ԵՊՀ-ՈՒՄ ԿՍՏԵՂԾՎԻ ՆՈՐԱԳՈՒՅՆ ՕՊՏԻԿԱԿԱՆ ՀԱՄԱԿԱՐԳ

«Նանոկառուցվածքներում ալիքային դաշտերի արտապատկերումը ջերմաառաձգական ինդիկատորով օպտիկական մանրադիտակով» գիտական ծրագրի ղեկավար, ԵՊՀ ռադիոֆիզիկայի ֆակուլտետի կիրառական էլեկտրադինամիկայի և գիտափորձի ավտոմատացման ամբիոնի վարիչի պաշտոնակատար Արսեն Բաբաջանյանը մեզ հետ զրույցում ներկայացրեց վերոնշյալ գիտական ծրագրի կարևորությունը և նպատակը:   

Նշենք, որ հաղթող ճանաչված գիտական և գիտատեխնիկական հետազոտությունների իրականացման համար մինչև 2 տարի տևողությամբ դրամաշնորհները տրամադրվելու են 2-5 անձից բաղկացած գիտահետազոտական խմբերին:

Վերոնշյալ գիտական ծրագրի ղեկավար Արսեն Բաբաջանյանը հայտնեց, որ գիտատեխնիկական հետազոտությունների իրականացման համար իրենց խումբը բաղկացած է 5 անձից:

Թեմայի գիտական նպատակները

Առաջարկվում է ստեղծել միջավայրի ջերմաառաձգական հատկությունների վրա հիմնված էլեկտրամագնիսական դաշտերի արտապատկերման համակարգ, որն ընտրողաբար կկարողանա արտապատկերել ջերմային, էլեկտրական և մագնիսական դաշտերի բաշխվածությունները։

Տեխնոլոգիաների ժամանակակից մրցավազքում ֆիզիկական մեծ զգայունությամբ և տարածական լուծունակությամբ մեծությունների գրանցումը ժամանակի հրամայականն է։ Այն խթանում է ֆիզիկական մեծությունները գրանցող սարքերի կատարելագործումը, ինչպես նաև նորագույն համակարգերի նախագծումը և մշակումը։

Ծրագրի ավարտին ԵՊՀ ռադիոֆիզիկայի ֆակուլտետը կունենա լաբորատոր սարքի նախատիպ, որը թույլ կտա ստանդարտացնելու օպտիկական արտապատկերման համակարգը: Այն կունենա խիստ կիրառական և գիտական նշանակություն ԵՊՀ գիտաշխատողների և ուսանողների համար:    

Արտապատկերման համակարգում համապատասխան ինդիկատորի ընտրությամբ կարելի է ընտրողաբար արտապատկերել ջերմային, էլեկտրական կամ մագնիսական դաշտերի բաշխվածությունները, որոնք աշխատանքի տարբեր ռեժիմներում կարող են օգնել բացահայտելու սարքերում կառուցվածքային և նախագծային թերություններն ու խոտորումները:

Գիտական ծրագիրը ներկայացնող խմբի ունեցած ձեռքբերումները և ակնկալվող արդյունքները

Խմբի կողմից արդեն մշակվել է արտապատկերման համակարգի լաբորատոր նախատիպը, իսկ առանցքային հարցերը լուսաբանող խնդիրների համար կատարվել են համակարգչային մոդելավորումներ: Կան համատեղ հետազոտություններ արտասահմանյան գործընկեր լաբորատորիաների (Սեուլի Սոգանգի համասարան, Հարավդանեական համալսարան) հետ:

Ներկայացված թեմայի շրջանակում տպագրվել է 27 գիտական աշխատանք:

Նշենք, որ այս տարվա գիտական ծրագրերի թեմատիկ ֆինանսավորման մրցույթին մասնակցելու համար ներկայացվել էր 417 հայտ: Մրցույթի արդյունքների ամփոփման 1-ին փուլում ֆինանսավորման են երաշխավորվել 164 գիտական ծրագրեր:

Ծրագրերի ֆինանսավորումը սկսվելու է սեպտեմբերի 1-ից՝ նախատեսված ժամկետից երկու ամիս ուշ, ինչը, ըստ ՀՀ ԿԳՆ գիտության կոմիտեի պաշտոնական տեղեկատվության, հնարավորություն է տվել որոշակի չափով՝ մոտ 7 %-ով, ավելացնելու  ֆինանսավորման երաշխավորված ծրագրերի քանակը:

Նադեժդա Տեր-Աբրահամյան