«ՄԵՐ ԿՐԹԱԿԱՆ ՀԱՄԱԿԱՐԳԸ ԳՐԵԹԵ ՈՉՆՉՈՎ ՉԻ ԶԻՋՈՒՄ Ո՛Չ ԵՎՐՈՊԱԿԱՆ, Ո՛Չ ԱՄԵՐԻԿՅԱՆ ԿՐԹԱԿԱՆ ՀԱՄԱԿԱՐԳԵՐԻՆ». ԼԻԼԻԹ ՇԱՔԱՐՅԱՆ

- Տիկին Շաքարյան, կպատմե՞ք Ձեր փորձառության մասին: Ի՞նչ թեմաներ եք ներկայացնում եվրոպական լսարանին:

- Այս այցը դեպի Եվրոպա երկրորդն է այս տարվա ընթացքում: Առաջին այցիս ժամանակ եղել եմ Մադրիդի համալսարանում, որտեղ հանդես եմ եկել «Գենդեր և մեդիա» թեմայով դասախոսություններով, ինչպես նաև ներկայացրել եմ Հայաստանում արված իմ հետազոտությունների արդյունքները:

Այժմ էլ շահել եմ մեծ և պատասխանատու դասախոսական ծրագիր և երկու ամսով պետք է մեկնեմ Չեխիա՝ դասախոսություններ կարդալու, որոնց ընթացքում խոսելու եմ «ԶԼՄ սոցիոլոգիա» թեմայով և անդրադարձ եմ կատարելու մեդիայի տարբեր տեսակներին ու սոցիոլոգիայում մեդիայի դերին:

Եվրոպական լսարանը շատ հետաքրքիր է, այն էապես տարբերվում է հայաստանյան լսարանից: Դու հնարավորություն ես ունենում տեսնելու, թե այդ ամենն ինչպես է կազմակերպվում, ուսանողներն ինչպես են արձագանքում, կրթական համակարգն ինչպես է աշխատում: Ապա իմ ստացած նոր գիտելիքները և փորձը բերում եմ Հայաստան:

- Ծանոթանալով եվրոպական կրթական համակարգին՝ ինչպե՞ս կգնահատեք հայաստանյան կրթական համակարգը:

- Հաճախ ենք ականատեսը դառնում, թե ինչպես են մեր ուսանողները ձգտում արտասահմանում կրթություն ստանալու՝ մտածելով, թե այնտեղ կրթությունը շատ ավելի լավն է: Լինելով մարդ, որը հաճախ է լինում արտերկրում և միջազգային կրթական հաստատություններում, և մարդ, որը սովորել է Շվեյցարիայում և ԱՄՆ-ում, կարող եմ փաստել, որ մեր կրթական համակարգը գրեթե ոչնչով չի զիջում ո՛չ եվրոպական, ո՛չ ամերիկյան կրթական համակարգերին:

- Արդեն 10 տարի է, ինչ Ձեր կողմից մշակված ավելի քան 7առարկայականծրագրերով դասավանդում եք ԵՊՀ տարբեր ֆակուլտետներում: Կմանրամասնե՞ք այդ առարկաների մասին:

- Ես մշակել եմ «Բրենդինգի հիմունքներ» առարկայական ծրագիրը, որի հետ էլ պատկերացնում եմ իմ հետագա գործունեությունը: Բացի դրանից՝ մշակել եմ նաև «ԶԼՄ սոցիոլոգիա», «Ժամանակակից PR տեխնոլոգիաներ», «Գենդերի սոցիալական  կառուցակցումը», «Գովազդի սոցիոլոգիա» և այլ առարկայական ծրագրեր: Հիմնական առարկան, որի շրջանակում խորացրել եմ մասնագիտական  գիտելիքներս, բրենդինգն է, որի վերաբերյալ էլ ապագայում պլանավորում եմ գիրք հրապարակել: Դա այն տիրույթն է, որտեղ շատ լավ պատկերացնում եմ և՛ տեսական, և՛ գործնական մակարդակով գործունեության կազմակերպումը: Այս պահին արդեն իսկ աշխատում եմ  բրենդինգի թեմայով գրքի վրա, որը, իմ պատկերացմամբ, կարող է դասագիրք դառնալ մեր ուսանողների համար:

- Տիկին Շաքարյան, բացի դրանից՝ Դուք հաճախ կազմակերպում եք մասնագիտացված դասընթացներ:

- Մեկ բան է դասավանդումը համալսարանական կյանքում, մեկ այլ բան՝ դրանից դուրս: Այդ պարագայում գործ ունես ոլորտում արդեն կայացած մասնագետների հետ, որոնք ուզում են ավելի խորացնել իրենց գիտելիքները: Դասավանդման ծրագրերը վերաբերում են մերչնդայզինգին, բրենդինգին, սպառողական  վարքագծին, ինչպես նաև սոցիոլոգիական հետազոտություններին և մարքեթինգային ուսումնասիրության մեթոդներին:

Պատրաստեց Քնար Միսակյանը