Գիտելիքը՝ հանուն կյանքի․ ԵՊՀ ուսանողները թարգմանչական աջակցություն են ցուցաբերել Գազայից Հայաստան տեղափոխված երեխաներին

ՀՀ արտաքին գործերի և միջազգային առևտրի ու առողջապահության նախարարությունների աջակցությամբ Հայաստան տեղափոխված երեխաներին ուղեկցել է մեկական ծնող։ ԵՊՀ արաբագիտության ամբիոնի վարիչ Հայկ Քոչարյանի նախաձեռնությամբ ընտանիքներին աջակցելու աշխատանքներում ներգրավվել են ամբիոնի ուսանողները, որոնց թվում են Կարինե Արսենյանն ու Էլինա Ոսկանյանը։

Ուսանողները բժշկական կենտրոններում ուղեկցել են երեխաներին ու նրանց ծնողներին, աջակցել կենցաղային և կազմակերպական հարցերում, ինչպես նաև բանավոր թարգմանություն կատարել բուժման տարբեր փուլերում։

«Մենք թարգմանում էինք բժիշկների ցուցումները, ծնողների հարցերն ու մտահոգությունները, վիրահատության ընթացքի և հնարավոր ռիսկերի մասին բացատրությունները։ Սկզբում աջակցում էինք կազմակերպական ու կենցաղային հարցերով, որպեսզի ընտանիքները հարմարվեն նոր միջավայրին, իսկ հետո սկսվեց բուն բժշկական թարգմանության գործընթացը»,- պատմում է Կարինեն։

Մասնագիտական հմտություններ և հոգեբանական պատասխանատվություն

Ուսանողների խոսքով՝ լեզվական ու տերմինաբանական դժվարություններից բացի՝ աշխատանքը նաև հոգեբանական մեծ պատասխանատվություն էր պահանջում։ Հատկապես կարևոր էր ծնողներին ճշգրիտ ու նրբանկատորեն փոխանցել բժիշկների բացատրությունները։

«Ամենաբարդը ծնողներին ռիսկերի մասին բժշկի խոսքը ճիշտ ու զգույշ փոխանցելն էր, որպեսզի հավելյալ անհանգստություն չառաջանա»,- նշում է Էլինան։

Ընտանիքների հետ հաղորդակցվելիս ուսանողներին օգնել են ԵՊՀ-ում ստացած գիտելիքներն ու Քուվեյթում մեկամյա ուսումնական ծրագրի ընթացքում զարգացրած լեզվական հմտությունները։ Գրական արաբերենի և բարբառների իմացությունը հնարավորություն է տվել հասկանալու ընտանիքների խոսքի առանձնահատկություններն ու ապահովելու հաղորդակցությունը բուժանձնակազմի հետ։

Ուսանողների խոսքով՝ այս փորձառությունն օգնել է գիտակցելու, թե համալսարանում ստացած գիտելիքներով ինչպես կարող են աջակցել դժվար իրավիճակում հայտնված մարդկանց։

Մասնագիտության ընտրությունից մինչև գիտելիքի գործնական կիրառում

Արաբագիտության ընտրությանը Կարինեն ու Էլինան հասել են տարբեր ճանապարհներով։ Էլինայի խոսքով՝ դեռ դպրոցական տարիներից իրեն գրավել են հումանիտար գիտությունները։ Արաբագիտությունն ընտրել է՝ հաշվի առնելով արաբերենի նկատմամբ իր հետաքրքրությունը, ոլորտի արդիականությունն ու մասնագիտական հեռանկարները։

Կարինեն սկզբում մտածել է բնագիտամաթեմատիկական ուղղությամբ ուսումը շարունակելու մասին, սակայն հետագայում հասկացել է, որ իր հետաքրքրություններին ու խառնվածքին ավելի համապատասխան է արաբագիտությունը։

ԵՊՀ-ում ուսումնառությունն ու Քուվեյթում ուսումնական ծրագրին մասնակցությունը նրանց հնարավորություն են տվել ձեռք բերելու այն գիտելիքներն ու հմտությունները, որոնք կիրառել են երեխաներին և նրանց ծնողներին աջակցելիս։

Աջակցությունը շարունակվում է

Ուսանողների տեղեկացմամբ՝ երեխաների հիմնական վիրահատություններն ավարտվել են, և նրանք հետվիրահատական վերականգնման փուլում են։

Կարինեն և Էլինան շարունակում են կապ պահպանել ընտանիքների հետ։ Նրանք պատրաստակամ են թարգմանչական աջակցություն ցուցաբերելու նաև հետագայում, եթե Գազայից բուժման նպատակով Հայաստան տեղափոխվեն այլ երեխաներ՝ իրենց ծնողների ուղեկցությամբ։