Եվս մեկ քայլ դեպի միջազգային գիտական հարթակ․ ԵՊՀ-ում լույս է ընծայվել գիտական նոր ամսագիր

Ամսագրում ընդգրկված են բարձրորակ ու առաջադեմ գիտական հետազոտություններ և համապարփակ ակնարկներ, որոնցում անդրադարձ է կատարվում շրջակա միջավայրի կայունության արդի ու հրատապ մարտահրավերներին՝ նորարարական և միջառարկայական մոտեցումների կիրառմամբ։ Այստեղ տպագրվում են հետազոտական հոդվածներ, վերլուծական ակնարկներ, հաղորդակցական կարճ նյութեր և խմբագրական հոդվածներ՝ էկոլոգիային, շրջակա միջավայրի կառավարմանը և կայուն ապագայի համար նորարարական լուծումներին առնչվող թեմաներով։

Կարեն Ղազարյանի խոսքով՝ Հայաստանում կենսաբանական և էկոլոգիական ուղղվածություն ունեցող գիտական ամսագրեր նախկինում եղել են, սակայն դրանց մեծ մասը ժամանակի ընթացքում չի կարողացել դիմակայել միջազգային մրցակցությանը։

«Մեր նպատակն էր ստեղծել նոր որակի գիտական հարթակ՝ հստակ չափանիշներով և միջազգային գիտական շտեմարաններում ընդգրկվելու հեռանկարով։ Սկզբից ևեթ սահմանել ենք բարձր չափանիշներ և նպատակադրվել, որ ամսագիրը պարտադիր ընդգրկվի միջազգային հեղինակավոր գիտական շտեմարաններում։ Այսօր արդեն ամսագրի նկատմամբ մեծ հետաքրքրությունն ակնառու է տպագրվելու համար աշխարհի տարբեր երկրներից ներկայացվող հոդվածների քանակից»,- մատնանշում է նա։

Նորաստեղծ ամսագրի շրջանակում կիրառվում է կրկնակի փորձաքննության մեխանիզմ։ Մի քանի ամսվա ընթացքում ամսագրում տպագրվելու համար տարբեր երկրներից ներկայացվել է ավելի քան 20 հոդված, որոնցից միայն 1-2-ն են եղել Հայաստանից։ Ներկայացված աշխատանքներից 5-ը (հետազոտական, վերլուծական և խմբագրական հոդվածներ) անցել են կրկնակի փորձաքննության փուլը և հրապարակվել առաջին համարում։

Աբհիշեկ Սինխի խոսքով՝ ամսագրի գաղափարական առանցքում կիրառական և առաջադեմ լուծումներն են։

«Մենք նպատակ ունենք անդրադառնալու էկոլոգիական խնդիրներին ոչ միայն տեսական, այլև գործնական լուծումների միջոցով։ Ընտրել ենք այն ոլորտները, որոնցում ունենք գիտական փորձ՝ կենսաբանական, նանոտեխնոլոգիական և շրջակա միջավայրի կառավարման ժամանակակից մոտեցումների կիրառմամբ, սակայն ամսագիրը բաց է բոլոր այն հետազոտությունների համար, որոնք առաջարկում են կայուն և նորարարական լուծումներ»,- ընդգծում է նա։

Նախատեսվում է տարեկան տպագրել 4 համար՝ յուրաքանչյուրում 5-ից 10 հոդված։ Խմբագրական կազմի նպատակն է արդեն 2027 թվականին դիմել «Scopus»-ում և միջազգային հեղինակավոր այլ շտեմարաններում ամսագրի ընդգրկման համար։

Ամսագրի գլխավոր խմբագիրներն են Կարեն Ղազարյանը և Աբհիշեկ Սինխը։ Խմբագրական թիմում ընդգրկված են ոլորտային խմբագիրներ, տեխնիկական և խմբագրական օգնականներ տարբեր երկրներից։ Խմբագրական խորհրդի անդամներից մեկը ներկայացնում է Հայաստանը (ԵՊՀ էկոլոգիայի և բնության պահպանության ամբիոն), իսկ մնացածը տարբեր երկրների ներկայացուցիչներ են։

Գիտական ամսագրի կազմակերպական և գիտական հիմնական աշխատանքները կատարվում են ԵՊՀ էկոլոգիայի և բնության պահպանության ամբիոնի և միջազգային գործընկերների համագործակցությամբ, իսկ տպագրման գործընթացը կազմակերպվում է Երևանի պետական համալսարանի հրատարակչության միջոցով։

Խմբագրակազմը նախատեսում է շարունակել նաև հատուկ թողարկումների ձևաչափը՝ նվիրված տարբեր գիտաժողովների կամ էկոլոգիական կոնկրետ խնդիրների։ Արդեն իսկ կան օտարերկրյա գործընկերներ և գիտաժողովների կազմակերպիչներ, որոնք հետաքրքրված են իրենց գիտական աշխատանքները նշյալ ամսագրում տպագրելու հնարավորությամբ։

«Journal of Innovative Solutions for Eco-Environmental Sustainability»-ն նպատակ ունի դառնալու բարձր վարկանիշ ունեցող միջազգային մրցունակ գիտական հարթակ՝ նպաստելով էկոլոգիական խնդիրների լուծմանն ուղղված գիտելիքի տարածմանը և Հայաստանի գիտական ներուժի ներկայացմանը միջազգային գիտական հանրույթի շրջանում։

Հավելենք, որ 2025 թվականի սեպտեմբերին կայացած Կենսաբանության ֆակուլտետի 90-ամյակին և Կենսաբանության գիտահետազոտական ինստիտուտի 10-ամյակին նվիրված միջազգային գիտաժողովի շրջանակում հրատարակվել է ամսագրի առաջին հատուկ թողարկումը։