Արդիական միջավայր կրթության համար․ ԵՊՀ կենսաբանության ֆակուլտետում բացվեցին ուսումնական լաբորատորիաներ

Երևանի պետական համալսարանի ֆինանսավորմամբ վերանորոգված ուսումնական լաբորատորիաները (Սնկերի, բույսերի բազմազանության և կենսաակտիվության գնահատման գիտաուսումնական լաբորատորիա, Հյուսվածքաբանության և զարգացման կենսաբանության գիտաուսումնական լաբորատորիա, Մոլեկուլային գենետիկայի ուսումնական լաբորատորիա) ապահովելու են գիտական հետազոտությունների համար առավել արդյունավետ պայմաններ և բարձրացնելու են ուսանողների մասնագիտական պատրաստվածության մակարդակը։

Լաբորատորիաների բացման արարողությանը ներկա էին ԵՊՀ ռեկտորը, պրոռեկտորները, ֆակուլտետի դեկանը, ինչպես նաև պրոֆեսորադասախոսական կազմի ներկայացուցիչները։

Ընդգծելով լաբորատորիաների արդիականացման կարևորությունը՝ ԵՊՀ ռեկտոր Հովհաննես Հովհաննիսյանը նշեց, որ դրանք էականորեն կբարձրացնեն ուսումնական գործընթացի որակը և կնպաստեն միջազգային չափանիշներին համապատասխան գիտահետազոտական միջավայրի ձևավորմանը։

ԵՊՀ կենսաբանության ֆակուլտետի դեկան Կարեն Ղազարյանն ընդգծեց, որ նոր լաբորատորիաները ուսանողների համար կստեղծեն ոչ միայն գիտելիք ստանալու, այլև հաճելի ու ներշնչող միջավայրում սովորելու հնարավորություն։

«Նախկինում պայմանները շատ սահմանափակ էին։ Այժմ ստեղծված նոր պայմանները, վստահաբար, դրական ազդեցություն կունենան ուսանողների գիտելիքի որակի վրա»,- ասաց նա և հավելեց, որ ֆակուլտետը պարբերաբար ներգրավվում է դրամաշնորհային ծրագրերում՝ ձեռք բերելով ինչպես մանրադիտակներ, այնպես էլ ուսուցման և հետազոտությունների համար անհրաժեշտ այլ սարքավորումներ։

Ֆակուլտետի ներկայացուցիչները փաստեցին, որ լաբորատորիաների բացումը կարևոր քայլ է համալսարանի գիտական կարողությունների ընդլայնման և միջազգային կրթական չափանիշներին համապատասխանելու ուղղությամբ։ Նոր լաբորատորիաները հնարավորություն կտան ուսանողներին կատարելու բարձրորակ հետազոտություններ, ինչպես նաև մասնակցելու գիտական նոր նախագծերի։

ԵՊՀ կենսաբանության ֆակուլտետի բուսաբանության և սնկաբանության ամբիոնի վարիչ, պրոֆեսոր Սիրանուշ Նանագյուլյանն ասաց, որ ԵՊՀ-ն միակն է, որտեղ պատրաստվում են սնկաբաններ, ուստի սա լավ հնարավորություն է է՛լ ավելի հարմարավետ միջավայրում գիտակրթական և հետազոտական աշխատանքներ կատարելու համար։ Նա մատնանշեց, որ նախատեսվում է դրամաշնորհային ծրագրերի միջոցով ֆակուլտետում բացել նաև սնկերի բարկոդավորման կենտրոն։

Մարդու ու կենդանիների մորֆոլոգիայի ու ֆիզիոլոգիայի ամբիոնի ասիստենտ Աննա Գրիգորյանը, խոսելով Հյուսվածքաբանության և զարգացման կենսաբանության գիտաուսումնական լաբորատորիայում անցկացվող դասընթացների մասին, շեշտեց՝ լաբորատորիայում մանրադիտակների միջոցով ուսանողները կհետազոտեն մարդու, կենդանիների, թռչունների հյուսվածքներ։ 

«Կարծում եմ՝ ուսանողները շատ ավելի մեծ հետաքրքրությամբ կսկսեն սովորել։ Այստեղ ստեղծված պայմանները հնարավորություն են տալիս միանգամից տեսնելու նյութը նաև էկրանի վրա․ դասախոսը ցույց կտա հյուսվածքը կամ այն օբյեկտը, որը պետք է նրանք ուսումնասիրեն, ինչպես նաև կսովորեցնի ինքնուրույն օգտվել մանրադիտակից, ճիշտ տեսադաշտ ընտրել և հասկանալ կառուցվածքը»,- հավելեց նա։

Գենետիկայի և բջջաբանության ամբիոնի դոցենտ Տիգրան Հարությունյանը նշեց, որ Մոլեկուլային գենետիկայի ուսումնական լաբորատորիայում կանցկացվեն ինչպես տեսական, այնպես էլ գործնական դասընթացներ, որոնք կապված են գենային ճարտարագիտության հետ։

«Ներկայում ստեղծվել են շատ ավելի հարմարավետ պայմաններ, լաբորատորիան զգալիորեն բարեկարգվել է․ ուսանողները հնարավորություն կունենան աշխատելու առավել հարմարավետ և գիտական գործընթացին համապատասխան միջավայրում»,- ասաց նա։

Այսպիսով, նոր լաբորատորիաների բացումը ևս մեկ քայլ է դեպի ժամանակակից և մրցունակ կրթություն։