Միջազգային տնտեսական հարաբերություններ

Ուսման տևողությունը առկա ուսուցման համակարգում՝ 1,5 տարի։

Շնորհվող որակավորումը՝ տնտեսագիտության մագիստրոս։

Ընդունելության քննությունը՝ գրավոր:

Դասերի սկիզբը՝ ժամը 18:30-ին։

Ընդունելության պահանջները

ԵՊՀ մագիստրատուրայի 2026/2027 ուսումնական տարվա առկա և հեռակա ուսուցման ձևերով ընդունելությունը կատարվելու է «ԵՊՀ մագիստրատուրայի (առկա և հեռակա ուսուցման ձևերով) ընդունելության կարգ»-ի պահանջների համաձայն:

Մանրամասները՝ «Ընդունելություն» բաժնում:

Ծրագրի նպատակը

«Միջազգային տնտեսական հարաբերություններ» մագիստրոսական կրթական ծրագրի նպատակն է պատրաստել տնտեսագետների, որոնք կարող են աշխատել մշակութային տարբեր միջավայրերում` հաշվի առնելով վարքագծի սոցիալական և տնտեսական տարբեր նորմեր և կանոններ: 

Ծրագրի շրջանավարտները կարող են աշխատել ՀՀ պետական կամ մասնավոր այն ընկերություններում, որոնց գործունեությունը կապված է արտաքին հատվածի հետ, ինչպես նաև ՀՀ-ում գործունեություն ծավալած միջազգային տնտեսական կազմակերպությունների գրասենյակներում։

Առավելությունները

Ուսումնառության ընթացքում ուսանողները ձեռք են բերում տեսական գիտելիքներ և գործնական հմտություններ միջազգային տնտեսական հարաբերությունների ոլորտում: Հաշվի առնելով այն հանգամանքը, որ յուրաքանչյուր երկրի (առավել ևս ՀՀ-ի նման փոքր զարգացող երկրների) համար միջազգային տնտեսական հարաբերությունների դերը գնալով մեծանում է՝ ուսանողների մրցակցային առավելություններն առավել ակնհայտ են դառնում:

Մագիստրոսական կրթական ծրագրի ուսանողներն իրենց մասնագիտական պրակտիկան անցկացնում են ՀՀ տարբեր կազմակերպություններում, որտեղ կան արտաքին տնտեսական հարցերով զբաղվող ստորաբաժանումներ: Հիմնվելով նախկին տարիների փորձի վրա՝ հարկ է նշել, որ առկա է աշխատանքի առաջարկի հնարավորություն պրակտիկայի ընթացքում։ 

Մագիստրոսական կրթական ծրագրում ներգրավված են տվյալ ոլորտի լավագույն մասնագետները, այդ թվում՝ հրավիրյալ դասախոսներ այլ բուհերից, գիտահետազոտական կենտրոններից և ֆինանսական ոլորտից:

Կարիերայի հնարավորությունները

«Միջազգային տնտեսական հարաբերություններ» մագիստրոսական կրթական ծրագրի շրջանավարտները կարող են աշխատել հանրապետությունում գործող միջազգային այնպիսի տնտեսական կազմակերպությունների գրասենյակներում, ինչպիսիք են՝ 

• Համաշխարհային բանկը,

• Արժույթի միջազգային հիմնադրամը, 

• ՄԱԿ-ի տնտեսական կառույցները, 

• ՀՀ-ում գտնվող տարբեր երկրների դեսպանատները:

ՀՀ պետական և մասնավոր ընկերությունների զգալի մասն ունի արտաքին տնտեսական կապերով զբաղվող վարչություններ և բաժիններ, որտեղ կարող են աշխատել տվյալ մագիստրոսական կրթական ծրագրի շրջանավարտները: ՀՀ-ում գործող առևտրային բանկերը զբաղվում են արտաքին առևտրի ֆինանսավորման հարցերով, միջազգային վարկերի սպասարկումով, արժութաֆինանսական գործարքներով, միջազգային տարբեր բանկերի հետ թղթակցային հարաբերություններով: Ծրագրի շրջանավարտները կարող են զբաղվել նշված բոլոր գործառույթներով: