ԵՊՀ մանկավարժության և կրթության զարգացման կենտրոնում (ՄԿԶԿ) մանկավարժահոգեբանական և ուսումնամեթոդական հմտություններ ապահովող (30 կրեդիտին համարժեք մոդուլներով) մանկավարժի հավաստագրման եռամսյա դասընթացի շրջանավարտներին հանդիսավորությամբ շնորհվեցին ավարտական վկայականները (երկլեզու)։
ՄԿԶԿ տնօրեն Ն. Հարությունյանը, շնորհավորելով և հաջողություն մաղթելով դասընթացը բարձր արդյունքներով ավարտած շրջանավարտներին, նշեց, որ մանկավարժի գործունեությունը ոչ միայն աշխատանք է, այլև առաքելություն։ Նա նաև ընդգծեց, որ ժամանակակից դպրոցը բարձրորակ մանկավարժներով համալրելու անհրաժեշտություն ունի՝ շրջանավարտներին հորդորելով մանկավարժի առաքելության ճանապարհին շարունակաբար կատարելագործել մասնագիտական գիտելիքներն ու մանկավարժական հմտությունները։
Մանկավարժության և կրթության զարգացման կենտրոնի դոցենտ Արմենուհի Աշիկյանը, կարևորելով դասընթացի նշանակությունը և շնորհավորելով շրջանավարտներին, նշեց, որ դասախոսական կազմը մեծ ոգևորությամբ ու պատրաստակամությամբ է ստանձնել այդ կարևոր գործընթացի պատասխանատվությունը։ Ընդգծելով ՄԿԶԿ-ի և դասընթացի մասնակիցների միջև ստեղծված համագործակցային կապը՝ նա մասնավորապես ասաց․ «Խնդիրները շատ են լինելու մանկավարժական գործունեության ընթացքում։ Խորհրդատվության և մեթոդական աջակցություն ցուցաբերելու նպատակով ԵՊՀ մանկավարժության և կրթության զարգացման կենտրոնի դռները միշտ բաց կլինեն մեր շրջանավարտների առջև»։
ՄԿԶԿ դոցենտ Լուսինե Հայրապետյանը շեշտեց, որ մասնագիտության հանդեպ սերն ու հետաքրքրվածությունը ինքնակատարելագործվելու և մասնագիտության մեջ վարպետանալու համար կարևոր նախապայմաններ են։ Նա մաղթեց հավատալ սեփական ուժերին և հավատարիմ մնալ երազանքին, որը նրանց մղում է դեպի մանկավարժություն, դպրոց, դեպի երեխայի հոգին։
Ռուսաց լեզվի ամբիոնի վարիչ, դոցենտ Նաիրա Մարտիրյանը, ընդգծելով ԵՊՀ մանկավարժության և կրթության զարգացման կենտրոնի դերը մանկավարժի որակավորման դասընթացները բարձր մակարդակով կազմակերպելու գործում, նշեց, որ մանկավարժի մասնագիտությունը, լինելով շատ պատվաբեր և հայրենակերտ, պատասխանատու մարդկանց կարիք է զգում։
«Իսկ այդպիսին ուսանողները դառնում են այս կենտրոնում, որովհետև ուսումնական գործընթացին վերաբերող ցանկացած հարցի ՄԿԶԿ-ի մասնագետները մոտենում են սրտացավորեն և բարձր պատասխանատվությամբ»,- հավելեց նա։
Պատմության դասախոս Սուսաննա Սերոբյանը ուսանողներին ուղղված իր խոսքում հատկապես կարևորեց ուսուցչի՝ ապրումակցելու, երեխաների հանդեպ հարգանքի և նվիրվածության կարողությունը։ Մանկավարժի դերը կարևորելով նաև աշակերտի արժեհամակարգի ձևավորմանը նպաստելու տեսանկյունից՝ նա շեշտեց, որ լավ մանկավարժը պետք է հայրենասիրության, պետականության պահպանման նվիրյալի, ազգային շահի և արժեքներ կրողի օրինակ լինի երեխաների համար։
Դասընթացին մասնակցած շրջանավարտներից Արեգ Հովհաննիսյանը, շնորհակալություն հատնելով պրոֆեսորադասախոսական կազմին, շեշտեց, որ դասընթացի արդյունքում ամբողջացրեց մանկավարժի մասնագիտության մասին իր պատկերացումներն ու գիտելիքները։ Նա փաստեց, որ ուսումնառության ընթացքում ավելի շատ է սիրել այդ մասնագիտությունը։
Ուսուցչի որակավորում ստանալու համար դասընթացին մասնակցում էր նաև մասնագիտական բազմամյա փորձ ունեցող Վահան Միսակյանը։
«Դասընթացի շնորհիվ ես տեսա անձնական օրինակներ, որոնք ապրում ու արարում են որպես ուսուցիչ, որոնք ամենօրյա իրենց նախաձեռնությունների մեջ ստեղծարար են և ոգեշնչող, փոխում են ուսուցչի մասին իմ պատկերացումները, օրինակելի մանկավարժի նոր չափանիշներ սահմանում ինձ համար։ Իմ կյանքում շատ բան է փոխել այս դասընթացը։ Այստեղ կարող ես գտնել քո կոչումը՝ որպես մարդ, առաքելությունը՝ որպես մասնագետ»,- նշեց նա։
Շնորհակալական խոսքով հանդես եկան նաև դասընթացի շրջանավարտներ Շ․ Դանոյանը և Գ․ Մարտիրոսյանը՝ շեշտելով դասընթացի կարևորությունը, ինչպես նաև դասախոսական կազմի մասնագիտական պատրաստվածությունն ու ակադեմիական գրավիչ մթնոլորտը:
Միջոցառման ավարտին շրջանավարտներն ավարտական վկայականները (երկլեզու) հանդիսավորությամբ ստացան ԵՊՀ մանկավարժության և կրթության զարգացման կենտրոնի տնօրեն Ն. Հարությունյանից և դասընթացի պատասխանատու Ա. Աշիկյանից։
Հավելենք, որ միջոցառմանը մասնակցեցին ՄԿԶԿ պրոֆեսորադասախոսական կազմը, դասընթացներին ներգրավված հրավիրյալ դասախոսներ, հյուրեր։
