ՌՈՒՍ ԲԱՆԱՍԻՐՈՒԹՅԱՆ ՖԱԿՈՒԼՏԵՏԻ ԴԵԿԱՆ ՎԵՐԸՆՏՐՎԵՑ ՊԱՎԵԼ ԲԱԼԱՅԱՆԸ

Ռուս բանասիրության դեկանի ընտրությունը սկսվեց մեկ րոպե լռությամբ՝ հարգելով Շառլ Ազնավուրի հիշատակը:

Նիստին ներկա էր ԵՊՀ ընդհանուր հարցերի գծով պրոռեկտոր Արարատ Մալխասյանը:

Նիստը ղեկավարում էր Ռուսաց լեզվի ամբիոնի (հումանիտար ֆակուլտետների համար) վարիչ Սուսաննա Լալայանը:

Խոսքը տրամադրվեց դեկանի միակ թեկնածու Պավել Բալայանին: Նա իր ելույթում անդրադարձավ ֆակուլտետում առկա ամենակարևոր խնդիրներին, ինչպես նաև առաջարկեց լուծման տարբերակները:

«Այսօր Ռուս բանասիրության ֆակուլտետում սովորում է 175 ուսանող, ինչը մեր ֆակուլտետի համար այդքան էլ լավ ցուցանիշ չէ: Առաջարկում եմ 2-րդ և 3-րդ կուրսերի ուսանողներ համար, ովքեր ցանկանում են բարձրացնել ռուսաց լեզվի իմացության մակարդակը, ստեղծել մինիմալ վարձավճարով մեկամյա լեզվի դասընթացներ»,- ասաց Բալայանը:

Դեկանի թեկնածուն խոսեց նաև Ռուս բանասիրության ֆակուլտետ ընդունվելու խնդիրների մասին. «Ռուսաց լեզվի քննական թեստը 80 տոկոսով կրկնում է Ռուսաստանում գործող ընդունելության քննությունների հարցաշարը, իսկ բանավոր քննության հարցաշարն իր մեջ ներառում է հարցեր 19-20-րդ դարերի գրականության վերաբերյալ, նախադասության ձևաբանական ու շարահյուսական վերլուծություն, ինչը խնդրահարույց է»:

Պավել Բալայանն առաջարկեց կրճատել մագիստրատուրայում առկա դասընթացների տևողությունը՝ այն դարձնելով մեկուկեսամյա, ինչի արդյունքում ուսանողները կստանան մանկավարժի որակավորում:

Դեկանի թեկնածուի խոսքից հետո ելույթ ունեցան ֆակուլտետի դասախոսները, ովքեր շնորհակալություն հայտնեցին Պավել Բալայանին կատարած աշխատանքի համար: Բոլոր ամբիոնների դասախոսները վստահ էին, որ նա իր առջև դրված գործը շարունակելու է գերազանց կատարել:

Ելույթների ավարտից հետո տեղի ունեցավ փակ քվեարկություն, որի արդյունքում 26 կողմ, 1 դեմ ձայներով Պավել Բալայանը վերընտրվեց Ռուս բանասիրության ֆակուլտետի դեկան:



Նիստի վերջում ԵՊՀ ընդհանուր հարցերի գծով պրոռեկտոր Արարատ Մալխասյանը գոհունակությամբ խոսեց դեկանի ծրագրի մասին, շնորհավորեց նրան վերընտրվելու կապակցությամբ:

Մարինե Առաքելյան