ԵՊՀ Ծաղկաձորի «Համալսարան» ուսումնաարտադրական բազայում անցկացվեց Սոցիոլոգիայի ֆակուլտետի ՈՒԳԸ ոչ ֆորմալ կոնֆերանսը՝ «Սոցքեմփ»-ը, որը մի հարկի տակ համախմբեց Սոցիոլոգիայի ֆակուլտետի դասախոսներին, ուսանողներին, շրջանավարտներին, ներկա և նախկին ՈՒԳԸ-ականներին, հարակից ոլորտների հետազոտողներին և գիտությամբ հետաքրքրված երիտասարդներին՝ սահմաններից ու սահմանափակումներից դուրս խոսելու սեփական գիտական մտորումների մասին։
«Սոցքեմփ»-ի տասնամյա գաղափարի հիմքում գիտությունն է՝ սահմաններից դուրս, ոչ ֆորմալ, ազատ և անմիջական միջավայրում։ Այս անգամ ամենամյա կոնֆերանսը հնարավորություն տվեց ավելի քան երեսուն մասնակցի համախմբվելու գիտական ամենատարբեր քննարկումների շուրջ, ունկնդրելու ամենահետաքրքիր բանախոսությունները, մասնակցելու խմբային քննարկումների, հաստատելու սոցիալական նոր կապեր։
Հուլիսի 27-29 անցկացված եռօրյա կոնֆերանսը մեկնարկեց մասնակիցների ծանոթությամբ և խմբային խաղերով, ինչից հետո ներկաներն ունկնդրեցին Սոցիոլոգիայի տեսության և պատմության ամբիոնի դասախոս Գագիկ Թումանյանի «Սոցիոլոգիական հայացք մեմերի համացանցին» խորագրով բանախոսությունը, որին էլ հաջորդեց թեմայի շուրջ խմբային աշխատանքը։
Հաջորդիվ քննարկումները վերափոխվեցին սոցիալական արժեքների վերաբերյալ բանավեճերի։ «Արժեքների փոխարինում» առաջադրանքի շրջանակում մասնակիցները միմյանց հետ քննարկեցին նախապես ընտրված արժեքները, այնուհետև տեսականորեն հիմնավորեցին և ներկայացրին յուրաքանչյուրի սոցիալական նշանակությունն ու սեփական դիտանկյունը։
Ամբողջացնելով մեդիամիջավայրի և մշակույթի մասին քննարկումները՝ կոնֆերանսի առաջին օրը՝ մինչև ուշ երեկո, մասնակիցները հանդես եկան զեկուցումներով, որոնց թվում էին «Մեդիան և մենակությունը. ինչպե՞ս են սոցիալական ցանցերն ու մասսայական մշակույթը ձևավորում մեկուսացումը», «Ինչպե՞ս է կինոն ռոմանտիզացնում մարդասպաններին․ սոցիոլոգիական վերլուծություն», «Հայկական ֆիլմերը՝ որպես իրականության ռեֆլեքսիա» և այլ թեմաներով զեկուցումներ։
Կոնֆերանսի երկրորդ օրվա զեկուցումներն ընդգրկում էին ենթամշակույթների, Երևանի բակերի փոխակերպումների, տարածական փոփոխությունների, գյուղականության ճգնաժամի և այսօրինակ այլ արդիական թեմաներ։
Երկու օրերի ընթացքում ձեռք բերված սոցիալական կապերն ամրապնդելու նպատակով ուսանողները, դասախոսները, բանախոսները և մյուս ներկաները մասնակից դարձան «Սոցիալական բինգո» խմբային խաղին, որի ընթացքում նախապես տրամադրված հարցաշարով միմյանց հետ քննարկեցին սեփական հետաքրքրությունները և վեր հանեցին նմանությունները։ Այնուհետև «ReCity. ռեֆլեքսիա» խորագրով պանելային քննարկման շրջանակում Տարածքային ուսումնասիրությունների և զարգացման լաբորատորիայի հետազոտողներ Հ. Վերմիշյանը, Ա. Վարտիկյանը, Ա. Ղալամդարյանը և Շ. Աբրահամյանը ներկայացրին իրենց հետազոտական մոտեցումները, հետարդյունաբերական քաղաքների փոխակերպման վերաբերյալ հետազոտական արդյունքները և դիտարկումները, պատասխանեցին ունկնդիրների հարցերին՝ առաջ քաշելով թեմատիկ նոր հարցադրումներ։
Շարունակելով և ամբողջացնելով քաղաքային ուսումնասիրությունների թեման՝ մասնակիցները շրջեցին Ծաղկաձորում, լուսանկարեցին քաղաքը՝ դուրս բերելով արդարության, հավասարության, դատարկության և քաղաքի իրավունքի իրացման խնդիրները՝ հընթացս քննարկելով այն նաև տեսականորեն։
Կոնֆերանսի ավարտին վերարժևորելով գիտաժողովի տասնամյա ավանդույթները՝ գիտական միջոցառման գաղափարի առաջին իրագործողներն ու կազմակերպիչները խարույկի շուրջ վերհիշեցին «Սոցքեմփ»-ի ստեղծման պատմությունը, դիտեցին կոնֆերանսի մասին պատմող ֆիլմ, կիսվեցին հիշողություններով՝ ներկաներին մտովի տեղափոխելով ավելի վաղ տարիներ։
