Մայիսի 16-ին մեկնարկած «Թանգարանների գիշեր» համաեվրոպական միջոցառումը Երևանում և մարզերում կրկին համախմբեց հազարավոր մշակութասերների: Արդեն երկրորդ տարին անընդմեջ տարեցտարի ընդլայնվող այս տոնին իրենց մասնակցությունն ունեցան ԵՊՀ պատմության ֆակուլտետի 42 կամավոր ուսանողներ՝ ստանձնելով այցելուների և պատմամշակութային ժառանգության միջև հաղորդակցության կամուրջ դառնալու առաքելությունը:
Ամենամյա այս իրադարձությունը կարևոր հարթակ է հասարակության մշակութային գիտակցության բարձրացման, ինչպես նաև թանգարանները որպես կենդանի գիտակրթական միջավայրեր վերաիմաստավորելու գործում: Միջոցառման շրջանակում անցկացվող թեմատիկ ցուցադրությունները, ինտերակտիվ ծրագրերն ու մասնագիտական հանդիպումները ոչ միայն հանրայնացնում են մշակութային արժեքները, այլև ընդլայնում հանրային մասնակցության շրջանակները:
ԵՊՀ պատմության ֆակուլտետը շարունակաբար կարևորում է թանգարանագիտության և թանգարանային գործի ուսումնառությունը՝ տեսական կրթությունը համադրելով գործնական փորձառության հետ։ Ուսանողների ներգրավվածությունը նման նախաձեռնություններում հնարավորություն է տալիս նրանց ձեռք բերելու մասնագիտական նոր հմտություններ, ծանոթանալու թանգարանային աշխատանքի առանձնահատկություններին և ամրապնդելու բուհ–թանգարան համագործակցությունը։
Այս տարի «Թանգարանների գիշեր» միջոցառման շրջանակում ԵՊՀ պատմության ֆակուլտետի ուսանողներն ակտիվորեն ներգրավվել են հանրապետության մի շարք հեղինակավոր թանգարանների աշխատանքներում: Կամավորական առաքելությամբ համալսարանականներն իրենց աջակցությունն են բերել Հայաստանի պատմության թանգարանին, Մատենադարանին, «Էրեբունի» պատմահնագիտական արգելոց-թանգարանին, Ավետիք Իսահակյանի և Արամ Խաչատրյանի տուն-թանգարաններին, Գաֆէսճեան թանգարան-հիմնադրամին, Երևանի պատմության և Երևանի ժամանակակից արվեստի թանգարաններին, Հայաստանի գինու պատմության թանգարանին ու Օրբելի եղբայրների թանգարանին:
Հայաստանի պատմության թանգարանի կամավոր Ֆենյա Լազարյանը նշում է, որ «Թանգարանների գիշեր» միջոցառման շրջանակում թանգարանում կամավորական աշխատանքը միաժամանակ եղել է և՛ ոգևորիչ, և՛ մեծ պատասխանատվություն պահանջող փորձառություն։ Նրա խոսքով՝ այցելուների մեծ հոսքի պայմաններում ուսանողները հնարավորություն են ունեցել համալսարանում ստացած տեսական գիտելիքները կիրառելու իրական թանգարանային միջավայրում, ինչը կարևոր մասնագիտական փորձ է դարձել յուրաքանչյուրի համար։ Նա ընդգծում է նաև, որ միջոցառումը հնարավորություն է տվել ներսից զգալու թանգարանի աշխատանքային մթնոլորտը, ինչպես նաև գործնականում ծանոթանալու մշակութային հաղորդակցության առանձնահատկություններին, թանգարանի ներքին կանոնակարգին և մասնագիտական էթիկայի սկզբունքներին։
Ուսանողներն աջակցել են այցելուների ընդունելությանը, ցուցադրությունների մեկնաբանությանը, էքսկուրսիաներ անցկացնելուն, ինչպես նաև կազմակերպական այլ հարցերում։ Թանգարանների ներկայացուցիչների դրական արձագանքները փաստում են, որ նրանց ակտիվ և պատասխանատու մասնակցությունը մեծապես նպաստել է միջոցառման հաջողությանը և արդյունավետ անցկացմանը։
