Փետրվար 06, 2026 | 16:15
Կրթություն
Միջազգային համագործակցություն
Ուսանողական
Լեզուն՝ մշակույթները միավորող կամուրջ. ԵՊՀ ուսանողը՝ արտերկրում ուսումնառելու մասին
Ռուս բանասիրության ֆակուլտետի ուսանող Միլենա Ղանդիլյանը «Էրազմուս+» ծրագրի շրջանակում մեկ կիսամյակ սովորել է Պալացկու անվան համալսարանում (Օլոմոուց, Չեխիա)։ Նա արտերկրի բուհում ուսումնասիրել է «Միջմշակութային հաղորդակցություն», «Թարգմանության տեսություն», «Ռուս գրականություն» և այլ առարկաներ, ինչպես նաև բարելավել է չեխերենի և անգլերենի իմացությունը։
Պալացկու անվան համալսարանում Միլենան մեծ հետաքրքրությամբ ուսումնասիրել է ռուս գրականությունը եվրոպացի դասախոսների տեսանկյունից, ինչը նրան հնարավորություն է տվել նույն նյութը դիտարկելու նոր մեկնաբանություններով և համեմատական մոտեցմամբ։ Արտերկրում նրա ուսումնական կյանքը հագեցած էր նաև սեմինարներով և մշակութային միջոցառումներով։
«Չեխիայում ուսումնառելու ժամանակահատվածում մասնակցել եմ խմբային քննարկումների, ծանոթացել եվրոպական համալսարանների և կրթության կազմակերպման փորձին։ Ուսումնասիրված առարկաների շրջանակում ձեռք եմ բերել ոչ միայն մասնագիտական, այլև եվրոպական կրթական համակարգի, միջմշակութային հաղորդակցության և ակադեմիական շարժունակության վերաբերյալ գիտելիքներ»,- նշեց նա։
Միլենան այժմ սովորում է 4-րդ կուրսում, և նրա ավարտական աշխատանքը նվիրված է ռուսաց լեզվի ուսումնասիրությանը։
«Իմ հետաքրքրությունների շրջանակը ներառում է լեզվի ուսուցումը, հաղորդակցական մոտեցումները և լեզվի կիրառումը ժամանակակից մեդիայում»,– ասաց նա և հավելեց, որ ուսումնառությանը զուգահեռ՝ վարում է ռուսաց լեզվին նվիրված բլոգ, որտեղ ներկայացնում է լեզվական տարբեր նյութեր օտարերկրացիների համար. «Այդ թեմայով հետաքրքրված եմ, քանի որ լեզուն ինձ համար ոչ միայն ուսումնառության առարկա է, այլև հաղորդակցության և մշակույթների միջև կապի միջոց»։
Արտերկրում ուսանելը Միլենայի երազանքներից էր, որն իրագործվել է Ռուս բանասիրության ֆակուլտետի շնորհիվ։
«Ֆակուլտետը մեծ դերակատարում է ունեցել իմ երազանքի իրականացման և հաջող ուսումնառության գործում։ ԵՊՀ-ում ստացած հիմնարար գիտելիքները նպաստել են արտերկրում հաջող ուսումնառությանը»,- մատնանշեց Միլենան։
Խոսելով Պալացկու անվան համալսարանի դասախոսների մոտեցումներից՝ ԵՊՀ ուսանողն ընդգծեց․ «Արտերկրի բուհում դասախոսները ցուցաբերում էին բարեհաճ և աջակցող մոտեցում ուսանողների հետ շփումներում՝ խրախուսելով ակտիվ մասնակցությունն ու կարծիքների ազատ արտահայտումը։ ԵՊՀ-ում նույնպես դասախոսների փորձառությունն ու մասնագիտական մոտեցումը բարձր մակարդակի վրա են։ Երկու համալսարաններում էլ նկատելի է դասախոսների պատասխանատու վերաբերմունքը ուսանողների կրթական գործընթացի նկատմամբ»։
Բազմամշակութային միջավայրում ուսումնառության ընթացքում Միլենան զարգացրել է հաղորդակցական հմտությունները, ինչպես նաև տարբեր ազգերի ներկայացուցիչներին ներկայացրել հայկական մշակույթն ու ավանդույթները։
ԵՊՀ ուսանողը արտերկրում ստացած գիտելիքները կիրառելու է կրթության և լեզվաբանական ոլորտներում՝ նպաստելով միջազգային համագործակցության և միջմշակութային հաղորդակցության զարգացմանը: Նա նպատակադրվել է ապագայում աշխատել կրթության կամ միջազգային ծրագրերի ոլորտում՝ համատեղելով մասնագիտական զարգացումն ու մշակութային կապերի խորացումը։
Նշենք, որ ԵՊՀ ռուս բանասիրության ֆակուլտետի ուսանողներին առաջին անգամ է հնարավորություն տրվել «Էրազմուս+» ծրագրի շրջանակում ուսումնառությունը շարունակելու արտերկրում։
