Բաբկեն Հարությունյանի անվան Հայաստանի պատմական աշխարհագրության քարտեզագրության և հայ դիվանագիտության հիմնախնդիրների հետազոտական լաբորատորիա

Լաբորատորիան հանրապետության պատմական աշխարհագրության և քարտեզագրության հիմնախնդիրներով զբաղվող միակ օջախն է: Լաբորատորիայի աշխատակիցների կատարած հետազոտական և քարտեզագրական աշխատանքները՝ գրքերը, հոդվածները, ատլասներն ու քարտեզները, մեր հանրապետության համար ունեն ոչ միայն գիտական, այլև քաղաքական կարևոր նշանակություն: Տեսական և գործնական ուղղվածության հետազոտությունները համադրելու նպատակով 2023 թ. Բ. Հարությունյանի անվան Հայաստանի պատմական աշխարհագրության և քարտեզագրության լաբորատորիան միավորվել է Հայոց պետականության պատմության հիմնահարցերի հետազոտական բաժնի հետ։

Լաբորատորիայի հետազոտություններում կարևորվում է տարբեր գիտությունների համակցումը: Այդ աշխատանքների հիմքում միջգիտակարգայնությունն է, որը պատմության, միջազգային հարաբերությունների, աշխարհագրության, քարտեզագրության և ինֆորմատիկայի միջառարկայական բարդ սինթեզ է:

Լաբորատորիայում աշխատանքներ են տարվում նաև արդիական խնդիրների ուսումնասիրության, մասնավորապես ազգային տնտեսական քաղաքականության և տարածքային անհամաչափ զարգացման հիմնախնդիրների ուղղությամբ։ Կատարվող հետազոտությունների շարքին են դասվում նաև հայ դիվանագիտության պատմության և ժամանակակից տեղեկատվական տեխնոլոգիաների ուսումնասիրությանն ուղղված աշխատանքները: