ԱԲ-ն՝ ուսանողի առօրյա աշխատանքում. ԵՊՀ-ում ներկայացվեցին ԱԲ-ի գործնական կիրառությունները

Հանդիպման ընթացքում մասնակիցները տեսան, թե ինչպես կարելի է ԱԲ գործիքների միջոցով աշխատել ֆայլերի և տվյալների հետ, արագացնել առօրյա առաջադրանքների կատարումը, կազմակերպել մեծածավալ տեղեկատվությունը և վերամշակել արդեն իսկ ունեցած նյութը։ Ներկայացվեցին նաև ճիշտ ձևակերպված առաջադրանքների միջոցով ավելի նպատակային արդյունքներ ստանալու տարբերակներ։

Հանդիպման բանախոս, «ServiceTitan»-ի առաջատար ծրագրային ապահովման ինժեներ, «Armenian Code Academy»-ի ԱԲ ուղղության ղեկավար Գոռ Գրիգորյանի խոսքով՝ հանդիպման հիմնական նպատակը պարզապես ԱԲ-ի մասին տեղեկություն փոխանցելը չէր, այլ ուսանողներին ցույց տալը, թե ինչ կարող են անել արդեն այսօր հասանելի գործիքների միջոցով։

«Գլխավոր միտքն այն է, որ մարդիկ հասկանան՝ ինչ գործիքներ կան հիմա, և որքան հեշտությամբ կարելի է դրանք օգտագործել սեփական կարիքների համար»,- նշեց Գոռ Գրիգորյանը։

Ըստ բանախոսի՝ հանդիպման թեման ընտրվել է՝ հաշվի առնելով արհեստական բանականության գործիքների վերջին շրջանի զարգացումները և դրանց կիրառման ընդլայնվող հնարավորությունները։

«Փորձելու ենք գործնական օրինակներով ներկայացնել տարբեր գործիքներ և մարդկանց ցույց տալ, որ արհեստական բանականությունը կարելի է պարզ հասկանալ և սկսել կիրառել»,- ասաց նա։

Այս համատեքստում Գոռ Գրիգորյանն առանձնացրեց «Claude» արհեստական բանականության գործիքի, մասնավորապես՝ «Claude Code»-ի հնարավորությունները՝ ընդգծելով, որ կարևոր է ոչ միայն իմանալ, թե ինչ գործիքներ կան, այլև հասկանալ՝ ինչպես ճիշտ օգտագործել դրանք։

«Եթե ես ու դու ունենք նույն «ChatGPT»-ի պատուհանը, ապա ինչո՞ւ է քեզ մոտ գործիքն ավելի լավ արդյունք տալիս, իսկ ինձ մոտ՝ վատ։ Մենք այսօր փորձելու ենք հենց այդ հարցի պատասխանը տալ՝ ցույց տալով, թե ինչպես տարբեր մարդիկ կարող են օգտագործել նույն գործիքը տարբեր արդյունավետությամբ»,- ընդգծեց Գոռ Գրիգորյանը։

Հանդիպման ընթացքում մասնակիցներին ներկայացվեցին նաև ԱԲ-ից ավելի արդյունավետ օգտվելու գործնական եղանակներ։ Օրինակ՝ «Claude Code»-ի դեպքում խոսքը միայն կոդ գրելու մասին չէ․ գործիքը կարող է օգնել ավտոմատացնելու առօրյա և կրկնվող աշխատանքները։

«Եթե ձեր առօրյայում ունեք որևէ կրկնվող աշխատանք, այն հնարավոր է ավտոմատացնել։ Դա կարող է կիրառվել ամենատարբեր խնդիրների համար՝ որևէ թեմա սովորելուց և աշխատանք կատարելուց մինչև արտադրանք ստեղծելն ու գաղափարի շուրջ աշխատելը։ Հնարավորություններն իսկապես շատ են, և կարևոր է հասկանալ՝ ինչպես և ինչի համար օգտագործել այդ գործիքները»,- ասաց նա։

Հանդիպման ավարտին մասնակիցները հարցեր ուղղեցին բանախոսին, ներկայացրին ԱԲ գործիքների կիրառման սեփական փորձը և քննարկեցին դրանց օգտագործման հնարավորությունները կրթական ու աշխատանքային տարբեր խնդիրներում։ Ուսանողների հարցերն ու քննարկումները հիմնականում վերաբերում էին ԱԲ-ի արդյունավետ օգտագործմանը, ճիշտ հարցումների ձևակերպմանը, առօրյա աշխատանքների ավտոմատացմանը և նոր գործիքների հնարավորություններին։ 

ԵՊՀ-ում ուսանողների հետ հանդիպումը նաև ավելի վաղ իրականացված համագործակցության շարունակությունն էր։ Նախկինում ACA-ն համալսարանի դասախոսների համար կազմակերպել էր վերապատրաստման ծրագիր, որի շրջանակում մոտ 15-20 դասախոսներ վերապատրաստվել էին արհեստական բանականության գործիքների կիրառման ուղղությամբ։ Գ. Գրիգորյանի խոսքով՝ տասը դասի ընթացքում դասախոսները ստեղծել էին վերջնական աշխատանքներ՝ կիրառելով արհեստական բանականության գործիքները կրթական և աշխատանքային տարբեր խնդիրներում։

«AI on Campus–YSU» նախաձեռնության շրջանակում կազմակերպված հանդիպումը ԵՊՀ-ում ACA-ի հետ համագործակցության հերթական ձևաչափն էր՝ այս անգամ ուղղված ուսանողների համար ԱԲ գործիքների գործնական կիրառությունների ներկայացմանը։