Ս.թ. հունվարի 24-26-ը ԵՊՀ եվրոպական ուսումնասիրությունների կենտրոնում կայացավ ««Եվրոպագիտություն. իրավունք, կառավարում և հաղորդակցություն» համատեղ մագիստրոսական ծրագրի մշակում» (DEGES) նախագծի ամփոփումը։ Նախագիծն առաջին անգամ է իրականացվում Հայաստանում «Erasmus Mundus Design Measures» գործիքի կիրառմամբ:
DEGES ծրագիրն իրականացվում է Երևանի պետական համալսարանի եվրոպական ուսումնասիրությունների կենտրոնի և Վիլնյուսի, Վիձեմեի կիրառական գիտությունների, Թբիլիսիի պետական և Լյուբլյանայի համալսարանների համագործակցության շրջանակում:
Հունվարի 24-ին «Եվրոպագիտություն. իրավունք, կառավարում և հաղորդակցություն համատեղ մագիստրոսական ծրագրի մշակում» (DEGES) նախագծի շրջանակում անցկացվեց ծրագրի գործընկեր համալսարանների ներկայացուցիչների հանդիպում, քննարկվեցին կատարված աշխատանքները։
Հունվարի 25-ին գործընկերները քննարկեցին «Համատեղ մագիստրոսական ծրագրերը Եվրոպայում և դրանից դուրս» ծրագրերի հիմնադրման, խնդիրների և ձեռքբերումների, համատեղ ծրագրերի որակի ապահովման և հավատարմագրման, ինչպես նաև համատեղ աստիճանների շնորհման ապագայի (նորարարություն ուսումնական ծրագրում, ուսանողների շարժունակություն, ներառականություն) վերաբերյալ մի շարք հարցեր։
Միջոցառման շրջանակում ելույթ ունեցան ԵՊՀ գիտական հարցերի գծով պրոռեկտոր Ռաֆայել Բարխուդարյանը, ԵՊՀ եվրոպական ուսումնասիրությունների կենտրոնի տնօրեն Վլադիմիր Մարտիրոսյանը, Վիձեմեի կիրառական գիտությունների համալսարանի ակադեմիական հարցերի գծով պրոռեկտոր Կերլիս Կրեսլինշը և Հայաստանում «Էրազմուս+» ազգային գրասենյակի ծրագրերի մենեջեր Արփինե Ջրաղացպանյանը։
Միջոցառման երկրորդ մասում անցկացվեցին պանելային քննարկումներ, որոնց շրջանակում մասնակիցները և մոդերատորները անդրադարձան և քննարկեցին համատեղ մագիստրոսական ծրագրերի, որակի ապահովման մեխանիզմների և համատեղ մագիստրոսական ծրագրերի ապագայի հետ կապված մարտահրավերներն ու հնարավորությունները:
Առաջին պանելային քննարկմանը մասնակցում էին Եվրասիա միջազգային համալսարանը ներկայացնող դոկտոր Աննա Խվորոստյանկինան և Թբիլիսիի պետական համալսարանի եվրոպական ուսումնասիրությունների ինստիտուտը ներկայացնող դոկտոր Նինո Լապիաշվիլին:
Երկու բանախոսներն էլ քննարկեցին իրենց առջև ծառացած մարտահրավերները և ընդգծեցին այն հնարավորությունները, որոնք համատեղ (կրկնակի) ծրագրերն առաջարկում են ուսանողներին, իսկ երկրորդ պանելային քննարկումը վարում էր «Մասնագիտական կրթության որակի ապահովման ազգային կենտրոն» հիմնադրամի (ՈԱԱԿ) տնօրեն Ռուբեն Թոփչյանը:
Մասնակիցները խոսեցին համատեղ (կրկնակի) մագիստրոսական ծրագրերի որակի ապահովման և հավատարմագրման կարևորության, ծրագրի կարիքների և արդյունքների, ծրագրի հավատարմագրման առանձնահատկությունների մասին: Քննարկման մասնակիցներն էին ՀՀ ԳԱԱ ԳԿՄԿ դեկան Ատոմ Մխիթարյանը, Թբիլիսիի պետական համալսարանի գիտական հետազոտությունների և զարգացման բաժնի վարիչ Սանդրո Տաբատաձեն և Վիլնյուսի համալսարանի ուսումնական բաժնի ավագ մասնագետ Դովիլե Սավիչյուտեն:
Վերջին պանելային քննարկումն առնչվում էր համատեղ (կրկնակի) մագիստրոսական ծրագրերի ապագա խնդիրներին: Քննարկման մասնակիցներն էին Երևանի պետական համալսարանի գիտական հարցերի գծով պրոռեկտոր Ռաֆայել Բարխուդարյանը, Վիձեմեի կիրառական գիտությունների համալսարանի ակադեմիական գծով պրոռեկտոր Կարլիս Կրեսլիսը և Խաչատուր Աբովյանի անվան հայկական պետական մանկավարժական համալսարանի պրոռեկտոր Մարիաննա Հարությունյանը։ Վահանակը վարում էր Վիձեմեի կիրառական գիտությունների համալսարանի տեղեկատվության և հաղորդակցության գիտության տնօրեն Մառա Արաջան:
Միջոցառմանն ընգծվեց կրթական ծրագրերի արդիականացման և միջազգայնացման կարևորությունը, ինչպես նաև գործընկեր համալսարանների կարողությունների զարգացումն ու ներդրումը համատեղ մագիստրոսական ծրագրերի իրականացման գործընթացում։
Հունվարի 26-ին ԵՊՀ եվրոպական ուսումնասիրությունների կենտրոնում Վրաստանի կրթության որակի ազգային կենտրոնի մասնագետ Սանդրո Տաբատաձեն ներկայացրեց «Համատեղ մագիստրոսական ծրագրերի որակի ապահովումը և հավատարմագրումը» թեմայով սեմինար (workshop):
Նշենք, որ միջոցառմանը ներկա էին ԵՊՀ ներկայացուցիչները, գործընկեր համալսարանների համակարգողները և փորձագետները, ինչպես նաև Հայաստանի այլ բուհերի ներկայացուցիչները։
