Համաշխարհային պատմություն

«Համաշխարհային պատմություն» մագիստրոսական ծրագիրը մշակված է հիմնախնդրային (inquiry-based) և փոխկապակցված պատմության (connected history) հարացույցով։ Ուսումնառության առանցքային նպատակը մասնագիտական արդի մեթոդաբանության կիրառմամբ գլոբալ պատմական գործընթացների իմաստավորումն ու սկզբնաղբյուրների քննադատական մեկնաբանությունն է։ 

Ուսումնական ծրագիրը բաղկացած է երեք հիմնական բաղադրիչից՝ ընդհանուր, մասնագիտական և մասնագիտացման։ 

• Ընդհանուր կրթամաս. ապահովում է մագիստրոսի աստիճանի համար անհրաժեշտ հիմնարար ակադեմիական գիտելիքներ՝ շեշտադրելով ակադեմիական գրագրությունը, հետազոտական հմտություններն ու քննադատական մտածողությունը։

• Մասնագիտական կրթամաս․ տրամադրում է համաշխարհային պատմության տեսական ու մեթոդաբանական գիտելիքներ՝ ընդգրկելով ժամանակակից պատմագիտական մոտեցումները և միջգիտակարգային  վերլուծությունը։

• Մասնագիտացման կրթամաս․ հնարավորություն է ընձեռում խորանալու նեղ հետազոտական ոլորտներում (օրինակ՝ գլոբալ ցանցեր և միգրացիա, կայսրությունների և գաղութատիրության պատմություն, աշխարհաքաղաքականություն և միջազգային հակամարտություններ, սոցիալական պատմություն, ինչպես նաև տեխնոլոգիաների պատմություն)՝ պարտադիր և կամընտրական դասընթացների միջոցով ապահովելով ուսանողի անհատական կրթական հետագիծը:

Ծրագիրը համադրում է տեսական ուսուցումն ու հետազոտական աշխատանքը (ներառյալ արխիվային նյութերի քննությունն ու միջառարկայական վերլուծությունը)՝ ապահովելով շրջանավարտների մասնագիտական պատրաստվածությունը ժամանակակից գիտական, փորձագիտական և մանկավարժական գործունեության համար:

Ընդունելության պահանջները 

«Համաշխարհային պատմություն» մասնագիտության շրջանակում մագիստրատուրայի ընդունելությունն անցկացվում է՝ համաձայն «ԵՊՀ մագիստրատուրայի (առկա և հեռակա ուսուցման ձևերով) ընդունելության կարգ»-ի պահանջների:

Մանրամասները՝ «Ընդունելություն» բաժնում:

Ծրագրի նպատակը

Ծրագրի նպատակն է պատրաստել մրցունակ հետազոտող-վերլուծաբանների, որոնք ունակ են պատմական գործընթացները դիտարկելու գլոբալ և միջգիտակարգային համատեքստերում։

Ուսումնառության ավարտին շրջանավարտը ձեռք կբերի հետևյալ կիրառական կարողությունները.

• Հետազոտական հմտություններ. կատարել գիտական հետազոտություններ՝ կիրառելով տեղական և միջազգային արխիվային նյութերի ու սկզբնաղբյուրների քննադատական վերլուծություն։

• Վերլուծական կարողություններ. քննել ու մեկնաբանել արդի աշխարհաքաղաքական և գլոբալ գործընթացները՝ դրանք դիտարկելով պատմական լայն համատեքստում։

• Նախագծերի կառավարում. մշակել և ղեկավարել պատմամշակութային, գիտական և կրթական նախագծեր։

• Ակադեմիական հաղորդակցություն. տիրապետել ակադեմիական հաղորդակցության հմտություններին՝ միջազգային գիտական հարթակներում հանդես գալու և հոդվածներ հրապարակելու նպատակով։

Առավելությունները 

ԵՊՀ «Համաշխարհային պատմություն» մագիստրոսական ծրագիրն ընձեռում է ակադեմիական և մասնագիտական զարգացման առանձնահատուկ հնարավորություններ.

• Հետազոտական բազա և ակադեմիական ռեսուրսներ. ուսանողներն օգտվում են ԵՊՀ և ՀՀ ԳԱԱ արխիվներից ու գրադարաններից, ինչպես նաև միջազգային էլեկտրոնային շտեմարաններից (JSTOR, EBSCO, Cambridge Core)։

• Ակադեմիական շարժունություն․ «Էրազմուս+» փոխանակման ծրագրերով ուսանողները հնարավորություն ունեն մեկ կիսամյակ ուսումնառելու գործընկեր եվրոպական համալսարաններում՝ համադրելով ուսումը արտագնա հետազոտական աշխատանքի հետ։

• Պրոֆեսորադասախոսական կազմ․ դասընթացները վարում են ակտիվ հետազոտողներ, ՀՀ այլ բուհերի հրավիրյալ դասախոսներ ու վերլուծաբաններ: Տեսական և գործնական գիտելիքների համադրման նպատակով ներգրավվում են նաև արտերկրի մասնագետներ, դիվանագետներ և հանրային հատվածի փորձագետներ: 

• Կիրառական նախագծեր և հանրային պատմություն․ լսարանային տեսական ուսուցումը զուգակցվում է գիտական սեմինարներով, արխիվային պրակտիկայով և կիրառական նախագծերի մշակմամբ։

Կարիերայի հնարավորություններ 

Ծրագրի շրջանավարտները հնարավորություն ունեն իրենց մասնագիտական գործունեությունը ծավալելու մի շարք ոլորտներում.

• Գիտական և ակադեմիական համակարգ. ՀՀ ԳԱԱ պատմության և արևելագիտության ինստիտուտներ, վերլուծական կենտրոններ, համալսարանական հետազոտական լաբորատորիաներ:

• Կրթական ոլորտ. հանրապետության հենակետային և ավագ դպրոցներ, կրթական նախագծերի մշակում ու կառավարում:

• Պետական կառավարում և դիվանագիտություն. ՀՀ արտաքին գործերի, պաշտպանության, ԿԳՄՍ նախարարություններ և Ազգային ժողով:

• Միջազգային կառույցներ և հասարակական հատված. ՄԱԿ-ի հայաստանյան գրասենյակներ, միջազգային զարգացման կազմակերպություններ, մարդու իրավունքների պաշտպանության հիմնադրամներ:

• Մեդիա և մշակութային ժառանգություն. լրատվամիջոցների վերլուծական բաժիններ, թանգարաններ և արխիվներ: