Ումբերտո Էկոյի նախկին ուսանող, բուլղարական սեմիոտիկական ավանդույթի առաջատար ներկայացուցիչ, պրոֆեսոր Քրիստիան Բանկովը «Թվային նշանագիտության ակնարկ» թեմայով դասախոսություն կարդաց Երևանի պետական համալսարանում՝ անդրադառնալով արդի փուլում թվային նշանագիտության խնդիրներին, ինչպես նաև մշակութային փոխակերպումներին, հարթակային տեխնոլոգիաներին:
Դասախոսության օրը խորհրդանշական էր երեք առումով։ Նախ՝ փետրվարի 19-ին բուլղարացիները նշում են իրենց ազգային հերոս Վասիլ Լևսկու (1837–1873) մահվան տարելիցը, մինչդեռ Հայաստանում նշվում է հայ մեծ բանաստեղծ Հովհաննես Թումանյանի (1869–1923) ծննդյան օրը։ Վերջին տարիներին այդ օրը մշակութային նախաձեռնությունից վերածվել է համազգային ավանդույթի․ միջոցառումներ են կազմակերպվում դպրոցներում, համալսարաններում և այլ հաստատություններում։ Գրախանութները առաջարկում են զեղչեր, իսկ գրքերի փոխանակումը դարձել է ավանդույթ՝ ընթերցանության կարևորության և մշակութային հիշողության վերահաստատման խորհրդանշական դրսևորում։
Ծանոթ չլինելով այս ավանդույթին՝ պրոֆեսոր Բանկովը իր հիմնական գիտական աշխատությունը՝ «Թվային միտք․ թվային մշակույթի սեմիոտիկական հետազոտություններ» («The Digital Mind: Semiotic Explorations in Digital Culture») գիրքը, նվիրեց Մեդիա հետազոտությունների և նշանագիտության ամբիոնի գործընկերներին՝ ի նշան ակադեմիական համագործակցության։
Երրորդ՝ հաշվի առնելով այն, որ լրացել էր Ումբերտո Էկոյի մահվան տասներորդ տարին՝ դասախոսության շրջանակում առանձնահատուկ անդրադարձ կատարվեց Էկոյի՝ ժամանակակից նշանագիտության ամենաազդեցիկ տեսաբաններից մեկի հիմնական գաղափարներին։ Փաստորեն, Երևանի պետական համալսարանում տեղի ունեցած միջոցառումը դարձավ ոչ միայն թվային մշակույթի վերաբերյալ ակադեմիական քննարկում, այլև հարգանքի տուրք իտալացի մեծ մտածողի հիշատակին։
Պրոֆեսոր Քրիստիան Բանկովը՝ որպես գիտնական, ձևավորվել է Ցվետան Տոդորովի և Յուլյա Կրիստևայի գաղափարական ազդեցությամբ։ Նրա դասախոսությունը մեծ հետաքրքրություն առաջացրեց դասախոսների և ուսանողների շրջանում՝ վերահաստատելով միջազգային ակադեմիական երկխոսության կարևորությունը և թվային դարաշրջանում նշանագիտական հետազոտությունների արդիականությունը։ «Թվային նշանագիտության ակնարկ» դասախոսության շրջանակում նա վերլուծեց, թե ինչպես են թվային տեխնոլոգիաները փոխակերպում ոչ միայն մշակույթն ու ճանաչողությունը, այլև ինքնությունը։ Հղում կատարելով Էկոյի կողմից անցկացված տարբերակմանը՝ ավանդական մշակույթի և էրուդիցիայի՝ որպես գիտելիքի համակարգային կազմակերպման միջև, պրոֆեսորը ընդգծեց թվային տեղեկատվության անկայունությունը և հարթակների դերը՝ որպես այնպիսի միջավայրեր, որտեղ հեղինակությունը, ճանաչումը և ազդեցությունը գործում են որպես արժույթի նոր ձևեր։
Դասախոսության երկրորդ մասը նվիրված էր մեդիափորձառությանը և իմերսիվությանը։ Քննելով հավաստիության և վերիֆիկացիոն պայմանագրի միջև լարվածությունը՝ անդրադարձ կատարվեց անհավատության կասեցման երևույթին, հատուկ էֆեկտներին և միջավայրում ընկղմվելու հետ կապված ճանաչողական ջանքերին։
Վերջում դասախոսության մեջ ուրվագծվեցին նշանագիտական տեսության և համալսարանական դասավանդման առջև ծառացած հեռանկարներն ու մարտահրավերները արհեստական բանականության դարաշրջանում։ Վերաիմաստավորելով Էկոյի առաջարկած մշակույթի՝ որպես հանրագիտարանի մոդելը, պրոֆեսոր Բանկովը խոսեց իմաստաբանական կապերի և ստեղծագործականության մասին։
Իր ելույթի վերջում նա բարձրացրեց հարցեր նշանագիտական տեսության ապագայի, ակադեմիական կրթության փոխակերպման՝ արհեստական բանականությունը որպես «ծույլ մեքենա» դիտարկելու պայմաններում և ժամանակակից գիտելիքի արտադրության մեջ համալսարանների փոփոխվող դերի վերաբերյալ։
Քրիստիան Բանկովը այցելեց նաև ԵՊՀ պրոֆեսոր Լ․ Ղարիբջանյանի անվան պատմության թանգարան, որտեղ նրան ներկայացվեց ԵՊՀ կայացման պատմությունը։
