ԵՊՀ-ն և Արևելագիտության ինստիտուտն ընդլայնում են համագործակցության շրջանակը

Երևանի պետական համալսարանի ռեկտոր Հովհաննես Հովհաննիսյանը և Արևելագիտության ինստիտուտի տնօրեն Գոհար Իսկանդարյանը ստորագրեցին համագործակցության հուշագիր՝ երկու կառույցների միջև համագործակցությունն ամրապնդելու նպատակով։

Հուշագրով կողմերն ընդգծեցին կրթության և գիտության ոլորտներում համագործակցության զարգացման կարևորությունն ու պատրաստակամություն հայտնեցին իրականացնելու համատեղ ծրագրեր։

Համագործակցությունը ներառելու է գիտահետազոտական և գիտամեթոդական աշխատանքներ, տարածաշրջանային ուսումնասիրություններ, ինչպես նաև գիտակրթական միջոցառումներ։ Առանձնահատուկ ուշադրություն է դարձվելու ակադեմիական շարժունությանը, առաջավոր փորձի փոխանակմանը և մասնագիտական զարգացմանը։ Կողմերը նախատեսում են առավել արդյունավետ օգտագործել միմյանց մասնագիտական կարողություններն ու առկա ներուժը փոխադարձ հետաքրքրություն ներկայացնող ոլորտներում։ 

Համագործակցության շրջանակում նախատեսվում է գիտական հրապարակումների փոխադարձ գրախոսություն, ինչպես նաև սահմանված կարգով համատեղ հետազոտությունների արդյունքների հրապարակում Արևելագիտության ինստիտուտի և ԵՊՀ գիտական պարբերականներում։ Կողմերը համատեղ մշակելու են նաև դասագրքեր, ուսումնամեթոդական նյութեր և կրթական ու գիտական այլ աշխատանքներ։

Կողմերը նախատեսում են համագործակցել նաև դրամաշնորհային և արտաքին ֆինանսավորմամբ կրթական, գիտական ու գիտահետազոտական ծրագրերի իրականացման ուղղությամբ։ Հուշագրով նախատեսվում է նաև գիտատեղեկատվական ռեսուրսների համատեղ օգտագործում, մասնագիտական և խորհրդատվական համագործակցություն, ինչպես նաև երկու կառույցների փորձագիտական ներուժի ներգրավում համատեղ ուսումնասիրություններում, քննարկումներում և ծրագրերում։

Հանդիպման ավարտին կողմերն ընդգծեցին, որ համագործակցությունը կնպաստի կրթական և ակադեմիական բարենպաստ միջավայրի ձևավորմանն ու աշխատաշուկայի պահանջներին համապատասխան գիտահենք կրթության զարգացմանը։