Կենսաքիմիայի, մանրէաբանության և կենսատեխնոլոգիայի ամբիոն

Կենսաքիմիայի, մանրէաբանության և կենսատեխնոլոգիայի ամբիոնը կազմավորվել է Կենսաքիմիայի և Մանրէաբանության, Բույսերի և մանրէների կենսատեխնոլոգիայի ամբիոնների հիմքի վրա: Այն հիմնադրել է ՀՀ ԳԱԱ թղթակից անդամ, պրոֆեսոր Արմեն Թռչունյանը 2016 թ.։ Ա. Թռչունյանը մեծ ներդրում է ունեցել ամբիոնի զարգացման գործում. նրա ղեկավարման տարիներին ամբիոնի ուսումնագիտական լաբորատորիաները համալրվել են վերջին սերնդի սարքավորումներով, տպագրվել ուսումնամեթոդական տասնյակից ավելի ձեռնարկներ և բարձր ազդեցության գործակցով ամսագրերում գրախոսվող հոդվածներ:

Ամբիոնում կատարվող հիմնարար և կիրառական հետազոտություններն ընդգրկում են էուկարիոտ օրգանիզմներում ուռուցքառաջացման մեխանիզմների in vitro և in vivo հետազոտությունները, դրանց՝ քիմիաթերապևտիկ և բուսական հիմքով միացությունների կիրառմամբ նոր մոդելներով բուժման ուսումնասիրությունները, հակաշաքարախտային նոր մոդելի հետազոտությունները, օքսիդատիվ սթրեսի հետ կապված նյութափոխանակության փոփոխությունների գնահատումը: Ամբիոնում կատարվում են մանրէների կենսաէներգետիկայի ուսումնասիրություն, կենսաէներգիայի արտադրության մեխանիզմների ու դրանց կարգավորման նոր ուղիների բացահայտում և կիրառման երաշխավորությունների մշակում, օրգանական թափոնների ֆիզիկաքիմիական և կենսաբանական ճանապարհներով մշակում և մանրէների համար որպես սննդամիջավայր կիրառում՝ կենսատեխնոլոգիական կարևոր վերջանյութ ստանալու նպատակով: Ամբիոնի հետազոտողները կատարում են Հայաստանի էկոլոգիական տարբեր խորշերից, ինչպես նաև սննդամթերքից մանրէների անջատում, նրանց բազմազանության ուսումնասիրություն և դրանց կենսատեխնոլոգիական ներուժի գնահատում, Հայաստանի ֆլորայի էնդեմիկ, վտանգված կամ հազվագյուտ տարբեր բուսատեսակների մեկուսացված կուլտուրաների ստացում, դրանց հատկությունների ուսումնասիրում և կիրառման ուղիների մշակում:

Ամբիոնում աշխատում են միջազգայնորեն ճանաչված և առաջատար մասնագետներ, որոնք ներգրավված են միջազգային ու տեղական դրամաշնորհային ծրագրերում, պարբերաբար անցնում են վերապատրաստումներ: Ամբիոնի պրոֆեսորադասախոսական անձնակազմը հեղինակ է ուսումնամեթոդական բազմաթիվ ձեռնարկների, մենագրությունների, դպրոցական դասագրքերի, գիտական հոդվածների, այդ թվում՝ տպագրված բարձր ազդեցության գործակից ունեցող պարբերականներում:

2021 թվականից Կենսաքիմիայի, մանրէաբանության և կենսատեխնոլոգիայի ամբիոնի վարիչն է կենսաբանական գիտությունների դոկտոր, դոցենտ Աննա Փոլադյանը։

Ամբիոնն իրականացնում է «Կենսաքիմիա և կենսատեխնոլոգիա» բակալավրիատական և «Ընդհանուր և բժշկական կենսաքիմիա», «Կիրառական մանրէաբանություն», «Մանրէաբանություն և կենսատեխնոլոգիա» մագիստրասական կրթական ծրագրերը: