«ՄԻՆՉԵՎ ՈՒՇ ԳԻՇԵՐ ՄԵՐ ԼԱԲՈՐԱՏՈՐԻԱՅՈՒՄ ՄԱՐԴԻԿ ԵՆ ԱՇԽԱՏՈՒՄ». ԵՊՀ ՖԻԶԻԿԱՏԵԽՆԻԿԱԿԱՆ ՀԵՏԱԶՈՏՈՒԹՅՈՒՆՆԵՐԻ ԿԵՆՏՐՈՆԻ ՏՆՕՐԵՆ ՎԱԶԳԵՆ ԳԱԲՐԻԵԼՅԱՆ

ԵՊՀ ֆիզիկատեխնիկական հետազոտությունների կենտրոնում գործում են հետևյալ ՝ Էլեկտրոնային համակարգերի մշակման, Կիսահաղորդիչների ֆիզիկայի ու տեխնոլոգիաների և Միկրոալիքային ֆոտոնիկայի լաբորատորիաները:

Լաբորատորիայի ստեղծման, այնտեղ հաճախող մարդկանց մասին զրուցեցինք ԵՊՀ ֆիզիկատեխնիկական հետազոտությունների կենտրոնի տնօրեն Վազգեն Գաբրիելյանի հետ:

- Ե՞րբ ու ի՞նչ նպատակով է հիմնադրվել լաբորատորիան։

- Լաբորատորիան հիմնադրվել է երկու տարի առաջ՝ 2016 թվականին։ Լաբորատորիայի ստեղծման գլխավոր նպատակը երիտասարդ գիտնականներին իրենց գաղափարներն իրականացնելու հնարավորություն ընձեռելն է։ Փաստորեն, ստեղծվեց նորագույն սարքավորումներով զինված մի կենտրոն, որը հնարավորություն է տալիս իրականացնելու նոր գաղափարներ։

Մենք ունենք սարքավորումներ, որոնք թույլ են տալիս աշխատել և՛ էլեկտրոնիկայի, և՛ մեխանիկայի հետ: Լաբորատորիայում ստեղծվում են տարբեր սարքեր, և այդ սարքերի հիմքում ընկած են էլեկտրոնիկայի, մեխանիկայի և ծրագրավորման բաղադրիչները: Որպես օրինակ, ստեղծվել է մի սարք, որը, ճանաչելով հատուկ պատկերներ, կատարում է համապատասխան ծրագրավորված գործողություններ:

- Ինչպիսի՞ համագործակցություններ կան կրթական ոլորտում։

- Այս տարիներին տարբեր համագործակցություններ են եղել թե՛ ավագ դպրոցների՝ Ֆիզմաթ, «Այբ», «Քվանտ» վարժարանի, թե՛ համալսարանների՝ Հայ-ռուսական համալսարանի, Հայաստանի ամերիկյան համալսարանի հետ։ Ավագ դպրոցների աշակերտներն այստեղ պատրաստել են իրենց գաղափարների նախատիպերը։ Եթե ինչ-որ թիմ կամ անհատ ունի գաղափարներ, որոնց իրագործման համար անհրաժեշտ են սարքավորումներ, նյութեր, մասնագիտական կոնսուլտացիա, ապա մենք միշտ պատրաստ ենք համագործակցելու: Բացի կրթական ոլորտից՝ կան նաև միջազգային համագործակցություններ, որոնք հիմնականում տեսական են լինում:

- Ի՞նչն է ամենաշատը հետաքրքրում աշակերտներին։

- Ֆիզիկան և ծրագրավորումը։

- Որևէ օրինաչափություն նկատե՞լ եք, որ լաբորատորիային ծանոթ աշակերտները հետագայում դառնան ԵՊՀ ուսանող։

- Այո, իհարկե, կան նման դեպքեր։ Լաբորատորիայի առաջին տարին մի փոքր պասիվ էր, աշակերտները գալիս էին, սակայն ներգրավվածությունը երկար չէր տևում՝ կապված այն բանի հետ, որ այստեղ բաց ձևաչափն է գործում և խրախուսվում է ինքնուրույնությունը։ Այստեղ գալիս են կոնկրետ աշխատանքներ կատարելու համար։ Այն մարդիկ, ովքեր կարողացան կոտրել տնային աշխատանքի հանձնարարում-ստուգում կարծրատիպը, ովքեր հասկացան, որ սա ինքնուրույն մարդկանց աճելու տեղ է, սկսեցին օր ու գիշեր անցկացնել լաբորատորիայում։ Այսօր էլ ունենք ուսանողներ, ովքեր արդեն ԵՊՀ-ում են սովորում, բայց լաբորատորիա են հաճախել դպրոցական տարիներից։ Ունենք նաև այլ բուհերից լաբորատորիա հաճախողներ։

- Ի՞նչ սկզբունքով է հնարավոր գալ լաբորատորիա։

- Մենք քննարկում ենք գաղափարները, եթե պետք է ուղղակի խորհրդատվություն, մենք այն կատարում ենք։ Իսկ սարքավորումների ու նյութերի կարիք ունեցող մարդիկ կարող են գալ և աշխատել լաբորատորիայում, իսկ նրանք, ովքեր կարծում են, որ չունեն բավարար գիտելիքներ, նրանց նախագծերը մենք վերցնում ենք որպես ընթացիկ նախագիծ և փորձում հնարավորինս օգտակար լինել։

- Ի՞նչ համագործակցություններ կցանկանայիք տեսնել հետագայում։

- Մեր գործունեության շրջանակում են պետական նշանակություն ունեցող խնդիրները՝ գյուղատնտեսության ոլորտ, վերահսկողության ծրագրեր և այլն: Այս առումով մեծ է պետության հետ համագործակցելու ցանկությունը։

Մարի Ռաֆյան