ԵՊՀ տնտեսագիտության և կառավարման ֆակուլտետում ս․թ․ նոյեմբերի 17-ին հյուրընկալվեցին ԱՄՆ Դարթմութի քոլեջի (Dartmouth College) Թաք բիզնես դպրոցի (Tuck School of Business) գործարար կառավարման մագիստրոսական ծրագրի 28 ուսանողներ՝ բիզնեսի կառավարման պրոֆեսոր, «Թաք բիզնես կամուրջ» ծրագրի ակադեմիական ղեկավար Արամ Դոնիգյանի (Aram Donigian) գլխավորությամբ։ ՀՀ կատարած այցը կազմակերպվել էր ճանաչողական-կրթական ծրագրի շրջանակում՝ Հայաստանի տնտեսության առանձնահատկություններին և զարգացման միտումներին ծանոթանալու նպատակով։
Ողջունելով հյուրերին՝ ԵՊՀ տնտեսագիտության և կառավարման ֆակուլտետի դեկան, դոցենտ Կառլեն Խաչատրյանը կարևորեց նման ձևաչափով հանդիպումների նշանակությունը միջազգային ակադեմիական կապերի զարգացման ու փորձի փոխանակման տեսանկյունից։ Նա ներկայացրեց Երևանի պետական համալսարանի պատմությունը, ֆակուլտետի գործունեությունը, կրթական ծրագրերը, գիտահետազոտական հիմնական ուղղություններն ու միջազգային համագործակցության հնարավորությունները։
Ողջույնի խոսքով հանդես եկավ նաև ֆակուլտետի բարեկամ Գևորգ Խրիմյանը, որի աջակցությամբ կայացավ այս հանդիպումը։ Տնտեսագիտության և միջազգային տնտեսական հարաբերությունների ամբիոնի վարիչ, դոցենտ Գրիգոր Հայրապետյանը ներկայացրեց Հայաստանի Հանրապետության մակրոտնտեսական իրավիճակը։ Նա անդրադարձավ տնտեսական աճի դինամիկային, ՀՆԱ-ի կառուցվածքին, աշխատաշուկայի հիմնական միտումներին, ինչպես նաև Հայաստանի տնտեսության զարգացման առանձնահատկություններին և առկա մարտահրավերներին։
Հանդիպմանը մասնակցում էին նաև ԵՊՀ տնտեսագիտության և կառավարման ֆակուլտետի ուսանողները, ինչը հնարավորություն ընձեռեց երկու համալսարանների ուսանողներին անմիջականորեն հաղորդակցվելու, մասնագիտական հետաքրքրություններ ու տեսակետներ փոխանակելու և միմյանց ակադեմիական միջավայրին ծանոթանալու։ Հանդիպումն անցավ մասնագիտական ակտիվ քննարկման մթնոլորտում։ Դարթմութի քոլեջի ուսանողները բազմաթիվ հարցեր ուղղեցին բանախոսին՝ հետաքրքրվելով Հայաստանի տնտեսության կառուցվածքով, տնտեսական քաղաքականությամբ և զարգացման հեռանկարներով։ Քննարկման ընթացքում մասնակիցները փոխանակեցին մասնագիտական տեսակետներ և համադրեցին տարբեր երկրների տնտեսական զարգացման փորձը։
Նշենք, որ 1900 թվականին հիմնադրված Թաք բիզնես դպրոցը կառավարման ոլորտում աշխարհի առաջին կառավարման դպրոցն է և համարվում է ԱՄՆ-ի ու աշխարհի առաջատար բիզնես դպրոցներից մեկը։ Այն հայտնի է ընդհանուր կառավարման, խորհրդատվության և ֆինանսների ոլորտներում բարձրակարգ մասնագետների պատրաստմամբ։ Դարթմութի քոլեջը, որի կազմում գործում է Թաք բիզնես դպրոցը, աշխարհի հեղինակավոր բարձրագույն ուսումնական հաստատություններից է և «QS World University Rankings 2026» վարկանիշային աղյուսակում զբաղեցնում է 247-րդ տեղը։



