ԵՊՀ փիլիսոփայության և հոգեբանության ֆակուլտետի ՈՒԳԸ-ի, Անձի հոգեբանության ամբիոնի, «Mental Health Awareness Initiative» կազմակերպության և «Դեղին կակաչ նախագծի» հետ համագործակցության շրջանակում մայիսի 15-ին տեղի ունեցավ «Փոփոխության ձայներ. համայնքը, ստեղծագործականությունն ու հոգատարությունը՝ հոգեկան առողջության համատեքստում» խորագրով միջոցառումը։
Հոգեկան առողջության իրազեկման ամիսը նշանավորող միջոցառման նպատակն էր կենտրոնանալ տարվա թեմայի՝ համայնքի վրա՝ ընդգծելով համայնքի դերը ինչպես հոգեկան բարեկեցության լավարկման, այնպես էլ հոգեկան առողջության շուրջ հասարակության մեջ գոյություն ունեցող խարանը հաղթահարելու գործընթացներում։
Միջոցառումը, մասնակիցներին միավորելով բովանդակալից զրույցի և ոգեշնչման շուրջ, հնարավորություն ընձեռեց խոսելու հոգեկան առողջության առկա մարտահրավերների մասին և քննարկելու, թե ինչպես խթանել դրական փոփոխությունները, բարձրացնել իրազեկվածությունը և բարելավել հոգեկան առողջության խնամքի հասանելիությունը բոլորի համար։
Միջոցառման բանախոսները հանդես եկան այնպիսի թեմաներով, ինչպիսիք են՝ «Հոգեկան առողջության իրազեկվածության դերը համայնքի զարգացման մեջ. հայկական համատեքստ» (Գևորգ Ղարիբյան, կլինիկական և գիտական ղեկավար, «Հոգեկան առողջության իրազեկման նախաձեռնություն» ՀԿ), «Պատմողականության, արվեստի և բնության վրա հիմնված միջամտությունների կիրառումը հոգեկան առողջության խարանի հաղթահարման մեջ» (Սյուզան Ֆոքս, գլոբալ նախաձեռնությունների տնօրեն, «Դեղին կակաչ նախագիծ»), «CARe մոտեցումը հոգեկան առողջությանը. ինչպես զարգացնել խարանից զերծ պրակտիկաներ» (Նարինե Խաչատրյան, ԵՊՀ փիլիսոփայության և հոգեբանության ֆակուլտետի անձի հոգեբանության ամբիոնի վարիչ)։
