Միջազգային հարաբերություններ և դիվանագիտություն

Ուսուցման իրականացման ձևը՝ առկա, ուսման տևողությունը՝ 2 տարի։

Շնորհվող որակավորումը՝ միջազգային հարաբերությունների մագիստրոս։

Ընդունելության պահանջները

«Միջազգային հարաբերություններ և դիվանագիտություն» կրթական ծրագրի ընդունելությունը կատարվելու է՝ համաձայն «ԵՊՀ մագիստրատուրայի (առկա և հեռակա ուսուցման ձևերով) ընդունելության կարգ»-ի պահանջների:

Մագիստրատուրայի ընդունելության հայտագրումը կատարվում է առցանց եղանակով՝ admission.ysu.am կայքէջի միջոցով։ 

Մանրամասները՝ «Մագիստրատուրայի ընդունելություն» էջում, որտեղ հրապարակված են ընդունելության փուլերի ժամկետները, դիմումների ընդունման կարգն ու պայմանները, ինչպես նաև հայտագրման համար անհրաժեշտ փաստաթղթերի ցանկը:

ԵՊՀ մագիստրատուրայում ընդունելությունը առկա ուսուցման ձևով կատարվում է երկու փուլով: Փուլերի անցկացման ժամանակացույցը հաստատվում է ռեկտորի հրամանով:

Առաջին փուլով անվճար ու վճարովի ուսուցման համակարգի ընդունելության մրցույթին կարող են մասնակցել ԵՊՀ բակալավրիատի առկա և հեռակա ուսուցման ձևերի «միջազգային հարաբերություններ» մասնագիտությամբ (կրթական ծրագրի) վերջին երեք ուսումնական տարվա (ուսումնական տարիների հաշվարկը սկսվում է գործող ուսումնական տարվանից) շրջանավարտները՝ ըստ իրենց ամփոփիչ ատեստավորման գնահատականի և դիպլոմի հավելվածում գրանցված միջին որակական գնահատականի (ՄՈԳ-ի):

Դիմորդների ընդունելությունը կատարվում է առանց ընդունելության քննության, մրցութային կարգով՝ ատեստավորման գնահատականի և ՄՈԳ-ի շեմի հաշվառմամբ: Հավասար ՄՈԳ-ի դեպքում հաշվի են առնվում հետևյալ լրացուցիչ չափորոշիչները․ 

ա) գերազանցության դիպլոմի առկայությունը, 

բ) ամփոփիչ ատեստավորման արդյունքները: 

Մագիստրոսական կրթական ծրագրերի ընդունելության մուտքային պահանջները յուրաքանչյուր տարի սահմանվում են ռեկտորի հրամանով: Անվճար (պետության կողմից ուսանողական նպաստների ձևով ուսման վարձի լրիվ փոխհատուցմամբ) տեղերի համար հայտարարված մրցույթը չհաղթահարելու դեպքում 1-ին փուլի դիմորդներն ընդունվում են նույն կրթական ծրագրի վճարովի համակարգ:

Երկրորդ փուլով ընդունելությունը կատարվում է ընդունելության քննության արդյունքների հիման վրա: Այս փուլի ընդունելության մրցույթին կարող են մասնակցել ԵՊՀ և այլ պետական, ըստ մասնագիտությունների հավատարմագրված/ինստիտուցիոնալ հավատարմագրում անցած ոչ պետական բարձրագույն ուսումնական հաստատությունների (առկա ու հեռակա ուսուցման ձևերի) բակալավրի, մագիստրոսի կամ դիպլոմավորված մասնագետի որակավորում ունեցող շրջանավարտները:

Ծրագրի նպատակը

Կրթական ծրագրի նպատակն է պատրաստել որակյալ մասնագետներ, որոնք կտիրապետեն մասնագիտական հմտություններին և կարողություններին՝ ունակ լինելով աշխատելու միջազգային հարաբերությունների ինչպես պրակտիկ, այնպես էլ փորձագիտական գործունեության բնագավառում, տրամադրել ուսանողներին հիմնարար գիտելիքներ միջազգային հարաբերությունների գործընթացների և միտումների վերաբերյալ՝ պրակտիկ գործունեությունների բնագավառում դրսևորելով քաղաքական գործընթացները համակարգված վերլուծելու կարողություններ:

Առավելությունները

Ծրագրի շրջանակում զարգանում են ուսանողների գիտահետազոտական և փորձագիտական գիտելիքներն ու հմտությունները՝ ներառելով տեսական-մասնագիտական գիտելիքների ամուր հիմքը, գիտակարգերի վերլուծական հասկացութային շրջանակները և գործիքակազմը. միջազգային փորձի հիման վրա պատրաստվում են մրցունակ միջազգայնագետներ:

Կարիերայի հնարավորությունները

Շրջանավարտները, ավարտելով մագիստրոսական ծրագիրը, հնարավորություն ունեն աշխատանքի անցնելու հետևյալ կառույցներում` Արտաքին գործերի նախարարությունում, միջազգային կառույցներում ու կազմակերպություններում տեղական ինքնակառավարման մարմիններում, հասարակական կազմակերպություններում, գիտահետազոտական կենտրոններում:

Ծրագրի շրջանավարտները կարող են շարունակել իրենց ուսումը ԵՊՀ միջազգային հարաբերությունների ֆակուլտետի ասպիրանտուրայում: