ԵՊՀ միջազգային հարաբերությունների ֆակուլտետում տեղի ունեցավ հանդիպում ավագ դպրոցների աշակերտների հետ, որի ընթացքում ապագա դիմորդները ծանոթացան ֆակուլտետի կրթական ծրագրերին, ուսուցման մեթոդներին և մասնագիտական աշխատանքի հնարավորություններին: Հանդիպումը կազմակերպվել էր ԵՊՀ ընդունելության և դիմորդների հետ տարվող աշխատանքների կենտրոնի նախաձեռնած շարունակական այցելությունների կազմակերպման շրջանակում։
Ֆակուլտետի դեկան, պ.գ.թ., դոցենտ Տիգրան Եփրեմյանը ջերմորեն ողջունեց ներկաներին՝ ընդգծելով ֆակուլտետի առաքելությունը, միջազգային հարթակներում ուսանողների պատրաստվածության կարևորությունը և ուսանողական նախաձեռնությունների խրախուսումը: Դեկանը խոսեց ակադեմիական միջավայրի բարձր չափանիշների, ուսանողական ակտիվության և մասնագիտական աճի հնարավորությունների մասին, ինչն ապահովում է ուսանողների լիարժեք զարգացման համար անհրաժեշտ հենքը:
Հանդիպմանը մասնակցում էին Միջազգային հարաբերությունների ֆակուլտետի պրոֆեսորադասախոսական համակազմի ներկայացուցիչները։ Ֆակուլտետի գրասենյակի ղեկավար, ք.գ.թ. Գոռ Պետրոսյանը, Դիվանագիտական ծառայության և մասնագիտական հաղորդակցման ամբիոնի վարիչ, դոցենտ Սյուզաննա Նավասարդյանը, Միջազգային հարաբերությունների և դիվանագիտության ամբիոնի վարիչ, դոցենտ Ժակ Մանուկյանը, Քաղաքագիտության ամբիոնի պրոֆեսոր Աշոտ Ենգոյանը և Հանրային կառավարման ամբիոնի դասախոս Նարինե Ասրյանը ուսանողներին ներկայացրին ֆակուլտետում գործող կրթական ծրագրերը՝ անդրադառնալով դասընթացների կառուցվածքին, ուսումնառության մեթոդներին և հետազոտական նախաձեռնություններին մասնակցելու հնարավորություններին: Բանախոսներն աշակերտներին տեղեկացրին մասնագիտական հմտությունների զարգացման, ուսանողական նախաձեռնություններին մասնակցության և միջազգային համագործակցության հարթակների մասին: Ապագա դիմորդներն ակտիվորեն հետաքրքրվեցին ընդունելության ընթացակարգերով, դասընթացների բովանդակությամբ և հետազոտական նախագծերում իրենց հնարավոր ներգրավվածությամբ:
Հանդիպումը կազմակերպվել էր ֆակուլտետի կրթական ծրագրերը, դրանց հնարավորություններն ու առավելությունները մասնակից աշակերտներին ներկայացնելու, ինչպես նաև ապագա դիմորդների իրազեկվածությունը բարձրացնելու, «մասնագիտական կողմնորոշման վեկտորը» դեպի Միջազգային հարաբերությունների ֆակուլտետ ուղղորդելու նպատակով:
Երևանի Գալուստ Գյուլբենկյանի անվան թիվ 190 ավագ դպրոցի աշակերտուհի Նարինե Խաչատրյանը, պատասխանելով «Ի՞նչ ակնկալիքներ ունեիք բուհից՝ մասնագիտության ընտրության հարցում կողմնորոշվելու տեսանկյունից» հարցին, նշել է, որ մասնակցել է հանդիպմանը՝ իրեն հետաքրքրող հարցերի ամբողջական և հստակ պատասխաններ ստանալու ակնկալիքով։ Ըստ աշակերտի՝ ներկայացված տեղեկություններն ու տպավորիչ քննարկումներն օգտակար կլինեն մոտ ապագայում ճիշտ և հիմնավորված մասնագիտական ընտրություն կատարելու հարցում։
Աշակերտներին ուղեկցող ուսուցչուհին ևս արժևորեց հանդիպման կարևոր դերը աշակերտների մասնագիտական կողմնորոշումն առավել հեշտացնելու, ինչպես նաև հետագայում նրանց՝ համապատասխան կրթական ծրագրերի ընտրությունն առավել արդյունավետ կազմակերպելու տեսանկյուններից։
Ֆակուլտետի ուսանողական խորհրդի նախագահ Արմեն Տոնյանն էլ մանրամասն ներկայացրեց ուսանողական կառույցների գործունեությունը, ֆակուլտետի կրթական ծրագրերը՝ անդրադառնալով դասընթացների կառուցվածքին, ուսումնառության մեթոդներին և հետազոտական նախաձեռնություններին մասնակցելու հնարավորություններին:
Աշակերտները հստակ պատկերացում կազմեցին, թե ինչպես կարող են ներգրավվել միջազգային և թիմային նախագծերում, սեմինարներում և գիտաժողովներում, ինչպես կարող են ներկայացնել նախաձեռնություններ, նորարարական գաղափարներ և հետազոտական աշխատանքներ, որոնք կնպաստեն ֆակուլտետի կրթական միջավայրի զարգացմանը՝ ստեղծելով համալիր կրթական փորձառություն, որն էլ իր հերթին կհանգեցնի ուսանողների համապարփակ առաջխաղացման և մասնագիտական հաջողությունների:
Իրազեկման արդյունավետ քննարկումը հնարավորություն տվեց փոխանակելու կարծիքներ, հնչեցնելու հուզող հարցեր և ստանալու անհրաժեշտ պատասխաններ թե՛ աշակերտներին, թե՛ դասախոսներին։
Հանդիպման ավարտին աշակերտները ծանոթացան Միջազգային հարաբերությունների ֆակուլտետի լսարաններին և ուսումնական գործընթացին։
Հավելենք, որ աշակերտների մասնագիտական կողմնորոշման, ինչպես նաև վերջինիս ընթացքն ուղղորդված և արդյունավետ դարձնելու համար կազմակերպվող նմանօրինակ հանդիպումները էական նշանակություն ունեն ինչպես ապագա դիմորդների, այնպես էլ բուհի համար:
