ԵՊՀ մշակութաբանության ամբիոնի վարիչ, «Մշակութաբանություն» բակալավրի ծրագրի ղեկավար, պ․գ․դ․, պրոֆեսոր Համլետ Պետրոսյանը և նույն ամբիոնի պրոֆեսոր, ճ․գ․դ․ Լյուբա Կիրակոսյանը բուհ-դպրոց համագործակցության շրջանակում այցելեցին Արարատի մարզի Հնաբերդ և Քաղցրաշեն համայնքների միջնակարգ դպրոցներ։
Հանդիպման ընթացքում աշակերտներին ներկայացվեցին ամբիոնի կրթական և հետազոտական գործունեության հիմնական ուղղությունները, ինչպես նաև ոլորտում մասնագիտական զարգացման հնարավորությունները։
Պրոֆեսոր Համլետ Պետրոսյանը աշակերտներին ներկայացրեց «Մշակութաբանություն» կրթական ծրագրի բովանդակությունն ու կարևորությունը՝ նշելով, որ ծրագիրը նպատակ ունի ձևավորելու մշակույթի տեսության և պատմության, մշակութային քաղաքականության և ժամանակակից մշակութային գործընթացների ոլորտների մասնագետներ։
Բանախոսների խոսքով՝ ծրագրի շրջանակում մասնագիտական ուսուցումն իրականացվում է հետևյալ հիմնական ուղղություններով՝ մշակույթի տեսություն, մշակույթի պատմություն և քաղաքականություն, ժամանակակից մշակութային գործընթացներ։ Ընդգծվեց, որ ծրագրում ներառված են այնպիսի կարևոր ուղղություններ, ինչպիսիք են մարդաբանությունը, մշակույթի փիլիսոփայությունը, հնագիտությունը, ազգագրությունը, ինչպես նաև համաշխարհային և հայ մշակույթի պատմությունը։
Անդրադառնալով ուսումնառության արդյունքներին՝ կրթական ծրագրի ղեկավարը նշեց, որ շրջանավարտները ձեռք են բերում մշակույթի տեսական վերլուծության, պատմական համատեքստում մշակութային երևույթների գնահատման, ինչպես նաև մշակութաբանական հետազոտությունների իրականացման կարողություններ։ Նրա խոսքով՝ ուսանողները նաև ծանոթանում են մշակութային քաղաքականության սկզբունքներին, կառավարման մեխանիզմներին և մշակութային ժառանգության պահպանման ու հանրահռչակման գործիքներին։
Հ․ Պետրոսյանն ընդգծեց, որ ծրագրի շրջանավարտները կարող են գործունեություն ծավալել պետական կառավարման համակարգում, գիտահետազոտական հաստատություններում, թանգարաններում, մշակութային կենտրոններում, զբոսաշրջային կազմակերպություններում, ինչպես նաև հասարակական և միջազգային կառույցներում։
Հավելենք, որ հանդիպումների շրջանակում ձեռք է բերվել պայմանավորվածություն՝ դպրոցներում «Պատանի մշակութաբանի» խմբեր ստեղծելու վերաբերյալ: Դրանք Մշակութաբանության ամբիոնի աջակցությամբ կանդրադառնան իրենց համայնքների մշակութային ժառանգության ուսումնասիրությանն ու հանրահռչակմանը։
