ԵՊՀ իրավագիտության ֆակուլտետը 2024-2025 ուստարում թողարկեց 191 շրջանավարտ, այդ թվում՝ 31-ը գերազանցության դիպլոմով: Ուսումնառության տարիներին ձեռք բերած գիտելիքներով ու մասնագիտական հմտություններով նրանք պատրաստ են համալրելու օրենսդիր, գործադիր, դատական համակարգերի, ինչպես նաև մասնավոր հատվածի իրավական ոլորտի մասնագետների շարքերը՝ նպաստելով հայրենիքի ու պետության զարգացմանը։
Ֆակուլտետի դեկան Հարություն Խաչիկյանը, ողջունելով շրջանավարտներին, ծնողներին, ընդգծեց, որ շրջանավարտները կյանքի լավագույն փուլն են ավարտել և ստացել բարձրագույն կրթություն միջազգային որակավորման վարկանիշին համապատասխան կրթություն ապահովող բուհում: Իրավաբանի մասնագիտությունը պահանջում է անընդհատ զարգացում կրթության, գիտության և պրակտիկայի բնագավառներում, ինչին միտված էլ ԵՊՀ-ում կատարվում են անհրաժեշտ աշխատանքներ ինչպես կրթական ծրագրերի արդիականացման, այնպես էլ միջազգային փորձի փոխանակման ուղղություններով: Դեկանը վստահություն հայտնեց, որ բակալավրիատի շրջանավարտներն ուսումը կշարունակեն նաև մագիստրատուրայում, քանի որ, ըստ նրա,աննախադեպ թիվ է արձանագրվել մագիստրատուրայի դիմորդների մասով:
«Մեր շրջանավարտների հաջողություններն ակնհայտ են և շարունակական: Այս ծանր իրավիճակների կիզակետում ապագան կերտելու եք դուք, ապագան ձեր ձեռքերում է՝ ազատ մտածողությամբ, նոր աշխարհընկալումներով, գործելու պատասխանատվությամբ և պատրաստակամությամբ, միջավայր փոխելու ընդունակությամբ, դժվարություններ ու ճգնաժամեր հաղթահարելու ունակությամբ: Հավատացե՛ք ձեզ, ձեր ընդունակություններին և ուժին:
Դառնալով շրջանավարտ՝ դուք համալսարանի հետ համագործակցության նոր փուլ եք մտնում, որը նաև մասնագիտական կյանք թևակոխելու նոր մեկնարկ է: Շրջանավարտը ոչ միայն կրթական ծրագիրն ավարտելն է, այլ նաև համալսարանին շահակից և գործընկեր դառնալը: Նման համագործակցությունը շարունակական է»,- դիմելով շրջանավարտներին՝ մասնավորապես ասաց դեկանը:
Երախտագիտության խոսքով հանդես եկան շրջանավարտներ Էլիդա Գրիգորյանը, Սոսե Ստեփանյանը, Մանանա Դավթյանը, Միշա Շախտանյանը, Մկրտիչ Մկրտչյանը՝ շեշտելով ֆակուլտետի պրոֆեսորադասախոսական կազմի և վարչական աշխատակիցների ներդրումը ուսուցման և բարձրորակ կրթություն ապահովելու գործում։ Նրանք հատկապես շեշտեցին ձեռք բերած մասնագիտական գիտելիքների, հմտությունների, քննադատական մտածողություն զարգացնելու, համալսարանական միջավայրի, նոր ընկերների և փորձառության կարևորությունը։
Շրջանավարտների ծնողների շնորհակալական խոսքը ևս ուղղված էր պրոֆեսորադասախոսական կազմին։ Կարևորելով ԵՊՀ-ի դերն ու նշանակությունը, գիտակրթական միջավայրի շարունակական լավարկման և արդիականացման հանգամանքը որակյալ կրթություն ապահովելու գործում՝ շրջանավարտների ծնողները ընդգծեցին ԵՊՀ իրավագիտության ֆակուլտետի դասախոսների մասնագիտական բարձր որակները, վաստակը, մարդասիրական առաքելությունը, մարդկային բացառիկ տեսակը, որոնց շնորհիվ կյանքի կարևորագույն ճանապարհ են ուղղորդում մասնագիտական պատրաստվածությամբ շրջանավարտներին՝ իրենց զավակներին, որոնք պիտի դառնան իրավական համակարգի մրցունակ մասնագետներ և օրենքի գերակայության սկզբունքի իրագործողներ:
