COP17-ը և Հայաստանը. ԵՊՀ ՈՒԳԸ միջազգային գիտաժողովում քննարկվեց կենսաբազմազանության պահպանության օրակարգը

Կենսաբանության, Իրավագիտության և Միջազգային հարաբերությունների ֆակուլտետների ուսանողական գիտական ընկերությունների համատեղ նախաձեռնությամբ կազմակերպված քննարկման առանցքում COP17-ի նշանակությունն էր Հայաստանի համար՝ կենսաբազմազանության պահպանության, էկոլոգիական անվտանգության, միջազգային համագործակցության և երկրի միջազգային ներկայացվածության տեսանկյուններից։ Մասնագիտական տարբեր ուղղությունների ներկայացուցիչների մասնակցությամբ քննարկմանը COP17-ի օրակարգը դիտարկվեց ոչ միայն բնապահպանական, այլև իրավական ու քաղաքական տեսանկյուններից։

Պանելային քննարկմանը մասնակցում էին կենսաէթիկայի մասնագետ, գիտաշխատող Տիգրան Հայրապետյանը, իրավաբանական գիտությունների թեկնածու, դոցենտ Օլիմպիա Գեղամյանը, կենսաբանական գիտությունների թեկնածու, դոցենտ Նարինե Զաքարյանը, քաղաքական գիտությունների թեկնածու Սիրանուշ Մելիքյանը և Կենսաբանության ֆակուլտետի էկոլոգիայի և բնության պահպանության ամբիոնի դոցենտ, Հիդրոէկոլոգիայի գիտական կենտրոնի ավագ գիտաշխատող Լուսինե Համբարյանը։

Քննարկման առաջին հատվածում բանախոսները պատասխանեցին ընդհանուր հարցերի՝ ներկայացնելով իրենց մասնագիտական դիտանկյունները։ Քննարկումը ցույց տվեց, որ կենսաբազմազանության պահպանության խնդիրը դուրս է միայն բնապահպանական օրակարգի սահմաններից և առնչվում է նաև իրավական, քաղաքական ու անվտանգային հարցերի։ Այս համատեքստում առանձնահատուկ շեշտվեց COP17-ի՝ Հայաստանում անցկացվելու նշանակությունը։ Ըստ բանախոսների՝ այն հնարավորություն է տալիս գլոբալ բնապահպանական խնդիրները կապելու Հայաստանի ազգային առաջնահերթությունների հետ։

Քննարկման առանցքային թեմաներից էր էկոլոգիական անվտանգությունը՝ որպես ազգային անվտանգության կարևոր բաղադրիչ։ Բանախոսները նշեցին, որ բնական ռեսուրսների, էկոհամակարգերի և կենսաբազմազանության պահպանության հարցերն այսօր անմիջականորեն առնչվում են պետությունների կայունության և անվտանգության խնդիրներին։

Երկրորդ հատվածում բանախոսները պատասխանեցին անհատական հարցերի՝ հնարավորություն տալով առավել խորությամբ անդրադառնալու առանձին թեմաների և ներկայացնելու ավելի հասցեական մասնագիտական տեսակետներ։

Բանախոսներն անդրադարձան նաև COP17-ի՝ Հայաստանի համար ստեղծած հնարավորություններին։ Նրանց խոսքով՝ նման միջազգային հարթակը կարող է նպաստել ոչ միայն բնապահպանական խնդիրների քննարկմանը, այլև Հայաստանի միջազգային ներկայացվածությանն ու նոր համագործակցությունների ձևավորմանը։ Ընդգծվեց նաև, որ էկոլոգիական անվտանգությանը վերաբերող հարցերը փոխկապակցված են ավելի լայն՝ տնտեսական, քաղաքական և աշխարհաքաղաքական գործընթացների հետ։ 

Պանելային քննարկումն ամփոփվեց «կարճ հարց և կարճ պատասխան» ձևաչափով։ Յուրաքանչյուր բանախոսի ուղղվեցին հակիրճ հարցեր՝ մասնագիտական տարբեր տեսակետներն արագ համադրելու նպատակով։

Քննարկման ընթացքում ուսանողները հնարավորություն ունեցան ավելի խորությամբ ծանոթանալու COP17-ի նպատակներին ու խնդիրներին և դրանք դիտարկելու մասնագիտական տարբեր տեսանկյուններից։

Միջոցառմանը ներկա էին ԵՊՀ ուսանողներ, պրոֆեսորադասախոսական կազմի ներկայացուցիչներ, գիտաժողովի օտարերկրյա մասնակիցներ և այլ հյուրեր։