ԵՊՀ արևելագիտության ֆակուլտետի նախաձեռնությամբ Վանաձորի «Ծիծեռնակ» ճամբարում հուլիսի 4-12-ը անցկացվել է միջազգային արևելագիտական ամառային դպրոց, որը կրում էր «Օրբելի - 2025» անվանումը՝ ի պատիվ աշխարհահռչակ հայ արևելագետ Հովսեփ Օրբելու։ Գիտական այս միջոցառման համակազմակերպիչներն էին արևելագիտական միջազգային այնպիսի խոշոր կենտրոններ, ինչպիսիք են Սանկտ Պետերբուրգի պետական համալսարանի արևելյան ֆակուլտետը և Մոսկվայի պետական համալսարանի Ասիայի և Աֆրիկայի երկրների ինստիտուտը։ Ամառային դպրոցի կազմակերպմանը աջակցել էին Երևանի պետական համալսարանը, Հայ Առաքելական Սուրբ եկեղեցու Գուգարաց թեմը, ՀՀ ԳԱԱ հովանու ներքո գործող «Հայագիտական ուսումնասիրությունները ֆինանսավորող համահայկական հիմնադրամը» և Երևանում գիտության և մշակույթի ռուսաստանյան կենտրոնը (Ռոսսոտրուդնիչեստվո)։
Բացման խոսքում ԵՊՀ արևելագիտության ֆակուլտետի դեկան, պ.գ.դ., պրոֆեսոր Ռուբեն Մելքոնյանը նշեց. «Սա մեր ռուսաստանյան գործընկեր կազմակերպությունների՝ Մոսկվայի պետական համալսարանի Ասիայի և Աֆրիկայի երկրների ինստիտուտի և Սանկտ Պետերբուրգի պետական համալսարանի արևելյան ֆակուլտետի հետ իրականացվող առաջին ամառային ուսանողական ճամբարն է, որը մեր լայն համագործակցության ուղղություններից մեկն է։ Հայկական և ռուսական արևելագիտական դպրոցներն ունեն ընդհանուր ավանդույթներ, և կարևոր է, որպեսզի երիտասարդ սերնդի արևելագետները ոչ միայն իմանան այդ մասին, այլև շարունակեն դրանք, և ես հուսով եմ, որ ամառային դպրոցը կնպաստի դրան»։
Ամառային դպրոցի ծրագիրը բաղկացած էր ակադեմիական ինտենսիվ ծրագրից, որը ներառում էր արևելագիտության ու հայագիտության հատման տիրույթում գտնվող տասնյակ դասախոսություններ, քննարկումներ և գործնական պարապմունքներ։ «Օրբելի – 2025» դպրոցի շրջանակում հանդես են եկել շուրջ 30 արևելագետ մասնագետներ ԵՊՀ-ից, ՀՀ գիտությունների ազգային ակադեմիայից, Մատենադարանից, Հայաստանի ամերիկյան համալսարանից, Մոսկվայի ու Սանկտ Պետերբուրգի արևելագիտական կենտրոններից։ Դպրոցի շրջանակում դասախոսություններ են ներկայացրել նաև համակազմակերպիչ կողմ հանդիսացող կառույցների ղեկավարները՝ պ.գ.դ., պրոֆեսոր Ա. Մասլովը (ՄՊՀ Ասիայի և Աֆրիկայի երկրների ինստիտուտի տնօրեն) և Ա. Ռոդիոնովը (ՍՊՊՀ արևելյան ֆակուլտետի դեկանի առաջին տեղակալ)։ Ոչ ֆորմալ հանդիպման ձևաչափով մասնակիցների հետ հանդիպել են ՀՀ-ում Իրանի Իսլամական Հանրապետության դեսպան Մ. Սոբհանին, ՀՀ ՌԴ դեսպան Ս. Կոպիրկինը, փորձառու դիվանագետներ։
Դպրոցի մասնակիցների թվում էին ԵՊՀ արևելագիտության ֆակուլտետի, Մոսկվայի պետական համալսարանի և Սանկտ Պետերբուրգի պետական համալսարանի արևելագիտական ուղղության ուսանողները (ընդհանուր՝ 55 մասնակից)։ Նրանք հնարավորություն են ունեցել ոչ միայն ունկնդրելու ծրագրի ակադեմիական մասը, այլև մասնակցելու ճանաչողական այցերին դեպի Օրբելի եղբայրների թանգարան, Սևանավանք, Սևանի Վազգենյան հոգևոր դպրանոց, Հաղպատի ու Սանահինի վանական համալիրներ, Միկոյան եղբայրների թանգարան, Գյումրի քաղաք և այլն։
Ամառային դպրոցի ավարտին ծրագիրը հաջողությամբ յուրացրած ուսանողները ստացել են ավարտական վկայական։
«Օրբելի» միջազգային արևելագիտական դպրոցը կրելու է ամենամյա բնույթ. «Օրբելի – 2026»-ը անցկացվելու է Սանկտ Պետերբուրգ քաղաքում։
