ԵՊՀ միջազգային հարաբերությունների ֆակուլտետի շրջանավարտ Մանե Ծատուրյանը ս.թ. նոյեմբերի 10-ին ՄԱԿ-ի Բրյուսելի գրասենյակում ներկայացրել է իր ավարտական մագիստրոսական թեզը, որը պաշտպանել էր անցած տարի Վարշավայում գործող Նատոլինի Եվրոպական քոլեջում (College of Europe in Natolin) ուսանելու ընթացքում «Եվրոպական միջդիսցիպլինար ուսումնասիրություններ» ծրագրով։
«ԵՄ բազմակողմ դիվանագիտություն. Եվրոպական միության ներգրավվածությունը ՄԱԿ անվտանգության խորհրդի բարեփոխման գործընթացում» խորագրով մագիստրոսական թեզը ուսումնառության ավարտին շուրջ 300 մրցակից հետազոտությունների շարքում ճանաչվել է «Europe, Multilateralism and the UN» թեմայի լավագույն գիտական աշխատանք։ Մրցանակը ներառում էր վեցամսյա վճարովի փորձաշրջան և աշխատանքը ներկայացնելու հնարավորություն ՄԱԿ-ի Բրյուսելի գրասենյակում:
Մ. Ծատուրյանի գիտական ղեկավարն էր ՄԱԿ-ում ԵՄ պատվիրակության նախկին ղեկավար և ՄԱԿ անվտանգության խորհրդի նախկին նախագահ Թոմաս Մայեր-Հարթինգը։ Թեզի շրջանակում նա իրականացրել է հարցազրույցներ միջազգային բարձր մակարդակի մի շարք գործիչների հետ, այդ թվում՝ ՄԱԿ ԱԽ բարեփոխումների միջկառավարական բանակցությունների համանախագահ դեսպան Ալեքսանդր Մարչիկի, ինչպես նաև Եվրոպական խորհրդի նախկին նախագահ Հերման Վան Ռոմպեյի հետ: Այս ամենը կարևոր ներդրում է հետազոտության խորության և բացահայտումների որակի առումով:
2023-2024 թվականներին նա ուսանել է Եվրոպական քոլեջի Նատոլինի մասնաճյուղում (Լեհաստան)՝ «Եվրոպական միջդիսցիպլինար ուսումնասիրություններ» մագիստրոսական ծրագրով՝ ստանալով EU4Youth կրթաթոշակ։ Եվրոպական քոլեջը, որը հիմնադրվել է 1949 թվականին Եվրոպայի կոնգրեսի որոշմամբ, այսօր Եվրոպական քաղաքականության, դիվանագիտության և կառավարման ոլորտի առաջատար կրթական հաստատություններից է։
Այսօր նա շարունակում է իր մասնագիտական ուղին Հայաստանում՝ Եվրոպական միության պատվիրակությունում՝ աշխատելով Քաղաքական, մամուլի և տեղեկատվության բաժնում։ Նրա գիտական և մասնագիտական գործունեությունը միտված է եվրոպական քաղաքականության, բազմակողմ դիվանագիտության և միջազգային հարաբերությունների համակարգային ուսումնասիրությանը՝ կարևոր ներդրում բերելով Հայաստանի՝ եվրոպական կառույցներում և միջազգային հարթակներում ներկայության ամրապնդմանը։
