Պանելային քննարկումները ֆորումի այն առանցքային ձևաչափերից են, որոնց միջոցով տարբեր ոլորտների մասնագետներ, շրջանավարտներ և գործընկերներ մեկ հարթակում կքննարկեն ժամանակակից աշխարհի կարևոր մարտահրավերներն ու հնարավորությունները։ Քննարկումների թեմաները միտված են բացահայտելու ԵՊՀ դերակատարությունը որպես մտավոր, գիտակրթական և հասարակական ազդեցության կենտրոն, հայագիտության միջազգային նշանակությունը, նորարարական էկոհամակարգերի ձևավորումը, «կանաչ» զարգացման օրակարգն ու բարձրագույն կրթության վերափոխումները։ Այս ձևաչափը հնարավորություն է ստեղծում ոչ միայն կարծիքների փոխանակման, այլև նոր մոտեցումների ու համագործակցության ուղղությունների ձևավորման համար։
Պանելային քննարկումները կանցկացվեն հետևյալ թեմաներով՝
1․ Կրթության փոխակերպումներ. ինչպե՞ս է ժամանակակից աշխարհը վերաիմաստավորում կրթությունը
Ժամանակակից աշխարհը արագ փոխվում է, և այդ փոփոխությունների կենտրոնում կրթությունն է՝ իր բովանդակությամբ, ձևաչափերով, մեթոդներով ու նպատակներով։
ԵՊՀ շրջանավարտների ֆորումի շրջանակում «Կրթության փոխակերպումներ. ինչպե՞ս է ժամանակակից աշխարհը վերաիմաստավորում կրթությունը» խորագրով պանելային քննարկման ընթացքում կխոսենք այն մասին, թե՝
ինչ գործոններ են այսօր ազդում կրթության, հատկապես՝ բարձրագույն կրթության վրա,
ինչ հնարավորություններ ու մարտահրավերներ են ձևավորվում համալսարանների համար,
ինչպես կարող է կրթական համակարգը վերակազմակերպվել՝ արձագանքելով այսօրվա ու վաղվա պահանջներին։
Քննարկումը չի սահմանափակվելու միայն հարցեր բարձրացնելով։ Այն միտված է դառնալու գաղափարների փոխանակման հարթակ, որտեղ կրթության ապագայի մասին խոսակցությունը կարող է վերածվել նոր ծրագրերի, համագործակցությունների և համալսարանական նախաձեռնությունների։
2․ COP-17. Հայաստանը գլոբալ բնապահպանական օրակարգի կենտրոնում. ակադեմիական համայնքի առաջնահերթությունները
Հայաստանը գլոբալ բնապահպանական օրակարգի կենտրոնում է, և այս համատեքստում կարևոր է հասկանալ՝ ինչ նշանակություն ունի «COP-17»-ը աշխարհի, Հայաստանի և հատկապես ակադեմիական համայնքի համար։
ԵՊՀ շրջանավարտների ֆորումի շրջանակում «COP-17. Հայաստանը գլոբալ բնապահպանական օրակարգի կենտրոնում. ակադեմիական համայնքի առաջնահերթությունները» խորագրով պանելային քննարկման ընթացքում կխոսենք այն մասին, թե՝
բովանդակային և քաղաքական ինչ նշանակություն ունի համաժողովը Հայաստանի և աշխարհի համար,
ինչ դեր կարող են ունենալ պետությունը, ակադեմիական համայնքը և ոլորտի մյուս դերակատարները,
ինչպես կարող են համալսարանական գիտելիքն ու փորձագիտական ներուժը նպաստել բնապահպանական օրակարգի ձևավորմանն ու իրականացմանը։
Քննարկումը միտված է ոչ միայն խնդիրների ու առաջնահերթությունների վերհանմանը, այլև գործնական գաղափարների ձևավորմանը, որոնք կարող են վերածվել նոր ծրագրերի, համագործակցությունների և համալսարանական նախաձեռնությունների։
3․ ԵՊՀ նորարարական էկոհամակարգի զարգացման հնարավորություններն ու մարտահրավերները
Նորարարական էկոհամակարգի ձևավորումը ԵՊՀ զարգացման կարևոր ուղղություններից է․ այն հնարավորություն է տալիս համալսարանական գիտելիքը, հետազոտական ներուժն ու ստեղծարար գաղափարները վերածելու կիրառելի լուծումների։
ԵՊՀ շրջանավարտների ֆորումի շրջանակում «ԵՊՀ նորարարական էկոհամակարգի զարգացման հնարավորություններն ու մարտահրավերները» խորագրով պանելային քննարկման ընթացքում կխոսենք այն մասին, թե՝
- ինչ ներուժ ունի ԵՊՀ-ն նորարարական էկոհամակարգ ձևավորելու և զարգացնելու համար,
- ինչպես կարող են համալսարանական գիտելիքն ու հետազոտական արդյունքները վերածվել կիրառելի լուծումների,
- ինչ մոդելներով կարող է զարգանալ համալսարան-բիզնես արդյունավետ համագործակցությունը,
- ինչպես կարող են ԵՊՀ շրջանավարտները, միջազգային գործընկերներն ու Սփյուռքի ներուժը ներգրավվել նորարարական միջավայրի զարգացման գործում,
- կառուցվածքային, ֆինանսական և կառավարման ինչ լուծումներ են անհրաժեշտ էկոհամակարգի կայուն զարգացման համար,
- ինչպես օգնել ուսանողներին և դասախոսներին զարգացնելու նորարարական մտածողություն, գործնական հմտություններ և գաղափարները իրական նախագծերի վերածելու կարողություն։
Քննարկւմը միտված է ոչ միայն հնարավորությունների և մարտահրավերների վերհանմանը, այլև գործնական գաղափարների ձևավորմանը, որոնք կարող են նպաստել ԵՊՀ-ում նոր ծրագրերի, համագործակցությունների և նորարարական նախաձեռնությունների զարգացմանը։
4․ Հայագիտության զարգացման հեռանկարները
Ի՞նչ է հայագիտությունը․ միայն անցյալի ուսումնասիրությո՞ւն, թե՞ ներկան ձևավորող գիտելիք։
Մայիսի 16-ին ԵՊՀ-ում կայանալիք «Շրջանավարտների ֆորում-2026»-ի շրջանակում «Հայագիտության զարգացման հեռանկարները» խորագրով պանելային քննարկման առանցքում կլինեն հարցեր, որոնք այսօր կարևոր են ոչ միայն գիտական համայնքի, այլև ողջ Հայաստանի համար։
Այս պանելային քննարկմանը փորձելու ենք միասին բացահայտել հայագիտության սահմանները, ոլորտի դերակատարներին և ապագա հեռանկարները։
Ո՞ւր է «նայում» հայագիտությունն այսօր՝ դեպի նե՞րս, թե՞ դուրս։ Որքանո՞վ են այս երկու հայացքները լրացնում միմյանց։
Ի՞նչ է ակնկալվում հայագիտությունից՝ ակադեմիական գիտելի՞ք, քաղաքական որոշումների հի՞մք, թե՞ ինքնության վերաիմաստավորում։
Հայագիտությունը՝ որպես միջգիտակարգային դաշտ՝ պատմությունից մինչև քաղաքականություն, մշակույթից մինչև տեխնոլոգիա․ որտե՞ղ են դրա սահմանները։
Եվ վերջապես՝ ինչպե՞ս է փոխվել հայագիտությունը տարածաժամանակային համատեքստում։
Եթե քեզ հետաքրքիր է՝ ով է ձևավորում Հայաստանի մասին գիտելիքը, և ինչու դրա ուսումնասիրման հասցեատերը միայն ակադեմիական հանրույթը չպետք է լինի, ապա միացի՛ր քննարկմանը։
