էր մշակութային գաղութացման խնդրին։ Ըստ Հ․ Բայադյանի՝ Հայաստանի ներկայիս մշակութային կախվածությունը պայմանավորված չէ ժամանակակից Ռուսաստանի ազդեցությամբ։ Այն հիմնականում գալիս է խորհրդահայ մշակութային ժառանգությունից, որը ձևավորվել է խորհրդային գաղափարախոսության միջավայրում և խորապես ներառել է ռուսական մշակույթի տարրեր։
Միջոցառումը կարևոր հնարավորություն էր ծրագրի կրթաթոշակառուների համար՝ խորացնելու իրենց գիտելիքները տարածաշրջանում պատմական գործընթացների և դրանց ժամանակակից դրսևորումների վերաբերյալ։
