Այս բաժինը միավորում է ֆորումի այն ձևաչափերը, որոնք նախատեսված են մասնագիտական քննարկման, գաղափարների փոխանակման և նոր նախաձեռնությունների ձևավորման համար։ Պանելային և թեմատիկ քննարկումների, ինչպես նաև գաղափարների ու հանձնառությունների հավաքագրման միջոցով մասնակիցները հնարավորություն կունենան անդրադառնալու ԵՊՀ զարգացման, համալսարան-շրջանավարտ-համայնք կապի ամրապնդման և համատեղ քայլերի ձևավորման հարցերին։ 

Այս ձևաչափերի նպատակն է ստեղծել բաց և մասնակցային հարթակ, որտեղ միտքը վերածվում է երկխոսության, իսկ երկխոսությունը՝ գործնական առաջարկների և համագործակցության հիմքի։

Պանելային քննարկումները ֆորումի այն առանցքային ձևաչափերից են, որոնց միջոցով տարբեր ոլորտների մասնագետներ, շրջանավարտներ և գործընկերներ մեկ հարթակում կքննարկեն ժամանակակից աշխարհի կարևոր մարտահրավերներն ու հնարավորությունները։ Քննարկումների թեմաները միտված են բացահայտելու ԵՊՀ դերակատարությունը որպես մտավոր, գիտակրթական և հասարակական ազդեցության կենտրոն, հայագիտության միջազգային նշանակությունը, նորարարական էկոհամակարգերի ձևավորումը, «կանաչ» զարգացման օրակարգն ու բարձրագույն կրթության վերափոխումները։ Այս ձևաչափը հնարավորություն է ստեղծում ոչ միայն կարծիքների փոխանակման, այլև նոր մոտեցումների ու համագործակցության ուղղությունների ձևավորման համար։

Պանելային քննարկումները կանցկացվեն հետևյալ թեմաներով՝ 

Այս տարի ֆորումի շրջանակում թեմատիկ քննարկումները կանցկացվեն «ԵՊՀ-համայնք համագործակցություն» խորագրով՝ «Կրթություն», «Գիտություն», «Ենթակառուցվածքներ» և «Հանրային պատասխանատվություն» ուղղություններով։

Կրթություն

ԵՊՀ-ի և շրջանավարտների համայնքի համագործակցության կրթական հնարավորություններ, համատեղ նախաձեռնություններ և ծրագրային զարգացումներ։

Գիտություն

Գիտական համագործակցության, հետազոտական ներուժի համախմբման և փորձի փոխանակման նոր ձևաչափեր։

Ենթակառուցվածքներ

Համալսարանական միջավայրի զարգացման, ռեսուրսների ներգրավման և ենթակառուցվածքային բարելավումների հնարավորություններ։

Հանրային պատասխանատվություն

ԵՊՀ-ի և շրջանավարտների համայնքի համատեղ դերակատարությունը հասարակական ազդեցության, արժեքների ձևավորման և հանրօգուտ նախաձեռնությունների իրականացման գործում։

Յուրաքանչյուր սեկցիայում քննարկումները կկառուցվեն հետևյալ առանցքային հարցերի շուրջ՝ 

• ի՞նչ կարող է ԵՊՀ-ն տալ շրջանավարտների համայնքին, 

• ի՞նչ կարող է շրջանավարտների համայնքը տալ ԵՊՀ-ին, 

• ի՞նչ ռեսուրսներ են անհրաժեշտ համագործակցությունն արդյունավետ կազմակերպելու համար, 

• ինչպե՞ս ձևավորել այդ համագործակցության իրականացման արդյունավետ և կայուն մեխանիզմներ։

Այս ձևաչափը ֆորումի այն մասնակցային հարթակն է, որի միջոցով օրվա ընթացքում հնչած գաղափարները, առաջարկներն ու քննարկումների արդյունքները վերածվում են տեսանելի հանձնառությունների։ Հատուկ այս նպատակով ստեղծվել է «գաղափարների պատ», որը հնարավորություն կտա շրջանավարտներին ոչ միայն արտահայտելու իրենց պատկերացումները ԵՊՀ ապագայի մասին, այլև դրանք վերածելու անձնական խոստման ու իրական քայլի։

Յուրաքանչյուր մասնակից կարող է ձևակերպել իր տեսլականը ԵՊՀ ապագայի մասին, նշել իր հնարավոր ներդրումը համալսարանի զարգացման գործում և արձանագրել այն կոնկրետ քայլը, որը պատրաստ է կատարելու առաջիկա մեկ տարվա ընթացքում։ Դրանք իրենց տեղը կգտնեն «Երազում եմ», «Պլանավորում եմ» և «Հանձնառում եմ» բաժիններում։