Մաթեմատիկական միջազգային ուսանողական օլիմպիադայում հայաստանյան թիմի հաջողությունը. ԵՊՀ ուսանողները՝ ոսկե, արծաթե և բրոնզե մեդալակիրներ

Երկօրյա օլիմպիադայի յուրաքանչյուր մրցափուլ տևել է հինգ ժամ։ Մասնակիցները մրցել են աշխարհի ավելի քան 120 առաջատար համալսարանների շուրջ 450 ուսանողների հետ։

Մաթեմատիկական միջազգային ուսանողական օլիմպիադան անցկացվում է 1994 թվականից, իսկ Հայաստանի ներկայացուցիչները մասնակցում են 2005 թվականից։ Ամեն տարի այն համախմբում է աշխարհի առաջատար համալսարանների լավագույն ուսանողներին՝ դառնալով մաթեմատիկական կարողությունների, գիտական համագործակցության և միջազգային փորձի փոխանակման միջազգային հեղինակավոր հարթակներից մեկը։

Մրցույթում ԵՊՀ-ից ոսկե մեդալի է արժանացել Ինֆորմատիկայի և կիրառական մաթեմատիկայի ֆակուլտետի 2-րդ կուրսի ուսանող Վահան Բաղդասարյանը։ Նրա խոսքով՝ օլիմպիադայի գլխավոր արժեքը միայն գրանցած արդյունքը չէ, այլև մտածելու, նոր խնդիրներ լուծելու և աշխարհի տարբեր երկրների լավագույն ուսանողների հետ փորձի փոխանակման հնարավորությունը։

«Մեդալի մասին առանձնապես չէի մտածում։ Ինձ համար առաջնայինը խնդիրների լուծման գործընթացն էր։ Մրցույթից առաջ էլ հենց այդպես էի տրամադրվել՝ հաճույք ստանալ մտածելուց ու լուծումներ գտնելուց։ Կարծում եմ՝ դա ևս օգնեց հաղթահարելու ավելորդ լարվածությունը և կենտրոնանալու աշխատանքի վրա»,- ընդգծեց ուսանողը։

Ոսկե մեդալակիրը նշում է, որ միջազգային նման մրցույթները բացառիկ հնարավորություն են տալիս ծանոթանալու տարբեր երկրների օլիմպիական պատրաստության համակարգերին, քննարկելու կրթական փորձը և ձևավորելու մասնագիտական կապեր, որոնք հետագայում կարող են վերածվել գիտական համագործակցության։

Բրոնզե մեդալակիր, ԵՊՀ ֆիզիկայի ինստիտուտի 3-րդ կուրսի ուսանող Ստեփան Գևորգյանը մատնանշեց՝ մրցույթի խնդիրները հետաքրքիր և բազմազան էին, իսկ օլիմպիադայի նշանակալից ձեռքբերումներից էին այլ երկրների մասնակիցների հետ շփումն ու փորձի փոխանակումը։

«Տարբեր երկրների ուսանողների հետ քննարկում էինք ոչ միայն օլիմպիական խնդիրներ, այլև մաթեմատիկական կրթության առանձնահատկությունները, գիտական հնարավորությունները։ Այդ զրույցներից շատ նոր գաղափարներ ծնվեցին։ Օրինակ՝ Սլովակիայի մասնակցից տեղեկացա դպրոցական մի հետաքրքիր օլիմպիադայի մասին, որն անցկացվում է բազմաթիվ երկրներում, բայց Հայաստանում դեռ չկա։ Կուզենայի ապագայում նպաստել Հայաստանում նմանօրինակ նախաձեռնությունների իրականացմանը»,- նշեց նա։

Օլիմպիադայի մասնակից, ԵՊՀ ինֆորմատիկայի և կիրառական մաթեմատիկայի ֆակուլտետի 3-րդ կուրսի ուսանող Սամվել Աբելյանի համար սա միջազգային մաթեմատիկական օլիմպիադայում առաջին փորձառությունն էր։ Նրա խոսքով՝ թեև արդյունքը չէր համապատասխանում սպասումներին, մասնակցությունն ինքնին մեծ մոտիվացիա դարձավ հետագա աշխատանքի համար։

«Դպրոցական տարիներին մասնակցել եմ ծրագրավորման օլիմպիադաների, իսկ մաթեմատիկան սկսել եմ ավելի խորությամբ ուսումնասիրել համալսարանում։ Այս մրցույթն ինձ տվեց արժեքավոր փորձ և նոր նպատակ՝ հաջորդ տարի վերադառնալ ավելի լավ պատրաստված ու ավելի բարձր արդյունքով»,- ասաց նա։

ԵՊՀ-ից օլիմպիադային մասնակցել են նաև Մաթեմատիկայի և մեխանիկայի ֆակուլտետի 4-րդ կուրսի ուսանողներ Ռուբեն Համբարձումյանը, որը նվաճել է արծաթե մեդալ, և Էդգար Հողմրցյանը, որն արժանացել է գովասանագրի։ Հայաստանի հավաքականի մյուս արծաթե մեդալակիրը Հայաստանի ամերիկյան համալսարանի ուսանող Ծովակ Եգորյանն էր։

Թիմի մարզիչ, ԵՊՀ մաթեմատիկայի և մեխանիկայի ֆակուլտետի ֆունկցիաների տեսության և դիֆերենցիալ հավասարումների ամբիոնի ասիստենտ Կարեն Քեռյանը շեշտեց, որ օլիմպիադային նախորդել է երկարատև պատրաստություն, ներքին ընտրական մրցույթ և ինտենսիվ պարապմունքներ։

«Ընտրական փուլը կազմակերպում ենք այնպես, որ հնարավորինս համապատասխանի IMC-ի ձևաչափին։ Մեր նպատակը պարզապես լավագույններին ընտրելը չէ, այլ ուսանողներին նախապես ծանոթացնելը այն միջավայրին ու մտածողությանը, որը նրանց սպասվում է միջազգային մրցույթում։ Այս տարի նույնպես մրցակցությունը շատ մեծ էր, և տեղերի սահմանափակ լինելու պատճառով նույնիսկ բարձր պատրաստվածությամբ մի քանի մասնակիցներ չկարողացան ընդգրկվել թիմում»,- ընդգծեց նա։

Կարեն Քեռյանի խոսքով՝ այս տարվա օլիմպիադայի խնդիրները որոշ չափով տարբերվում էին նախորդ տարիների խնդիրներից․ թեմատիկ ընդգրկվածությունն ավելի նեղ էր, սակայն մրցութային մակարդակը պահպանվել էր։ Նա նաև նկատեց, որ վերջին տարիներին կազմակերպիչները բարելավել են հատկապես աշխատանքների բողոքարկման գործընթացը՝ այն դարձնելով ավելի համակարգված և արդյունավետ։

Մարզիչը նաև արժևորեց այն փաստը, որ IMC-ն միայն մրցույթ չէ, այլ միջազգային ակադեմիական հարթակ, որտեղ ձևավորվում են ապագա գիտական համագործակցություններ։