«Erasmus+ TransfrontEU» ծրագրի շրջանակում Մալագայի համալսարանի (Իսպանիա) տնտեսագիտության և բիզնես վարչարարության ամբիոնի պրոֆեսոր, Ինդուստրիալ ինժեներիայի դպրոցի դասախոս, դոկտոր Սալվադոր Պերես-Կանտոն և պրոֆեսոր Կառլոս Գ. Բենավիդեսը դասախոսություններով հանդես եկան ԵՊՀ տնտեսագիտության և կառավարման ֆակուլտետի «Տնտեսագիտություն» կրթական ծրագրի առաջին կուրսի ուսանողների համար։
«Շրջանաձև տնտեսություն» թեմայով դասախոսության շրջանակում դոկտոր Սալվադոր Պերես-Կանտոն անդրադարձավ շրջանաձև տնտեսության գաղափարին, ընդգծեց դրա արդիականությունն ու կարևորությունը ժամանակակից աշխարհում։ Ուսանողներին ծանոթացնելով այս մոտեցման հիմնական սկզբունքներին՝ նա ներկայացրեց դրա կիրառման ներկայիս ուղղությունները և առավելությունները՝ շեշտելով, թե ինչպես կարող է շրջանաձև տնտեսությունը նպաստել ավելի պատասխանատու և բնապահպանական տեսանկյունից կայուն տնտեսական համակարգի ձևավորմանը:
Դոկտոր Պերես-Կանտոն ներկայացրեց նաև Մալագայի համալսարանի «Գործառնություններ և կայունություն» հետազոտական խմբում իրականացվող իր գիտական գործունեությունը, որը կենտրոնացած է տնտեսության տարբեր ոլորտների՝ ավտոմոբիլային, տեքստիլ և պլաստմասսե արդյունաբերությունների ուսումնասիրության վրա՝ շրջանաձև տնտեսության սկզբունքների արդյունավետ ներդրման ռազմավարությունների մշակման նպատակով։
Բանախոսը անդրադարձավ նաև Հայաստանի տնտեսության ներկա վիճակին՝ առանձնացնելով երկրի հիմնական արդյունաբերական ոլորտները և գնահատելով շրջանաձև տնտեսության մոտեցումների կիրառման հնարավորությունները՝ որպես արտադրական համակարգերի «կանաչ» վերափոխման միջոց ապագա մարտահրավերներին պատասխանելու համար։ Նա կարևորեց մասնավոր հատվածի, պետական կառավարման և հանրային իրազեկման համատեղ ու ներդաշնակ գործակցությունը շրջանաձև տնտեսության մոդելի արդյունավետ ներդրման համար։
Պրոֆեսոր Կառլոս Գ. Բենավիդեսը «Կայուն զբոսաշրջություն. կորպորատիվ սոցիալական պատասխանատվությունը հյուրանոցային ոլորտում» թեմայով դասախոսությունը սկսեց տնտեսագիտության մակրոտնտեսական սկզբունքների՝ տնտեսական աճի և զարգացման շուրջ տեսական մոտեցումների ներկայացմամբ, ապա անդրադարձավ նաև տնտեսության կայուն զարգացման հայեցակարգին և դրա կիրառման հնարավորություններին զբոսաշրջության ոլորտում։
Դոկտոր Բենավիդեսը, կենտրոնանալով զբոսաշրջության տնտեսագիտության վրա՝ որպես իր գիտական հետաքրքրության առանցք, ընդգծեց կայուն զբոսաշրջության անհրաժեշտությանը և ընդգծեց դրա տնտեսական, սոցիալական և բնապահպանական ազդեցությունների գնահատման կարևորությունը։ Բանախոսը անդրադարձավ նաև կորպորատիվ սոցիալական պատասխանատվության (ԿՍՊ) գաղափարին, դրա հիմնասյուներին, չափման մեխանիզմներին և ազդեցություններին՝ ներկայացնելով Իսպանիայի հյուրանոցային ոլորտում ԿՍՊ-ի լավագույն կիրառման օրինակներից։ Քննարկումները ծավալվեցին կայուն զբոսաշրջության և Հայաստանի զբոսաշրջային ներուժի զարգացման շուրջ։
Ուսանողները մեծ հետաքրքրությամբ և ոգևորությամբ լսեցին դասախոսությունները՝ ակտիվ մասնակցություն ցուցաբերելով քննարկումներին: Հանդիպումները անցան ինտերակտիվ ձևաչափով:
ԵՊՀ տնտեսագիտության և կառավարման ֆակուլտետի դեկան, դոցենտ Կառլեն Խաչատրյանն ընդգծեց փոխադարձ հետաքրքրությունների վրա հիմնված միջազգային գործընկերության ընդլայնման և ֆակուլտետում այսօրինակ հանդիպումների անցկացման կարևորությունը: Դեկանը օտարերկրյա գործընկերներին հրավիրեց մասնակցելու աշնանը ԵՊՀ տնտեսագիտության և կառավարման ֆակուլտետում կազմակերպվող միջազգային գիտաժողովին:
Դասախոսություններին և հանդիպմանը մասնակցում էր նաև Տնտեսագիտության և միջազգային տնտեսական հարաբերությունների ամբիոնի վարիչ, միջազգային կապերի պատասխանատու, դոցենտ Գրիգոր Հայրապետյանը:
