ԵՊՀ իրավագիտության ֆակուլտետում ս.թ. նոյեմբերի 20-ին ուսանողների համար կազմակերպվեց առցանց դասախոսություն:
ԵՊՀ իրավագիտության ֆակուլտետի քաղաքացիական իրավունքի ամբիոնի վարիչ, պրոֆեսոր Արմեն Հայկյանցի նախաձեռնությամբ տեղի ունեցավ առցանց դասախոսություն: Բանախոսն էր Իրավագիտության ֆակուլտետի քաղաքացիական իրավունքի ամբիոնի դասախոս Մարիամ Այվազյանը, որն այժմ աշխատում է Մտավոր սեփականության համաշխարհային կազմակերպության Ժնևի գրասենյակում։
«Միջազգային մասնավոր իրավունք» բուհական դասընթացի շրջանակում կազմակերպված հանդիպման նպատակն էր խորացնել ուսանողների գիտելիքները մտավոր սեփականության իրավունքի միջազգային համակարգի վերաբերյալ, ինչպես նաև հաղորդակից դարձնել այն սկզբունքներին, որոնց վրա կառուցվում է մտավոր սեփականության օբյեկտների՝ ժամանակակից գլոբալ պաշտպանական մեխանիզմը։
Մ. Այվազյանն ուսանողներին ներկայացրեց մտավոր սեփականության իրավունքի միջազգային պաշտպանության պատմական զարգացումը՝ սկզբնական շրջանից մինչև մեր օրերի առաջադեմ մեխանիզմներ։ Առանձնացնելով ոլորտի առանցքային դերակատարում ունեցող միջազգային կազմակերպությունները՝ բանախոսն անդրադարձավ ոլորտային հիմնական միջազգային պայմանագրերի բովանդակությանն ու նշանակությանը (օրինակ՝ Բեռնի և Փարիզյան կոնվենցիաները, «TRIPS»-ը, «WIPO»-ի հիմնարար ակտերը): Նա ներկայացրեց նաև այն գործիքակազմը, որով պետություններն ու միջազգային կառույցներն այսօր ապահովում են հեղինակային իրավունքի, արդյունաբերական սեփականության, գյուտերի և նորարարական տեխնոլոգիաների համաշխարհային պաշտպանությունը։
Մարիամ Այվազյանը կարևորեց հատկապես մտավոր սեփականության իրավունքի գործնական կիրառությունը՝ անդրադառնալով արդիական խնդիրներին, համաշխարհային մարտահրավերներին, տեղեկատվական տեխնոլոգիաների դարում ստեղծագործությունների պաշտպանության առանձնահատկություններին, ինչպես նաև նորագույն միտումներին՝ արհեստական բանականությունից մինչև թվային բովանդակության գլոբալ շրջանառություն։
Ինտերակտիվ քննարկման ընթացքում ուսանողները ստացան իրենց հուզող բազմաբնույթ հարցերի պատասխաններ:
Հանդիպումը կարևոր հարթակ էր ուսանողների համար՝ հասկանալու, թե ինչպես է գործում մտավոր սեփականության իրավունքը միջազգային մակարդակում, ինչպիսի փոխկապակցվածություն ունի այն ազգային օրենսդրությունների հետ, և ինչպես է զարգանում ոլորտը տեխնոլոգիական դարի պայմաններում։
Այս և նմանօրինակ միջոցառումներն ապագա իրավաբաններին հնարավորություն են ընձեռում ձեռք բերելու ժամանակակից իրավական աշխարհում կողմնորոշվելու անհրաժեշտ գիտելիքներ և տեսլական։
