ԵՊՀ-ն և ԱԱԾ գիտաուսումնական կենտրոնը սկսում են համատեղ ծրագրեր

Հուշագիրը ստորագրել են ԵՊՀ ռեկտոր Հովհաննես Հովհաննիսյանը և ՀՀ ԱԱԾ գիտաուսումնական կենտրոնի պետ, գնդապետ Տիգրան Դավիթավյանը։

Համագործակցության առանցքային ուղղությունները

5 տարի ժամկետով կնքված հուշագրով նախատեսվում են ազգային անվտանգությանն առնչվող նյութերի վերլուծություն, թեմատիկ լսումների, սեմինարների ու աշխատանքային քննարկումների կազմակերպում, ինչպես նաև անվտանգային հետազոտությունների համատեղ մշակում և մասնագիտական գրականության փոխանակում: ԵՊՀ գիտաշխատողները դասախոսություններ կանցկացնեն կենտրոնում, իսկ կենտրոնի մասնագետները՝ ԵՊՀ-ում։

Բացի դրանից՝ ԵՊՀ-ն մեթոդական աջակցություն ցույց կտա կենտրոնի աշխատակիցներին դոկտորանտուրայի ընդունելության, ատենախոսությունների մշակման ու պաշտպանության ընթացքում։ Համագործակցության շրջանակում նախատեսվում է նաև աջակցություն ՀՀ ԱԱԾ մարմինները բարձր որակավորում ունեցող մասնագետներով համալրելուն։

Վերապատրաստումներ արհեստական բանականության ոլորտում

Համագործակցության կարևորագույն բաղադրիչներից է ժամանակակից տեխնոլոգիական միտումների յուրացումը: ԵՊՀ առաջատար մասնագետները ՀՀ ԱԱԾ աշխատակիցների համար կանցկացնեն վերապատրաստման հատուկ դասընթացներ՝ նվիրված զարգացող տեխնոլոգիաներին, մասնավորապես՝ արհեստական բանականության (AI) կիրառմանն ու հնարավորություններին:

Նախատեսվող աշխատանքներն ուղղված են ազգային անվտանգության ոլորտում գիտակրթական համագործակցության ընդլայնմանը և աշխատակիցների մասնագիտական գիտելիքների ու հմտությունների զարգացմանը։