ԵՊՀ տնտեսագիտության և կառավարման ֆակուլտետի դեկան, դոցենտ Կառլեն Խաչատրյանը, կառավարման և գործարարության ամբիոնի ասիստենտ, տ.գ.թ. Կարապետ Թոմիկյանը և ֆակուլտետի շուրջ մեկ տասնյակ ուսանողներ մասնակցեցին ՀՀ կենտրոնական բանկի Դիլիջանի ուսումնահետազոտական կենտրոնում անցկացված «Ապացույցներից՝ քաղաքականություն․ փորձարկումների մշակույթի ձևավորում» («From Evidence to Policy: Building a Culture of Experimentation») խորագրով աշխատաժողովին։
ՀՀ կենտրոնական բանկի և «J-PAL Europe»-ի հետ համատեղ կազմակերպված աշխատաժողովը համախմբել էր քաղաքականություն մշակողների, հետազոտողների, տնտեսագետների և ակադեմիական համայնքի ներկայացուցիչների։ Աշխատաժողովի շրջանակում քննարկվեցին հետազոտահենք քաղաքականության մշակման ժամանակակից մոտեցումները, անդրադարձ կատարվեց քաղաքականության տարբեր լուծումների փորձարկման և դրանց ազդեցության գնահատման մեթոդներին, ինչպես նաև ոլորտի միջազգային փորձին։
Աշխատաժողովին բացման խոսքով են հանդես եկել ՀՀ կենտրոնական բանկի նախագահ Մարտին Գալստյանը և «J-PAL Europe»-ի գործադիր տնօրեն Կիլիան Նոլանը։ «Ապացույցներից՝ ավելի արդյունավետ քաղաքականություն․ ի՞նչ է անհրաժեշտ» («From Evidence to Better Policy: What Does It Take?») թեմայով զեկուցմամբ է հանդես եկել 2019 թվականի տնտեսագիտության Նոբելյան մրցանակակիր, «J-PAL»-ի համահիմնադիր Աբհիջիթ Բաներջին։ Զեկուցմանը հաջորդել է Աբհիջիթ Բաներջիի և Մարտին Գալստյանի՝ «Ապացուցահենք քաղաքականությունների նշանակությունը» («The Importance of Evidence-Based Policies») թեմայով քննարկումը, որը վարել է ՀՀ ԿԲ նախագահի տեղակալ Արմեն Նուրբեկյանը։
Աշխատաժողովի շրջանակում անցկացվել են նաև պանելային քննարկումներ և թեմատիկ ելույթներ՝ նվիրված ապացուցահենք քաղաքականությանը, որակյալ հետազոտությունների իրականացմանը և քաղաքականությունների ու ծրագրերի ազդեցության գնահատման մեթոդներին։ Միջոցառումը եզրափակվել է ԿԲ Դիլիջանի ուսումնահետազոտական կենտրոնի տնօրեն Գևորգ Մինասյանի և «J-PAL Europe»-ի «IDEE» ծրագրի տնօրեն Ադրիեն Պավլիկի ամփոփիչ ելույթներով։
Միջոցառման ավարտին մեկնարկել է նաև աշնանային դպրոցը, որը միավորում է Հայաստանի, Եվրոպայի և Կենտրոնական Ասիայի երիտասարդ հետազոտողներին՝ սոցիալական քաղաքականությունների և ծրագրերի խիստ գնահատման մեթոդների վերաբերյալ գիտելիքների և գործնական կարողությունների զարգացման նպատակով։
Ֆակուլտետը կարևորում է պրոֆեսորադասախոսական անձնակազմի և ուսանողների մասնակցությունը նման նախաձեռնություններին՝ դրանք դիտարկելով որպես գիտելիքի և մասնագիտական փորձի փոխանակման կարևոր հարթակներ։
ԵՊՀ տնտեսագիտության և կառավարման ֆակուլտետի և ՀՀ կենտրոնական բանկի համագործակցությունը ձևավորվում է կրթական, գիտահետազոտական և մասնագիտական փոխգործակցության տարբեր ուղղություններով։ Այս համագործակցության զարգացմանը նպաստում են երկու կառույցների միջև ձևավորված մասնագիտական սերտ կապերը: Մասնավորապես, ՀՀ ԿԲ նախագահ Մարտին Գալստյանը ԵՊՀ տնտեսագիտության և կառավարման ֆակուլտետի շրջանավարտ է, Կենտրոնական բանկի՝ պատասխանատու պաշտոններ զբաղեցնող աշխատակիցների զգալի մասն իր առաջնային մասնագիտական կրթությունը ևս ստացել է ֆակուլտետում։ Նշենք նաև, որ ֆակուլտետի ակադեմիական կազմում ընդգրկված են ՀՀ կենտրոնական բանկում աշխատող կամ տարբեր տարիներին աշխատած և բանկային համակարգում երկարամյա աշխատանքային փորձ ունեցող մասնագետներ։
