Գիտական համագործակցության նոր հեռանկարներ․ ԵՊՀ-ում էր Գույչժոուի գիտությունների ակադեմիայի պատվիրակությունը

ԵՊՀ միջազգային համագործակցության վարչության պետ Ալեքսանդր Մարգարովը նշեց, որ վերջին տարիներին համալսարանի և չինացի գործընկերների միջև զարգացել է փոխշահավետ համագործակցություն։ Այդ համագործակցության կարևոր բաղադրիչներից են ԵՊՀ ներկայացուցիչների՝ Չինաստան կատարած այցերը և մասնագիտական վերապատրաստման ծրագրերին մասնակցությունը։ Ըստ նրա՝ նման այցերը հնարավորություն են տալիս համալսարանի տարբեր ոլորտների մասնագետներին ձեռք բերելու նոր գիտելիքներ, զարգացնելու մասնագիտական հմտությունները և հիմք ստեղծելու հետագա համագործակցության համար։

ԵՊՀ գիտական և կրթական ներուժը

Հանդիպման սկզբում Ալեքսանդր Մարգարովը պատվիրակությանը ներկայացրեց Երևանի պետական համալսարանի պատմությունը, կառուցվածքը, կրթական և գիտահետազոտական գործունեությունը, խոսեց միջազգային գիտական հրապարակումների ու դրամաշնորհային ծրագրերի մասին, ներկայացրեց նաև համալսարանի զարգացման հիմնական ուղղությունները՝ միջազգայնացում, նորարարություն, սոցիալական ներգրավվածություն և կայուն զարգացում։

Գույչժոուի գիտությունների ակադեմիան՝ գիտահետազոտական լայն ներուժով

Ներկայացնելով Գույչժոուի գիտությունների ակադեմիայի գործունեությունը՝ պատվիրակության անդամները նշեցին, որ ակադեմիան հիմնադրվել է 1935 թվականին և ունի ավելի քան ինը տասնամյակների պատմություն։ Ակադեմիայի համակարգում գործում են հետազոտական 16 կենտրոններ, որոնք զբաղվում են գիտական տարբեր ուղղություններով։

Ներկայացված տվյալների համաձայն՝ ակադեմիայում աշխատում է շուրջ 1180 մարդ, որոնցից ավելի քան 900-ը մասնագիտական ուղղություններով հետազոտողներ են։ Ակադեմիան ունի նաև բարձրակարգ մասնագետների և գիտական ներուժի զարգացմանն ուղղված ծրագրեր ու մասնագիտացված կենտրոններ։

«Մեր նպատակն է համագործակցել և նոր հնարավորություններ ստեղծել կողմերի համար»,- նշեց Գույչժոուի գիտությունների ակադեմիայի արտաքին կապերի բաժնի ղեկավար Վան Յունը՝ ԵՊՀ մասնագետներին հրավիրելով ակադեմիա։

Համագործակցության համաձայնագիր և համատեղ աշխատանքային ծրագիր

Հանդիպման առանցքային թեմաներից մեկը Երևանի պետական համալսարանի և Գույչժոուի գիտությունների ակադեմիայի միջև համագործակցության մասին համաձայնագրի ստորագրման հարցն էր։

Համաձայնագրով կողմերը նախատեսում են ընդլայնել համագործակցությունը գիտահետազոտական և կրթական ոլորտներում՝ ձևավորելով համատեղ աշխատանքի կոնկրետ ուղղություններ և ծրագրեր։ Առանձնահատուկ ուշադրություն է դարձվելու համատեղ գիտական հետազոտություններին, մասնագետների և գիտնականների միջև կապերի զարգացմանը, փորձի ու գիտելիքի փոխանակմանը, ինչպես նաև նանոտեխնոլոգիաների, նյութագիտության և այլ ուղղություններով հնարավոր համատեղ նախաձեռնություններին։

«Նպատակի ձևակերպումը և պլանավորումը այդ նպատակին հասնելու համար գործի հաջողության զգալի մասն է»,- հավելեց Ալ․ Մարգարովը։

Գույչժոուի գիտությունների ակադեմիայի ներկայացուցիչները բարձր գնահատեցին ԵՊՀ կրթական և գիտահետազոտական ներուժը՝ մատնանշելով, որ համալսարանի բազմակողմանի գործունեությունն ու մասնագիտական լայն շրջանակը բազմաթիվ հնարավորություններ են ստեղծում համագործակցության համար։

Հանդիպման ավարտին կողմերը վերահաստատեցին հետագա համագործակցությունը զարգացնելու պատրաստակամությունը՝ կարևորելով ինչպես պաշտոնական, այնպես էլ գործնական շփումների շարունակականությունը։

Նշենք, որ հանդիպումից հետո Գույչժոուի գիտությունների ակադեմիայի պատվիրակության անդամները շրջայց են կատարել ԵՊՀ ֆիզիկայի ինստիտուտի գիտահետազոտական լաբորատորիաներում՝ ծանոթանալով կատարվող հետազոտություններին, գիտական ենթակառուցվածքներին և լաբորատորիաների գործունեության հիմնական ուղղություններին։