ՀՀ գլխավոր դատախազության շենքում գործում է ԵՊՀ իրավաբանական լաբորատորիան

ԵՊՀ իրավաբանական լաբորատորիան մասնագիտական ոչ ֆորմալ հարթակ է, որտեղ համատեղ ջանքերով կազմակերպվում են իրավական արդիական թեմաների շուրջ մասնագիտական քննարկումներ, գործնական աշխատանքներ, սեմինարներ և գիտաժողովներ, ինչպես նաև կատարվում են գիտական հետազոտություններ։

ԵՊՀ իրավագիտության ֆակուլտետի ուսանողները հնարավորություն ունեն լաբորատորիայում կատարելու գիտահետազոտական աշխատանքներ։ Բացի դրանից՝ մասնակցելով լաբորատորիայում անցկացվող գիտական տարբեր քննարկումների և գործնականում կիրառելով իրենց գիտելիքները՝ նրանք զարգացնում են իրենց մասնագիտական հմտությունները։ 

Ֆակուլտետի 4-րդ կուրսի ուսանող Բաբկեն Հարությունյանը, որն իր մասնագիտական պրակտիկան անցկացնում է ՀՀ գլխավոր դատախազությունում, պարբերաբար այցելում է Իրավաբանական լաբորատորիա։ Պրակտիկայի ընթացքում ձեռք բերելով գիտելիքներ դատախազության կառուցվածքի, գործառույթների և գործունեության առանձնահատկությունների վերաբերյալ՝ Բաբկենը անմիջականորեն մասնակցում է նաև գործնական աշխատանքների։ 

«Պրակտիկայի շրջանակում գրեթե ամեն օր այցելում ենք ԵՊՀ իրավաբանական լաբորատորիա, որտեղ առկա են անհրաժեշտ բոլոր պայմանները՝ կատարելու ուսումնառության ընթացքում հանձնարարվող առաջադրանքները։ Լաբորատորիան հնարավորություն է ընձեռում առավել խորությամբ ուսումնասիրելու մեր մասնագիտական ոլորտը՝ տրամադրելով անհրաժեշտ տեսական գրականություն, ինչպես նաև դառնալով հարթակ՝ ոլորտի առաջատար մասնագետների հետ համագործակցության և ակտիվ քննարկումների համար»,- ընդգծեց ԵՊՀ ուսանողը։

Լաբորատորիան համալրված է պարբերաբար թարմացվող մասնագիտական գրականությամբ և իրավական նյութերով, որոնք նպաստում են ուսումնառության և հետազոտական գործունեության արդյունավետ կազմակերպմանը։

Բացի դրանից՝ լաբորատորիայի գործունեության շրջանակում նախատեսվում է կազմակերպել սփյուռքահայ իրավաբանների և ուսանողների փոխադարձ այցելություններ՝ նպաստելով փորձի փոխանակմանը և մասնագիտական կապերի ամրապնդմանը։